|
اللي عنده سوال عن زيان الابل ما عدا المجاهيم أخواني هاذي مشاركتي الاولي في المنتدى الطيب واللي كنت اتابعه من مده طويله وأحب أن أعرض لكم خدماتي مثلا اللي عنده سوال عن الابل المزايين واوصافها واللي يباني أعلق على صوره عنده أنا حاضر لاني صراحه حباني الله بمعرفة الابل واحب ان أفيد أخواني وهذا من زكاة العلم ولا ابغى منكم الا الدعاء تحياتي عبدالله بن مطلق المزحمي |
الله يحييك يابن مطلق المزحمي انا عندى سؤال اذا كنت تعرف عن الابل الباكستانيات شلون انتاجهن ياجت على المغاتير والا الصفر يقلبها والا شلون تصير طريقتها |
تحيه الاخ عبدالله ألابل البكستانيه أكثر الوانها مجهاهيم وحمر ومن أوائل من جابها للخليج الملك خالد عليه رحمة الله وهيف القحطاني البكستانيه في عذاريب منها انها ما تمشي اي بارده وتعرف ان البدو ما يحبون الا الناقه المشايه والعجله البدوي طال عمرك يبا يوم يشد يشوف اباعره ما تسبقها اباعر ولا يبا اذا سرح او شد ناقته ما تمشي لين يضربها بالعصا اويطردها بسيارته وثانيا ان أكلها كثير أما الضراب وانا اخوك ما جربنا لانا ما نقني الباكستانيات واذا بغيت تعذرب في بعير واحد او ناقته قل ان ساسه باكستاني وقصة الرجال راعي البعير الاوضح اللي وصل لمليون وستميه ما تخفاكم وشلون طلعت عن بعيره شايعه ان اصله باكستاني مما سبب له مشاكل وخساير وتحياتي عبدالله بن مطلق المزحمي |
كفيت ووفيت يالمزحمي |
يمرحبا والله أخوى عبدالله بن مطلق المزحمى حياك الله بالمنتدى الطيب وانشاء الله انك تفيد وتستفيد تحياتى لك اخوك خالد المطيرى |
الاخ عبدااله عزالله انك ماقصرت ومن النادر ان نجد مثلك وفقك الله ورزقك على نيتك المباركه اخي عبدالله الله لايهينك وش قولك في هاالناقه http://www.w6w.net/upload2/25-12-200...2109d03269.jpg http://www.w6w.net/upload2/25-12-200...33e67c9c9d.jpg |
السلام عليكم ابي رايك بها القعودين....الأوضح جذع عمره ثلاث سنوات و عشرة شهور ....والقعود الأشعل حق عمره سنتين. [img]http://www.w6w.net/upload2/26-12-200...20687d34c7.jpg[/img] [img]http://www.w6w.net/upload2/26-12-200...132cb1afd7.jpg[/img] [img]http://www.w6w.net/upload2/26-12-200...571e100442.jpg[/img] [img]http://www.w6w.net/upload2/26-12-200...3578c5d296.jpg[/img] نبي رايك فيهم .. ونبي نعرف طيبهم من رداهم.. أبو مشعل |
تحيه ألاخ خالد الحربي الله يوفقنا وياك ويعلم الله اني ما دخلت في هذا الموقع الطيب ألا للافاده والاستفاده وما دخلت على شان اعذرب في حلال خلق الله وكل حلال الناس عندهم غالي ولكن من طلب رايي ابا اعلمه والله بالحقيقه , اولا النياق مبروكات ولكن ياخوي فيهن عذاريب وتعتبر من النياق اللي من متوسط وتحت ثانيا اباعرك ما فيهن شي يميزهن عن الابل -الروس عاديه واذانيهن واقفه ولكن الناقه الاوله سبالها زين الارقاب رديه قصار وتعانجهن الوانها غير مرغوبه اسنمتها متقدمه غربها رديه واسمحلي يا الحربي تحياتي عبدالله بن مطلق المزجمي |
تحيه الاخ ابومشعل الله لا يهينك على طلبك رايي يقولون البدو الولد والقعود مخلفين العهود ,وانا مدري انت تباهن فحول ولا بيع الفحول با بو مشعل كايده يعني لا زم تكون عارف ابوه وامه واخواته القعود الاوضح صورته غير واضحه ارسل صوره ثانيه اما القعود الحمر قعود عادي ما يفحل راسه ردي ورقبته رديه وغاربه ردي وسنامه متقدم وعرقوبه اركز تحياتي المزحمي |
