|
البعير الشرس السلام عليكم ورحمة الله وبعد اخواني ابغى الحل يوجد عندي بعير يجذع الشتاء انشاء الله ولكن عيبه الشراسه وعدم الانقياد حاولنا بالخبز باللمس بكل الطرق اذا اقتربنا من الابل اول من يستقبلنا ان حاولنا تبريكه او وضع العقال استخدم جميع الطرق يحاول ياكل او يخبط باليد او يرفس بارجله قبل امس اصيب بخف يده ونزف دم ولم نستطيع الاقتراب منه الا بطلوع الروح واحدمن العمال يرد راسه وواحد يعالج وواحد للطوارئ يعني يبغى ثلاثه رعاه وبصراحه القعود تحز فى نفسي ان ابيعه فارجوكم ثم ارجوكم شوفوا لي حل سريع املي فى الله ثم الشباب فى هذا المنتدى |
هلا ياعبدالله الله يبارك لك فيه ويثبته انشاء الله . سألت لك احد المختصين واجابني : اولا : يعزل البعير في شبك مرتفع من المواصير القويه والمرتفعه . ثانيا : يجوع ولا يعطى الا من فوق الشبك لمده يوم الى يومين ثالثا : يلف راسه بخيشه ويحاولون الرعيان يمسحون عليه ويلقمونه خبز . رابعا : انتبهو من ضربه بعصا او سوط لأنه سوف ينتقم شديد الانتقام . وسلامتك هذا ما اتاني |
أسأل الله ان يحفظك ويبارك لك فى عمرك مشكووووووووووووور وظني فى محله فيك والاخوان من غدا انشاء الله انفذ الوصيه بس كيف يلف بالخيشه وكيف ياكل بالتلقيم او رمي الاكل عنده بعد يومين وكم تبقى الخيشه فى راسه ودمت يالغالي |
الخيشه تغطي وجهه فيها ولا يطلع منها الي فمه وبالنسبه للتلقيم البعير يشم الأكل اما تعطيه خبز او حشايش باليد ================================================== ===== هذا الغلط يقع فيه كثير من الناس ان لا يعلم القعود من الصغر على القيد والهجار ويخليه لغيات ما يجذع وتالي يبي يعلمه ما ينفع القعود تقمعه من صغره من سن حق تربطه وتقيده بقيد صغير مدة من الزمن لغايت ما يطيح راسه .. اما القعود الجذع الي عندك انا انصحك انك تربطه وتقيده وتصغر القيد حيل عليه بطريقة ان مشيه يتغبط فيه ومع الوقت تهجره والهجار تصغره له وان لف راسه ماله الي الضرب لغيات ما يخاف من ردة الراس ومع الوقت يتعود لانه في عمر كبير الحلين وان هاج تبي تكبر مشكلته |
وعليكم السلام أخي عبدالله كلام الأخوان وافي وكافي حبيت أسألك عن القعود وش أصله وياليت تزودنا بصور له |
مشكورين جميعا لكم مني كل تقدير واحترام |
وعليكم السلام أخي عبدالله كلام الأخوان وافي وكافي |
الأخ عبدالله الراجي انا اتفق مع كلام الأخ محمد بن شرية المطيري أنا عندي بعير مع البل والعامل عندي ضعيف البنية ولايقدر يضربه قوة وإذا ساقه مرة يمشي ومرة مايمشي حسب مزاجه وبدأ يرد راسه علينا مع الوقت وفي يوم من الأيام أرادا أخي ان يسوقه فبدأ يحاول أن ياكله فخذا أخي له عصى مرنه والبعير مقيد وبدأ بضربه ضرباً شديداً على الرقبة حتى رغى وهرب وبعدها صار يخيف من أخي أشد الخوف ولكن العامل خوفه منه قليل ولكن تحسن وضعه كثير والبعير اذكي من ابن آدم إذا شافك ضعيف الشخصية يبدأ يهم فيك لكن وره العين الحمراء وصي العمال بذلك حتى البعير يتعدل وعليك بالهجار والقيد وتقبل خالص تحياتي،،، |
الربع كفو الله يسلمهم ويسلمك |
