السلام عليكم ورحمة الله وبركاته
يالمطاليق أنا شريت هذا الفحل من شهر تقريبا لتضريب إبلي بالرغم
إن معظمها مجاهيم غوريه وأبي رأيكم في شكل الفحل؟؟ وفي لونه؟
وراح أعطيكم نبذه عن نسبه وإنتاجه بعد مانشوف ردوكم
الرجاء عدم المجامله أبد لأن الرأي أمانه.......والصور بالمرفق
وتسلمون

http://www.mzayan.com/vb/attachment....9&d=1321650056


http://www.mzayan.com/vb/attachment....0&d=1321650088


http://www.mzayan.com/vb/attachment....1&d=1321650125

الاخوان تركي ,محيميد,بدر وسعود عسى الله يوفق هالوجيه ويرزقنا وإياكم
الفحل ذا هو معديان ولد غريبان بعير السكيني اللي شراه الامير سلطان بن عبدالعزيز الله يغفر له بسبعة مليون والفحل ذا له انتاج ماهوب واجد من ابل رديه بيع منها بخمسه وعشرين ألف
وأنا والله شريته لساسه وأبيه ان شاء الله يقلب الذود
والملاحظه المهمه هي لونه ناس يقولون أصهب وناس يقولون أصفر
ونوقي غوريات مجاهيم وماأدري ويش ممكن يطرح اللون والعلم بيد الله سبحانه
ولاهنتو عالمرور وننتظر بقيه المطاليق شرواكم

المشاركة الأصلية كتبت بواسطة مشعل الشويش (المشاركة 559383) البعير اصهـب .. سداته زينه وعظامه عظام المجهم اللي تبي والباقي ( صفر ) بدون مجاملـه .. .. ولكن الاصل هو العمـود فالقعـود . والبعير عموده انتاااااااااااااااجـه . كانك شفت انتاجه بعينك وجاز لك فهدّه واطلب الله التوفيـق . اما لونه فمـا اشوف فيه اي اشكاليـه . وسلامتك .

تسلم ياخوي يامشعل والله يبيض وجهك وأبشرك الفحل ساسه طيب وإنتاجه طيب
لكن ويش يعني سداته؟
وننتظر رأي بقية الإخوان الغالين بدون مجامله تكفون

المشاركة الأصلية كتبت بواسطة عبدالمحسن المقاطي (المشاركة 559797) انتبه لاتهده والله يرزقك بأفضل منه هذا بيدمر حلالك

أخوي الغالي عبدالمحسن الله يوفقك وتسلم على نصيحتك وإهتمامك وهذا يدل على طيب أصلك يالسنافي
لكن سؤالي حتى لو البعير من ساس طيب وإنتاجه طيب من إبل عاديه ماأهده؟؟؟ لأن توه عندي بعد ماضرب إلا ناقتين فقط
أرجوا التوضيح وأنا خوك وعسى الله لايخلينا من شورك وشوربقيه أعضاء المنتدى المطاليق شرواك ونرجو توضيح عذاريب الفحل ومميزاته إن وجد لأن الصور ظالمته واجد..لاتجاملوني لإن شوركم بأعمل به

المشاركة الأصلية كتبت بواسطة حاتم العماري (المشاركة 560383) اخوي مشبب الله يبارك لك في الفحل وانتاجه والفحل ماينشد عنه ولا عن شكله بعد شوف انتاجه وش نبي من الفحول غيرالانتاج مادامك مقتنع بانتاجه فهده ولايهمك تقبل تحياتي

المشاركة الأصلية كتبت بواسطة نواف العضياني (المشاركة 561478) يامشبب وأنا خوك مثل ماقال لك حاتم الفحل لاعاد تنشد عنه ولا عاد يهمك شكله دامك شفت إنتاجه تقديري ..

المشاركة الأصلية كتبت بواسطة محمد ابو عدوة (المشاركة 561488) مرحبا يابو شباب وانت تقول منتج و بيع انتاجه 25000 الف كانها عودت على ذي الاقيام مارحنا ديره :mwalat31: ولاينطمع في بداوته ذا الفحل شف لك غيره لان شكله دمارررررررررر . وهذي مشورة محب والله يوفقك دنيا واخرة .

