|
متى تفحل الحوار ؟؟ سؤال لاهل الخبره السلام عليكم ورحمة الله وبركاته وبعد: اذا حصل واضربت نياقي وهي وسط او دون او ازود على اطيب فحل موجود ولن نذكر امثله هنا ،، هل يمكن تفحيل طرحها ام ان نسبة نجاحه بان يكون فحل طيب منخفضه؟؟ انا اقصد بالفحل الطيب هو الفحل اللي يقلب البل وليس الطرح العادي يعني اللي بناته مزايين وامهاتها وسط او دون . بمعنى اخر سؤالي هو : هل يفترض في الحوار اللي تربيه ليكون فحل في المستقبل ان يكون من امهات الفحل الاصلي او ان يكون من اي ام وانما الفحل يكون ناهي؟؟ وتقبلوا تحياتي |
السلام عليكم ورحمة الله وبركاته،، اسعد الله صباح الجميع بالخير اتمنى من اهل الخبره بالموقع التعقيب ،، وان لم يكن سؤالي واضح فلا مانع من إعادة طرحه بطريقة اوضح . وتقبلوا تحياتي |
مهوب شرط اخوي عبدالرحمن والطيب يظهر وجهه واذا عند معرفة جيدة بالابل يمكن تحكم عليه وهو توه حوار هو فحل والا مقصب واذا كانت معرفتك متوسطة فاصبر عليه حتى يجي مفرود وان كانت معرفتك ضعيفة فيمكنك الاستعانة بصديق0 وماخاب من استشار |
سؤال في محلة إذا صار ابوه معروف ساسه وأمه مزيونة حتى لو كانت مهي على نفس الفحل وظهرت مواري الزين في وجهه ورقبته وراسه وظهره اصبر عليه وفحله وعسا ان الله يرزقك منه بإنتاج طيب |
الاخوان مسعود ومحمد بعد التحيه،، شكرا للرد ، ولكن المقصود بسؤالي هو مختلف عن اجابتكم انا ما قلت عندي حوار ابي افحله انا اقول هل يشترط للحصول على حوار ويكون في المستقبل فحل يقلب البل ان يكون من حيران امهات الفحل والا لما تضرب نياقك بفحل طيب تفحل ولدها؟؟ بمعنى اخر هل يشترط في الفحل الناهي ان اشتريه من احد ملاك الفحول المشهورين ومن انتاج نياقه والا اني اكتفي بانتاج ابلي من احد الفحول المشهوره وافحل منه؟؟ طبعا هذا السؤال انا طرحته لهدف الا وهو: هل ساس البعير مهم والا لا؟؟ يعني هل لازم في الفحل انه يكون من ام وابو لهم ساس والا بس يكفي ساس الاب فقط؟؟ وتقبلوا تحياتي |
الاخ عبد الرحمن السلام عليكم ورحمة الله وبركاته ساس البعير مهم جدا والبدو من عادتهم مايهدون الا البعير الذي ساسه طيب من امه ومن ابوه ولاكن في الفتره الحاليه الناس تبي زين وبس حتى وان كان على باكستاني |
|
ماقصرت يا اخ راشد ولا هنت يا اخ مسعود اتمنى نسمع تعليقات بعض الاخوان في الموضوع اذا امكن مع الشكر والتقدير للجميع |
اللي نعرفه ان الفحل الطيب يهدونه ولا يفحلون من عياله اذا هدوه بابل ليست من المزاين ولكن من انتاجه الثاني ممكن احيانا اذا ساس النياق مو معقد اما الانتاج الثالث يفحل منه وشكرا لكم |
تحيه الاخ الفاضل عبدالرحمن عبدالعزيز سوالك متى تفحل الحوار الاجابه سهله اذا كان أبو الحوار طيب ساس وطرح يعني ما يكفي أن يكون ساسه طيب وانتاجه ردي ثانيا ان تشوف أم الحوار يكون كذلك ساسها طيب وبطنها ذهب أي تشوف أخت الحوار من الناقه مدام أنا نتكلم على الام أبي أذكر لكم سالفه حدثت لاحد معارفي وهي أنه ذهب للسوق وأشترى قعود مفرود أوضح مزيون وعقب سنه تغير حال القعود وعندما بلغ لقي أنقلب الي (عماني) سبحان الخالق وبعد سوال أهل الصنف قالوا أنه ولد رحول عمانيه وأبوه بعير أوضح مزيون ثالثا تشوف خواته ولك تحياتي عبدالله بن مطلق المزحمي |
الاخ عبدالرحمن عبدالعزيز اولآ اذا كان الحوارساس ابوه طيب من ابل مقيمه يقال عند البدوا مقيمه اي ان اهلها وارثينها اب عن جد وكلها من الاخر فهذا مايكفي لازم ان امه تكون طيبه ويقال لها هذي ام الفحول من طيبها وماهو شرط انها تكون من امهات البعير ابدا فاذا جبت ناقه طيبه وضربتها على بعير طيب وانتاجه طيب فهذا يكفي انك تحتفض بالحوار حتى يصير فحل واسف على الاطاله تحياتي ,, |
ألاخ الفاضل عبدالرحمن السلام عليكم ورحمه الله .سؤالك مهم جدآ وفي رأى أن لاتهد فى أبلك إلا فحل جيد ومعروف مستوى إنتاجه وهذا لايمنع أن تصبر على القعود ألذى تتوسم فيه ولاتهده إلابعد التعرف على إنتاجه لسنتين على ألاقل أي يضرب ثلاث نياق مختلفات كل سنه ثم تحكم بنفسك والله يبارك لك. |