شكراً على ردك ... البعير الأوضح هذي بعض صوره على هذا الرابط وشكراً http://www.mzayan.com/vb/showthread.php?t=1086 |
تحيه الاخ نايف المشعلي فيه بعض البعرايين شكله وسط ولكن طرحهه ذهب يرجع ياخوك للساس وقعودك هذا اذا تبا تفحله لازم تكون شايف ابوه وامه واخواته وانا من رايي انك لاتضربه اباعرك الا كان وحده ولا ثنتين وتخليه لين تشوف بناته القعود وسط في كل شي وما عجبني غاربه وموقع سنامه وجرمه وتصاغر راسه مثل قلتلك لان الحين راع البل يتعب سنه كامله ضراب وعلف وعمال ووقت يبا طال عمرك يوم تلد ناقته الا بنتها خيار تحياتي المزحمي |
الأخ عبدالله السلام عليكم بالنسبة للقعود الأوضح أبوه وأمه من اباعر سعود الماطر الرشيدي...وأبوه الفحل بويضان...وهو انشاء الله سيكون فحل ابلي القادم بالنسبة للقعود الأشعل فأبوه اهو جمل عماش بن جزاء الحربي وأمه من خيار الابل ... وحسب اراء بعض خبراء الابل انصحوني بتفحيله. وشكراً على رأيك ومنكم نستفيد.. أخوك / نايف المشعلي |
تحيه ألاخ نايف المشعلي نسأل الله ان يبارك لنا لك في المال والحلال أما ما ذكرت ان ساس القعود الاوضح من ابل سعود بن ماطر فأن ابل سعود بن ماطر ابل ما فيه حكي مزايين وقد حصل على المركز التاسع على ما اظن العام والسنه هاذي لم يحالفه الحظ . اخي نايف أعرف كثير من اهل الابل المشهورين ومن اللي يفوزون بالمراكز المتقدمه في المزايين وبعارينهم بالملايين وابلهم كذلك ولكن يجي مقهورهم عادي وما هوب شرط ان كل بعير طيب تفحل اعياله أما القعود الحمر . (بالنسبة للقعود الأشعل فأبوه اهو جمل عماش بن جزاء الحربي وأمه من خيار الابل ... وحسب اراء بعض خبراء الابل انصحوني بتفحيله) القعود اخي العزيز حسب نظري انه ما هوب اشعل القعود حمر واذا حسب قولك خبراء الابل نصحوك بتفحيله ,أبغى منك شي واحد انك تسألهم ويش اللي معجبهم في القعود وش عذاريبه لاني يعلم الله وانا قلتها لك اني ما دخلت الموقع عشان اعذرب في حلال الناس ولكن اخي انت شاورتني وانا قلتلك رايي واذا أخطئت فمن نفسي والشيطان واذا أصبت فمن الله وحده وابغا انصحك نصيحه مجرب لا تضرب ناقتك الا بعير متأكد من ساسه ومن طرحه وتقبل تحياتي المزحمي |
أخوي عبدالله المزحمي.. أسعد الله أوقاتك بكل خير.. وأدام الله عليك نعمه.. وجزاك الله ألف خير.. ومن استشارك علمه بالرأي اللي يبرئ ذمتك أمام الله وخلقه.. وأعلم أن إرضاء الناس غاية لا تدرك.. وأتكل على الله في جميع أمورك.. وياليت تستمر معنا في هذا المنتدى لتتم الإستفادة من آرائك إن شاء الله.. وتقبل شكري وتقديري لهذه البادره الطيبة من قبلكم.. ودمتم أخاً صادقاً للجميع.. والله الموفق.. وبه نستعين.. أخوك تركي العتيبي |
تحيه تركي العتيبي الله لا يهينك ويطول عمرك على طاعته ونسأل الله العظيم ان يوفقنا لما يحبه ويرضاه ويوفقنا لمساعدة اخوانا وللاستفاده منهم والافاده لهم انا ياخوي عندي مبدا انه من شاورني اقوله اللي اشوفه بدون مجامله لانه من شاورك يكون في ذمتك وحصل لي انه في ناس اهل اباعر شاوروني في بعض اباعرهم وانا قبل لا اقولهم شي قلتلهم انكم يارجيل اعرف في اباعركم مني ولكن اصرو على ان اقولهم رايي ,ويوم قلتلهم رايي في اباعرهم اشوف انفوسهم شانه والسالفه يمكن صار لها سنه, يعني يمكن انك تبا الخار (الخير) ويجيك شر لذلك انا ما اقول رايي في اباعر احد الا بعد ان يشاورني راعي البل ويطلب رايي ,انا عندي خبر يا تركي ان الناس محد يقدر يرضيها ولكن ان شاء الله ان النيه خالصه لوجه الله أخوكم عبدالله بن مطلق المزحمي |