البدو عادة يعلمون او بمعنى اصح يعسفون القعود اللي يبون يفحلونه يربطونه ويعلمونه على القيد وعلى القيراد وبعضهم يعلمونه على الخطام وانا من المؤيدين للعسافه على الخطام ويبدون معه من وهو مفرود او حق وفي هذا السن سهل ان تقدر تعلمه كل شي ولا منه خطر والخطام عشان مستقبلا اذا كبر وسار فحل البل وبغيت توديه مكان ولا تعالجه تقدر تسيطر عليه ول كنت لوحدك وقعودك حل مشكلته هو ربطه وعسافته ولو ما تهده الا بعد ما يستطيع ويهدا ويقارد وسلامتك والله يبارك فيه وفي اماته |
انا اتفق مع كلام الأخ محمد بن شرية المطيري |
اتبع مشورة الاخ حمد السحيمي فهي الانسب للقعود في هذا السن ومجربه وبأذن الله مظمونه |
ياخوي اسهل طريقه هي انك تقيده وتربطه قريب من مكان العمال حيث انهم يمرونه كل ماطلعوا وعودو إلين يهون مافي راسه وياخذ على العمال ويعلمونه على الخبز من يد العامل. |
انا مع الاخ راشد العرق |
مشكورين جميع واسأل الله ان يحفظكم جميعا |
والله يحقق ما رجا الراجي |
تسلم ياسطام ويسلم الجميع |
انا عندي قعود شهر واحد الجاي يلاقي والقعوود عبث مره يتوطى وسط الحيضاان ويقلب المعالف ويدخل راسه من بين الشبوك وفيها شايك ومرات اشوف فيه نقط حمر جروح بسيطه من الشايك . وكان يومه صغير بدون قيد لاكنه طلع عبث واذا قربت منه يقرب راسه وشوي يفتح فمه ماادري مثل اللي يمزح معك واذا دخلت عندك وسط الشبك بالقيد يمشي وراي ويقرب راسه مني واذا جيت اقرد له واختبره ابي اشوف وش يبي مني يحاول اني اغفل عنه يفتح فمه بعدين ارفع العصى واضربه واذا ضربته يسكر عيونه ويرفع راسه فوقك ولا يرجع .وهذا طبعه والله يعين ماادرري وش اسوي له . ان جيت اربطه ينزل راسه علي . ولاكن اذا بغيت اقيده اسوي معه طريقه اخليه لين يجوع يوم واحد اقطع الاكل عنه والثاني احط لك شعيرر واقيده ماهو يمي لاكن اذا كان شبعان ماحتى تدخل في شبكه . ندمت اني خربت طبعه من يومه انه صغير مخليه على راحته والحين الله يعين . كني اذنبت فيه بالضرب قبل امس وكنه طاع شي بسيط |
لاتضرب الجمل ابدا يأخ ماجد ولكن حاول مثل ماعلموني الاخوان جزاهم الله خير انا ربطته في شبك لحاله وجوعته لمدة يومين واترك العامل يعطيه خبز تلقيم وانا امسح على اكتافه وتحت سنامه وامسح على ايديه حتى اقترب من الخف حوالي ثلاث مرات فى اليوم لازم يكون مقيد اقل شي مدة شهر حتى يتعود الحمد لله الان الجمل هدأ كثير بفضل الله ثم تعاون الشباب |
مساكم الله بالخير يا عبدالله الشباب كفو ووفو جرب الضرب له لعه يخاف ويهداااا بس اذا ما طاع معاك الله لا يهينك بيعه قصاب هو الحل الوحيد له حتى ما تبيعه لواحد يروح يذبح الرجال ويصير في ذمتك اذا ما تعلمه تحياتي للجميع |
هلا اخوي عيد ومشكور ولكن ابشرك تعدل حال البعير بفضل الله ثم تعاون الشباب وتراني ماني بساخي ابيعه من اول حيث انه عزيز ولكن الحمد لله اعتدل |
الاخوان كفو وفو |
| الساعة الآن 01 : 07 AM بتوقيت مسقط |
Powered by vBulletin® Copyright ©2000 - 2025, Jelsoft Enterprises Ltd. Designed & TranZ By Almuhajir حماية ارشفة اشهار مؤسسة دعم فنى
جميع المشاركات المكتوبة تعبّر عن وجهة نظر كاتبها ... ولا تعبّر عن وجهة نظر إدارة المنتدى |