|
هل هي معشر؟ السلام عليكم ورحمة الله وبركاته,,, يكثر السؤال هاليومين عن العشار وثباته وعن الكسار واسبابه , الله يوفقنا والمسلمين ويبارك لنا ولهم ولا يضيع جهد من تعب... وعلى الطاري عندي ناقة عشرت العام في شهر3 وشلتها عندي بعد شهرين وشوالها على قعودي( لقي) خفيف واضربها القعود غصب في شهر خمسة ولا لاحظت عليها شي من علامات العشار لين شهر عشره بعدها صارت تشول وتوزر وتركز راسها ولا تنحاش من البعير واستمرت الى الآن كل علامات اللقاح فيها ولكن ما نزل بطنها ولا ديدها ولا بين فيها درار والناقة سمين فهل هي معشش .... واذا كانت معشش ليش تهدأ عند البعير ولا تنحاش وليش ما ترغي ولا تهدر.......... وان كانت لقحة ليش الى الآن مانزل بطنها ولا بين في ديدها وعندي سلمكم الله جذعة تهدر مجسر تبي الفحل أضربها البعير قبل عشرين يوم وتغير طبعها وقفت من الهدير ولا عاد جسرت ولا طلبت الفحل لكنها ما تشول ولا تبول فهل هي معشر مع انها ما تشول والا وش بالظبط . افيدوني جزاكم الله خير لأن الموسم مثل ما تعرفون قربت نهايته |
الله يمنحك منها جميع والله ياخوي اتمنى من اخواننا في المنتدى الكتابة عن اللقاح والمشاكل هذي لانها تكررت كثير نرجو ان تطرح المشاكل لتطرح المحاولات والاجتهادات الناجحة فهي قد تنفعنا بعد الله كثير في امور اللقاح ولكم جزيل الشكر |
ويمنحك ياصدام.... جزاك الله خير على المرور والمشاركة السريعه |
السلام عليكم ورحمة الله وبركاته ابو عبداللطيف اسعد الله صباحك الحالتين اللي عندك اعتقد والله اعلم انها كلها ما فيها عشار وللتأكد ارجوا اتباع التالي : بالنسبه للناقه الاولى : 1) اذا كان مر عليها حسب ما فهمت منك 8 شهور تقريبا ولا بعد نزل بطنها فهذا اكبر دليل على ان ما فيها عشار فالناقه ينطلق بطنها من الشهر الرابع تقريبا حيث يكون الحوار تخلق كامل وبداء في النمو 2) للزياده في التأكد انصحك بعمل فحص لها عن طريق ادخال اليد في مدمن الناقه وتحسس الحوار بالضغط براحة اليد على الاسفل وسوف تعرف ان كان بها حوار ام لا وذلك عندما تتحسس اعضائه الصلبه وهذه طريقة امنه ولا تفسد اللقاح ان كان بها وبذلك تقطع الشك باليقين اما فيما يختص بالجذعه : اعتقد والله اعلم انها خليه من العشار وكثير من البكار ما يعشر من اول ضربه حتى وان كانت مجسر اصبر عليها لين تجسر مره ثانيه فا الناقه السليمه تجسر كل 21 - 28 يوم مره انصحك بالانتظار واذا اضربتها المره القادمه وما عشرت انصحك في حينه ان تفتش عنها فهناك شيء يسميه الاطباء الشعبيين ( بالغطيه ) وبقطعه بأذن الله تعشر الناقه اامل اني افدتك والله يكتب لك ولنا الخير ويبارك لنا فيه وتقبلوا تحياتي |
وعليكم السلام ورحمة الله وبركاته,,,, حياك الله يابو خالد وجزاك الله خير على المشورةالطيبة وهداية الله ثم شورك يابوخالد سؤال آخر له صلة بالموضوع... هل تضريب البكرة وهي مايسرت يمنع يسرتها اربعين يوم |
هلا والله بابو عبداللطيف ضراب اي ناقه بكره او غيرها يمنع اليسره حسب ما نسمع اربعين يوم ولكن الاكيد هو : ان دورة التبويض تتم 21 - 28 يوم ونستدل عليها بوجود اليسره في المطيه بداية من اليوم 26 وعندما نتعدى على دورتها بالضراب بدون يسره فنحن نخلق نوع من الخلل الفسيولوجي بالدوره التناسليه للمطيه مما قد يلخبط الدوره ذاتها وغير معروف متى تنتظم مرة اخرى والذي نسمعه بانها تقارب من الاربعين يوم فانصح الجميع بالتضريب على يسره الله يكتب لك ولنا الخير ويرضنى به وتقبلوا تحياتي |
جزاك الله خير وبيض الله وجهك يابو خالد |
مداخله على الموضوع الناقة الميسر وشلون نعرفها هل من حياها به انتفاخ ارجو الافادة ؟ |
الاخ بدر السلام عليكم ورحمة الله وبركاته علامات اليسره كثير منها على سبيل المثال: - حياء الناقه منتفخ ومنفتح - الهدير - عض الحشو والنياق الثانيه - محاولة تضريب النياق وتبريكها كما يفعل الفحل تماما والاكيد هو ان الناقه تبرك للبعير من غير ما ترغي فالفحل هو اكثر من يكشف النياق المياسير وخصوصا عندما يكون سارح مع البل وتقبلوا تحياتي |
مساكم الله بالخير شخبااااااااركم يا رجال اللى يبي ناقته تلحقه بشكل صحيح وبدون اي مشاكل ضراب الابل الاطيب هو المربعانيه اضراب الابل ليس في كل وقت من اليوم الضراب الصحيح هو الصبح بدري او بعد المغرب مباشره اما للناقه الميسر بعد الضراب حاول انك تحط لها ملح في حياها من فوق حتى تكسر اليسره واذا مالقحة يتفش عنها بس مو البكره لان البكره نظيفه ولا يجوز الفتش عنها واذا حصلت صيد قصه اليوم وبكره ضربها وانشاء الله تلقح والامر سهل والناقه المعشر اذا جاه راعيه تشاول وتبول اذا ما عنده فحل واما الفحل هو اللى عنده الخبر اليقين خالص تحياتي اخوكم عيد العنزي |
يعطيك العافيه ياعيد العنزي كلامك كله عين الصواب لان البكره مايدخل عليها، مرحبا يابن شديد بالنسبه للعشرا احتمال 99% انها اللقحه على القعود اللي انت حطيتها معه والدليل ان القعود معاد تحرش في الناقه ولا عاد دوم عليها لنه يدري انها لقحه بعدين الناقه اللي قد استالدت مايبين لقاحها لين يقرب ولادها. |
حياالله الأخوان ومشكورين على المرور العطر |
| الساعة الآن 31 : 02 PM بتوقيت مسقط |
Powered by vBulletin® Copyright ©2000 - 2025, Jelsoft Enterprises Ltd. Designed & TranZ By Almuhajir حماية ارشفة اشهار مؤسسة دعم فنى
جميع المشاركات المكتوبة تعبّر عن وجهة نظر كاتبها ... ولا تعبّر عن وجهة نظر إدارة المنتدى |