اخي المزحمي ياريت لو تقيم النياق هذى تقييم مالى كم يسون يعني اللى يبي يشترى كم يشتريها تراهن ثنتين http://www.mazadalhrbi.com/album/00852.JPG http://www.mazadalhrbi.com/album/00853.JPG http://www.mazadalhrbi.com/album/00850.JPG http://www.mazadalhrbi.com/album/00845.JPG والبكرة هذى انا واقف عليها يوم تسام http://www.mazadalhrbi.com/album/00810.JPG http://www.mazadalhrbi.com/album/00813.JPG http://www.mazadalhrbi.com/album/00811.JPG |
تحيه الاخ عبدالله العازمي الصور اللي ارسلتها واجد لو انك خليتها وحده وحده كان زين الصور ابا اعلمك عنها كلها مرة وحده ولكن انت ما وضحت انت تباهنه تقنيهن ولا تبيعهن الابل مبروكات فالزين الابل وسط ولا فيهن شي يميزهن عن الابل الاخرى شفت صورهن وعدت علاهن ما فيهن شي يعني يجذب والاسعار تختلف من وقت لوقت أما البكره الوضحا الظاهر انها لشريطي محسنها ولكن زاد وحلق حتها هامتها تحياتي المزحمي |
الأخ الكريم عبدالله المزحمي أسعد الله أوقاتك بكل خير وأدام الله عليك نعمه وجزاك الله ألف خير كلنا يعلم أن ارضاء كل الناس غاية لا تدرك وكلنا يعلم أن من استشارك دخل في ذمتك ويقولون في الأمثال من طرق الباب سمع الجواب وأنت هنا تتبرع للرد على استفسارات من لديه سؤال عن مواصفات الإبل وزينها وشينها من باب الإفادة بما تملك من معلومات وخبرة والأستفادة بما يطرح من نقاشات وأسئلة نتمنى منك الاستمرار في هذا الجانب والله يبارك فيك ويجزاك خير ولا يسعني إلا أن أتقدم لشخصك الكريم بالشكر الجزيل على هذه البادرة الطيبة منك وأستميح اخواني مشرفي القسم بتثبيت الموضوع أخوك خالد السبيعي |
تحيه الاخ خالد السبيعي الله لا يهينك على الرد الطيب ولا هو غريب عليكم ياسبيع الطيب والرجاله ولا قصور في القبايل الثانيه وان شاء الله نستمر في الموقع اللي يعد من افضل المواقع اللي تهتم في تراثنا الاصيل والله يعافيك على كل حال وللعلم المشاوره وطلب رايي اهل الابل امر ضروري لان الرجال مهما وصل من العرف والفهم لابد له من مشاورة الرجال اللي لهم باع طويل في مجال الابل واذكر سالفه لواحد مايشري الا جمله ونظره طيب وينقز عيون الابل اشترا ناقع بثلاثميه وسبعين الف وتسام عنده الحين بثلاثين الف والكمال لله سبحانه وتعالى تحياتي عبدالله المزحمي |
الاخ الفاضل عبد اللة المزحمى تحية طيبة واشكر لك ماتبذلة من جهد فى الرد على استفسارات الاخوان فى المنتدى واسال الله لك التوفيق واسمح لى بهذة المداخلة كما تعلم ياخ عبدالله انك تطبق المواصفات الزينه على النياق مائة بالمائة وهذة المواصفات لاتوجد الا عند ناس معينين ويعدون على الاصابع ومعروفين-- وعموم الناس تمتلك ابل فيها بعض مواصفات الزين يجب الاخذ بها على العموم - لا احب اطيل عليك ولك منى اطيب تحية وتقدير |
السلام عليكم الله يعطيك العافيه والله يجزاك خير ويعطيك على قد نيتك اخي عبدالله الاحظ ان عينك شرهه وخبرتك عاليه ماشاء الله تبارك الله بس ترى وانا اخوك مهوب كل الناس عندها استطاعه تشري ابل مثل الطهيمي والا فنجال لأن متطلباتك والمواصفات اللي انت تقولها مستحيل تلقاها الا عندهم ولاهوب اي ناقه بعد يمكن فيه شي مايجوزلك.. |