تحب اللي يحبك وعسى الله يحبك ياخوي محمد
وعسى الله يقدرنا نجيب اللي أطلق منه
وأنا والله خذيت الساس ماهو البعير لشكله
وكلام راعيه إنه جاله بكار من إبل رديه بالحيل وبيعت بهذي القيمه وشفت له إنتاج حليو لكن والله ماعندي خبره أقيم كم تسوى بالسوق!!
وإبلي ماأبي أمدحها لكن قلت يمكن يتحسن إنتاجه عليها والرازق الله.
وشورك في محله والله يرزقنا وإياك بأطيب منه.

المشاركة الأصلية كتبت بواسطة ممدوح احمد الشريف (المشاركة 561491) اذا انتاج ابلك الحالي يباع بسعر بسيط ولا تقدر تحصل افضل من هالفحل يرفع الانتاج عندك فهده والله يرزقك ... واذا ان ابلك طيبات وانت تقدر تشري فحل افضل فترى البعير اللي انتاجه بـ 25 الف لا يعتبر منتج ... دبر فحل طيب لو تبيع من عيون ابلك

يا مشبب الله يرزقك باطيب منه
بعيرك حتى لو كان انتاجه فاخر بيجي انتاجه ارقابها عنج وهذا عيب في المطيه مهما كان زينها
هذا اللي يظهر من الصوره ويمكن الصورة ظالمته

المشاركة الأصلية كتبت بواسطة طلال العتيبي (المشاركة 563453) يا مشبب الله يرزقك باطيب منه بعيرك حتى لو كان انتاجه فاخر بيجي انتاجه ارقابها عنج وهذا عيب في المطيه مهما كان زينها هذا اللي يظهر من الصوره ويمكن الصورة ظالمته

هلا بك يابوشباب
طالما انك شريته وانت عارف ساسه وشايف انتاجه وجايز لك الإنتاج لا عاد تشاور احد جازت شخوصه والا ماجازت بلا مهونة لاحد
والشور والرأي في خاطري للي مابعد جا له إنتاج وودك تعرف نظرة أهل النظر فيه أو انتج عندك ولكن ودك تحكم على انتاجه بالشور هو معلي او مدلي
وخلاصة الكلام راعي الحلال اللي مامعه بعير منتج ولو قل في النظر زينه تراه شاقي وتعبان والله يعينه على المكدة
عسى الله يرزقنا وياكم وكل مسلم بالبعير المنتج المبروك اللي يعمر ابلك ومخباتك والزين ماهو بضروري في البعير لاصار انتاجه أزين منه عند اهل الصنف

المشاركة الأصلية كتبت بواسطة خالد العايذي (المشاركة 563945) هلا بك يابوشباب طالما انك شريته وانت عارف ساسه وشايف انتاجه وجايز لك الإنتاج لا عاد تشاور احد جازت شخوصه والا ماجازت بلا مهونة لاحد والشور والرأي في خاطري للي مابعد جا له إنتاج وودك تعرف نظرة أهل النظر فيه أو انتج عندك ولكن ودك تحكم على انتاجه بالشور هو معلي او مدلي وخلاصة الكلام راعي الحلال اللي مامعه بعير منتج ولو قل في النظر زينه تراه شاقي وتعبان والله يعينه على المكدة عسى الله يرزقنا وياكم وكل مسلم بالبعير المنتج المبروك اللي يعمر ابلك ومخباتك والزين ماهو بضروري في البعير لاصار انتاجه أزين منه عند اهل الصنف تحياتي للجميع

السلام عليكم ورحمة الله وبركاته

انا اقول في نضري ان البعير ذا طيب مهوب ردي لاكن ترا الصور ضالمته جدا

البعير ماشالله عليه نضير وجبر وجنبه وسيع وراسه عود

ويقول المثل هد في البل اصولها
والبعير ذاه ان كان علا غريبان السكيني فهو من ااصل البل ومعدنها

هده والله يمنحك منه

اسعد الله أوقاتكم بكل خير وعافية
ومبروك عليكم هالخير والله يجعله عطاء برضاء وان يجعله عون لنا على الطاعة