السلام عليكم ورحمة الله وبركاته وبعد،، في البداية اود شكر جميع من اثرى هذا الموضوع برئيه وافاد اخوانه بخبرته ومن خلال ما رئيت من اجابات اعتقد ان الجميع يتفق على ان للام دور كبير في انتاج الحوار المراد تفحيله ولا يقتصر الامر فقط على الاب . وسبب طرحي الاساسي للموضوع لتنبيه الكثير من الاخوان ومن لا يعرف بعلم الوراثه والجينات عن ما يرونه في الاسواق وعند بعض اصحاب الابل ومن الامثله لدينى الكثير : فترى بعض الحيران والمفاريد عاديه وعلم فحولتها عند الله سبحانه وتعالى ،، وتسام باقيام عاليه جدا وعند سؤال مالكها ما سبب ارتفاع سعرها يقول ابوه الفحل المشهور فلان فحل هاك الرجال !!! وتجد الكثير من الناس يتسابقون ويتعبون في الضراب عند اهل الفحول المميزه ويترجون الحصول على حوار جيد من ها الفحول علاى وعسى ان يكون فحل ابله في المستقبل او يبيعه بالقيمه الفلانيه بسبب شهرة ابوه الذائع الصيت !!! اما امه فهي من نياقه والتي في الغالب تكون مبروكه ولا يرجى منها اكثر من الحليب. فمن وجهة نظري المتواضعه في هذا المجال اقول يجب النظر في اصل الام اكثر من اصل الاب عند التفحيل بمعنى: ان الاب معروف اذا سلمنى بانه من الفحول المميزه ولكن لا نفحل اي حوار من اي ناقه كانت لكون الاب مميز. فالحبيب المصطفى صلى الله عليه وسلم اوصى بذلك في البشر وما ينطبق على البشر يسري على جميع الكائنات الحيه فان العرق دساس . وعليه فان الاب والام يشتركان في تحديد الصفات الوراثيه للحوار حتى وان رئيت الحوار مميز ويشبه ابوه فتاكد بانك سترى في طرحه ما هو شبيه بامه وجدته لامه وجدته لابوه ،، فهذا علم كبير ومن رغب في الاستزاده منه فليقراء في كتب علم الوراثه المنتشره والتي تعطيك المعادلات الدقيقه ونسبة حصولها بعد توفيق الله سبحانه وتعالى اعرف اني اطلت عليكم بالرد ولكن عن نفسي انا لا افحل الا حوار اشتريه من امهات الفحول ذات الساس المعروف حتى وان كلفني ذلك الكثير لان الابل فحل وعمارها من اصل الفحل وتقبلوا تحياتي وتقديري |
إذا صار ابوه معروف ساسه وأمه طيبة بالحيل ولا فيها اي عذروووب وساسها طيب والحوار بعد اذا كان ماله شكل عندها يتفحل الحوار وابشر بالانتاج...>>> |
هلا والله ونا خوك خذها قاعده اذا كنت مضرب ابل واجد من نفس الفحل والفحل زين فحل اللي امه اطيب وحده عندك وان كان وسط الزين وخل واحد ثاني كامل الزين وان كانت امه ما هيب اطيب ابلك لأن اللي كان فيه الزين اكيد بيجذب امه وابوه بالأنتاج ((وكامل الزين يمكن يجذب ابوه وأمه بالأنتاج لكن ممكن يكون كامل الزين اطيب لكن اللي امه وابوه اطيب فحله على شان ساسه يكون زين وهذا رأيي أذا كان مضرب ابل واجد وان كنت مضرب ناقتين مثلا خذ كامل الزين وعسى الله يطرح فيه البركه ((أهم شئ التوكل على الله)) ولا ازيل كلام الأخوان ولكن كل واحد وله رأيه وانت خذ الأسهل والله بيكتبلك فيه الخير ان شاء الله تحياتي |
الاخ عبدالرحمن اختصر لك المشاركة فى المثل الذى يقول( الفحل يجيب نفسه والناقة تجذب ولدها ) |
السلام عليكم انا اتكلم عن تجربه البعير لازم يجيب امه واخته من الفحل في المراح وامه لازم كل جوله تشوف وحده مثلها في المقهور وانا اتكلم عن تجربه والله اعلم |
الاخ عبدالرحمن ,بالنسبه لتجربتنا الشخصيه هدينا بعيرين اماتها وابانها طيبه وهي عاديه وجابت انفسها وواحد من الربع هد بعير عادي وامه وابيه من الطراز الاول وانتاجه عادي مثله وعندنا مثل يقول اضرب بالفحل وتحل وهذه تجربه وليست قاعدة والله اعلم |
| الساعة الآن 02 : 09 PM بتوقيت مسقط |
Powered by vBulletin® Copyright ©2000 - 2025, Jelsoft Enterprises Ltd. Designed & TranZ By Almuhajir حماية ارشفة اشهار مؤسسة دعم فنى
جميع المشاركات المكتوبة تعبّر عن وجهة نظر كاتبها ... ولا تعبّر عن وجهة نظر إدارة المنتدى |
