الهاجس اللي دكبي تالي الليل=اللي بحث خافي كنيني وبثه
وأضفى على جوّي هموم وغرابيل=وأدنى الزعل والبسط جاحه وجثه
حالة مساجينٍ عليها الدهر ميل=حنينها قطّع فوادي وغثه
اللي فحلها هدرته طلعت سهيل=سودٍ سماريها وساعٍ وشثه
البل تولوها قلال المحاصيل=اللي عزايمهم هزالٍ ورثه
عاقوا سلوم البل خبول ومهابيل=والخبل لاجا سلم الأجواد خثه
يوم أشتروها جودوا الشبك بالحيل=وأرهوا جريشٍ جاب للذود غِثه
وقعد سنينٍ ماستجد المنازيل=ومن طول مجلاسه كلا الفرش عثه
عاقوا هواها عن وساع المداهيل=رقاق الديار اللي مساسٍ ودمثه
يازينها لاما أنتوت للمحاويل=يبهج فوادي شوف مشيٍ تحثه
تبي لها قفرٍ سقي بأول الليل=وشربت هبوبه بعد مالوبل دثه
البل تبي قرمٍ يدل الدواليل =يتبع هواها ونوّها مايلثه
قطفت من بستان فكري شماشيل=وقدمّت باقة ورد ماهيب كثه