تحيه الاخوان ابراهيم الجربا نقا هشال الله لا يهينكم على الكلام الطيب اللي كتبتوه ونسال الله العظيم أن نكون عند حسن ظن الجميع وعندي علم ان ما هو كل الناس عندها استطاعه تشتري الناقه الخيار ولكن يجتهد الرجال قدر أستطاعته واذا جاء يشري ابل يبتعد عن الناقه كثيرة العذاريب ويهد له فحل منتج ويترجى الله سنه وسنتين الا عنده انتاج لاباس فيه تحياتي المزحمي |
اخي رايك يهمني 2 مرفق السلام عليكم ورحمة الله وبركاته اخي رايك يهمني عطني رايك في هالبكرتين http://www.mzayan.com/vb/images/uplo...8da1f20a57.jpg http://www.mzayan.com/vb/images/uplo...8da1f30833.jpg |
اخى الكريم عبدالله بن مطلق المزحمي ممكن تشوف الناقة هذى وشهو جنسها وشنو احلى مافيها نبي نظرتك لها http://www.mzayan.com/vb/showthread....CA%C7%E4%ED%C9 |
تحية طيبة لجميع الأخوة أعضاء وزوار المنتدى . الأخوة أصحاب النظر وأخص بالذكر الأخ عبدالله المزحمي ، رايكم بهالبكرة . وهل يحرص على أبوها كفحل منتج (( على قد الحال ! )) . مع شكري وتقديري لاستجابتكم بالرد مسبقاً ،،،، http://www.mzayan.com/vb/images/uplo...944304b5fc.jpg |
السلام عليكم ورحمة الله وبركاته الى اخوي ابي منك تفيدني في طفحان وضعت صور له واضحة جداً وهوللأنتاج ماهو للبيع ومن نسب طيب جداً لكن ودي اعرف رايك فيه وجزاك الله خيراً على سمو الأخلاق والكرم والأفادة. |
تحيه الاخ ماجد الروقي اشكرك على ثقتك فيني ونسال الله العظيم رب العرش العظيم ان يوفقنا واياك لما يحبه ويرضاه ثانيا صراحه ما ودي اقولك راي في البكره لان فهمي في المجاهيم ما يأهلني للرد والحكم على المجاهيم ولكن ألاخوان أهل المجاهيم فيهم الخير والبركه يقدرون يجاوبونك على اسئلك والظاهر من صورك أنها غير واضحه لان الواحد قبل ما يحكم على المطيه لابد ان تكون صورتها واضحه يعني تصورها وهي واقفه وغير ملتفته حتي الواحد يشوف المطيه ويحكم علاها زين ولك تحياتي المزحمي |
تحيه ألاخ عبدالله العازمي الناقه مبروكه وفيها عذاريب ظاهره 1-السنام متقدم 2-الرقبه رديه 3-اذنها واقفه 4-الناقه غير سخيفه 5-سنها كبير 6-تصاغر راسها راعي الناقه لا يضربها ألا بعير سنامه على وروكه ورقبته خيار وترجا الله تحياتي المزحمي |
تحيه ألاخ خالد الخالدي اشكرك على ثقتك فيني ونسأل الله ان نكون عند حسن ظنكم رأي في البكره مبروكه ونسأل الله ان يبارك لك 1-السنام مندفن شوي 2-عرقوبها ردي 3-ذيلها طويل 4-مطلع رقبتها ردي 5-جرمها ادون شوي 6-تصاغر راسها 7-أذنها واقفه أما أبوها ما حطيت صورته ولكن البعير اذا عدا البكره امها احرص عليه وثانيا أمها لها دور هذا رايي فأن أصبت من الله وأذا أخطئت من نفسي والشيطان تحياتي المزحمي |
تحيه ألاخ عبدالله العتيبي صورة البعير غير واضحه للحكم علاه,واذا عندك صوره واضحه ارسلها صور البعير اذا عطاك جنبه يعني يكون واضح حتى نشوف جنبه ووجهه ورقبته وغاربه وموقع سنامه وعرقوبه وصورتك غير واضحه ونسأل الله ان يرزقك من بناته تحياتي المزحمي |
|
تحيه ألاخ سعود القحطاني نسأل الله أن يبارك لنا ولك حسب ما يظهر من الصوره الحوار خده غير عريض خشمه غير طويل أذنه واقفه وكبيره ورقبته تقاصرها وتعانقها وجنبه قصير أما ذيله غير واضح أما لونه زين ووبرته زينه والحوار متسند واذا تبغا ترسل صورة ابوه وامه عشان نحكم علاه أكثر على كيفك فاذا أصبت فمن الله واذا أخطئت فمن نفسي والشيطان وشكرا على ثقتك تحياتي عبدالله المزحمي |