في زمنا هذا البعير المحسوب والمنتج صعب امتلاكه بليا حقران لاحد ولايجي بالساهل ماتجيبه الا الدراهم او التعب والجهد وشد وانزل والتلزي مع اهل الزمول الاجواد
وايضا يمكن يشتري راعي الحلال قعود محسوب ومعروف ساسه بهاك العدة من الدراهم يترجى الله فيه ولا يطرح الله فيه شيء ويجي انتاجه دون ثم يالله عود من جديد
ولو كل قعود يطرح على اصوله ونظرته وشخوصه ويجي على ظنون اهله ماصارت هالاسعار اللي تشوفون بهالملايين ولا شرى احد من احد وكلن كفاه انتاج بعيره ولا صار الزين يذكر مع بعض الناس
اسال الله التوفيق للجميع وانه يوفق كل من شقا وتعب ولايرجع تعبنا خسارة

المشاركة الأصلية كتبت بواسطة مسفر بن عيبد (المشاركة 564019) السلام عليكم ورحمة الله وبركاته انا اقول في نضري ان البعير ذا طيب مهوب ردي لاكن ترا الصور ضالمته جدا البعير ماشالله عليه نضير وجبر وجنبه وسيع وراسه عود ويقول المثل هد في البل اصولها والبعير ذاه ان كان علا غريبان السكيني فهو من ااصل البل ومعدنها هده والله يمنحك منه

المشاركة الأصلية كتبت بواسطة محمد ابن حبيب (المشاركة 564144) الاخ مشبب البعير مبروك ولاهو با الي يهد في الغوالي انكانك راعي غوالي ولاحتى راعي مقاني اتعب تكفى على الفحل الطيب الي يرفع مستوى البل مدام عندك هذا الحماس وسمع ويش يقول الشاعر مبارك بن حسين الهاجري يا الي دور للبكار المزايين **** اشتر فحل ولافخل البداوه ****لاتقعد اسنينك تجمع حياوين**** يكفيك في الخمسين خمس نقاوه **** تعجبك لامن شافة العين للعين*** وجا للمطنَخ في الملاعب حداوه **** لاجاتها اللجنه من ايسار ويمين**** قا مة تلذع ما دخلها رخاوه

الأخ الغالي محمد البعير شكله ماهوب شين وإنتاجه طيب بالحيل حتي من إبل أقل من عاديه رغم إن إنتاجه قليل لأنه كان عند راعيه الأول مظلوم بالهداد لكن راعيه قبل مايبيعه أضرب به 60 ناقه من نياقه الغوالي وإنتاجها بيكون بعد شهر من الآن وطلب راعيه الأول مني إني أزوره مع الإنتاج وأشوف إنتاج البعير من الإبل الطيبه بالرغم من أن البيع تم .وأنا لماشريته شفت إنتاجه وزان لي بالحيل والبعير ساس قوي وماأخذته إلا بتعب وأنا خوك لكن الرزق بيد الكريم سبحانه.
أسعدني مرورك وتسلم يالغالي

المشاركة الأصلية كتبت بواسطة عبدالعزيز المطيري (المشاركة 563557) ليتك ماهديته

المشاركة الأصلية كتبت بواسطة خالد العايذي (المشاركة 564195) اسعد الله أوقاتكم بكل خير وعافية ومبروك عليكم هالخير والله يجعله عطاء برضاء وان يجعله عون لنا على الطاعة في زمنا هذا البعير المحسوب والمنتج صعب امتلاكه بليا حقران لاحد ولايجي بالساهل ماتجيبه الا الدراهم او التعب والجهد وشد وانزل والتلزي مع اهل الزمول الاجواد وايضا يمكن يشتري راعي الحلال قعود محسوب ومعروف ساسه بهاك العدة من الدراهم يترجى الله فيه ولا يطرح الله فيه شيء ويجي انتاجه دون ثم يالله عود من جديد ولو كل قعود يطرح على اصوله ونظرته وشخوصه ويجي على ظنون اهله ماصارت هالاسعار اللي تشوفون بهالملايين ولا شرى احد من احد وكلن كفاه انتاج بعيره ولا صار الزين يذكر مع بعض الناس اسال الله التوفيق للجميع وانه يوفق كل من شقا وتعب ولايرجع تعبنا خسارة تحياتي للجميع