أخوي عبدالله شكرا لك لمساعدت بعض الأخوان لكن حنا نعرف للبل الناقه المجهم الزينه اللي اذنها مرتكزه فووووق والمغتر اللي اذنها راجعت (ن) ورى وانت حطيت عذروب بالبكره المجهم وهو اذنها مرتكز لا والله هذا الزين وشاكر لك ولا تزعل مني تحياتي لك |
البكره شفتها اذنها راجعه ورى ماهيب واقفه |
تحيه ألاخ علي العتيبي شكرا على تعليقك وانا ياخوك ما علقت على البكره المجهم وارجع لردي وشفه زين أما الزعل ويش اللي يزعلني وما حصل الا خير ولكن ارجع للرد وتأكد زين تحياتي المزحمي |
اللة يصبحكم بلخير هذي اول مشاركة لي وابغى رايكم في هالمبروك واخص الاخ المزحمي من غير قصور فيكم يالربع وانا احاول انزل صورة ثانية اذا قدرت واعذروني تراني عليمي [img]http://www.mzayan.com/vb/images/uplo...d55ddeac00.jpg[/img |
تحيه السلام علبكم ورحمة الله ألاخ حسن الشبيب في البدايه اشكرك على طلب رأيي ونسأل الله ان يبارك لنا ولك أذا بغيت تفحل بعير في اشياء مهمة لازم تنتبه لها ضروريه جدا جدا لان الفحل هو العمود الفقري حق الابل الفحل حدا ثنتين أما يعمر الابل او يدمرها عشان كذا لا يضرب ناقتك بعير ألا متأكد من انتاجه وشايفه زين او بعير ساسه طيب وتكون عارفن ابوه وامه واخواته لان يااخي الناقه لقاحه سنه غير الحيوانات الاخرى يضرب الفحل وتلقح سنه وترضع سنه سنتين وانت تتعب لذلك أشتر الفحل الطيب أو فيه طريقه ثانيه انك تنزل حول أهل البعارين الطيبه وتضرب عندهم وترجا الله أما بعيرك فيه عذاريب واجد وانا وجهة نظري أنك ما تضربه أباعرك لأن هذا البعير ما فيه شي يجذب وجه البعير عادي جدا البعير له قبعه واذنه رديه ماله سبال الرقبه قصيره وعنقا مطلع رقبته رديه البعير ما هو متسند (متساوي) جنبه قصير جرمه صغير كذلك اللون هذا رايي وأذا اصبت من الله واذا أخطئت فمن نفسي والشيطان تحياتي المزحمي |
الأخ عبدالله ،، تحية طيبة ،، وأشكرك لجهودك الطيبة ... بحكم خبرتك هل ل (( الطمشة )) تأثير على جدع الفحل . يعني : هل يفحل القعود الأطمش ؟ لاسيما إذا كانت خواته سالمه (( ماهو أصل )). |
تحيه ألاخ خالد الخالدي السلام عليكم ورحمة الله وبركاته حاول قدر المستطاع ان تفحل بعير سالم من العذاريب قدر المستطاع وأذا ما قدرت أنزل حول أهل البعارين الطيبه وترجا الله أما أذا بغيت رأي في أنك تضرب أباعرك بعير اطمش رأيي لا تضربه أباعرك خوفا من انتاجه لا يجي مثله وبعض البدو يقولون ( البعير ساس نفسه ) وكلامهم صحيح واجتهد أنك تشري بعير طيب سالم العذاريب أو اشتر قعود من أهل البل الطيبه يكون سعره مناسب وترجا الله ونسأل الله أن يوفقنا وأياك لما يحبه ويرضاه تحياتي المزحمي |
1 مرفق الأخ عبدالله المزحمي ،،، تحية طيبة .... وبعد هذه صورة للقعود الذي أثار سؤالي السابق لك . وش رايك ندور غيره وإلا نصبر ونترجى الله ؟ علماً أن سن القعود سنة تماماً ((مفرود )) . ومشكور على الرد مسبقاً . والمجال مفتوح لجميع الأخوان للمشاركة بالرأي . ودمتم سالمين ،، |
| الساعة الآن 30 : 12 PM بتوقيت مسقط |
Powered by vBulletin® Copyright ©2000 - 2025, Jelsoft Enterprises Ltd. Designed & TranZ By Almuhajir حماية ارشفة اشهار مؤسسة دعم فنى
جميع المشاركات المكتوبة تعبّر عن وجهة نظر كاتبها ... ولا تعبّر عن وجهة نظر إدارة المنتدى |