|
سوال متى تعرف انك صاحب نظر؟ الاخوه الاعضاء السلام عليكم ورحمة الله سوال متى تعرف انك صاحب نظر؟ اقصد متى الوقت اللي تكون فيه صاحب نظر في الابل هل هو بطول المدة؟ او بالذكاء او فيه عوامل تساعد وانا ان شاء الله لي اجابه على السوال تحياتي المزحمي |
الأخ عبد الله السلام عليكم وحياك الله متى تعرف انك صاحب نظر فعلاً سؤال صعب الناقه اللى يقال عنها خيار هذى يقولون أهل الأبل أنها ناقة الخبل يعنى كل راعى إبل يعرفها ولا يبى لها خبره لأنها بين زينها وتجذبك بزينها . ولاكن النظر والخبره فى معرفة الوسط واللى اقل من الوسط = يعنى معرفة الناقه المتيممه اللى تصلح للأنتاج كذالك معرفة مستوى الحوار وهو ابو يوم إذا عرفت ذا الثنتين تصير راعى نظر اخوى عبدالله تقبل تحياتى |
تحيه علي التميمي الله لا يهينك على الرد وجزاك الله خير ولي تعليق بأذن الله تعالى تحياتي المزحمي |
الاخ عبد الله اعتقد ان النظرة ومعرفه الزين من الامور الصعبة جدا وتحتاج الى خبرة ومشاهدة واطلاع واسع على الابل كذالك اعتقد ان صاحب النظرة ينتابه شعور غريب عندما ينظر الى الزين بحيث انه ينجذب الية لاشعوريا وعند هذة المرحلة يكون صاحب نظرة لمعرفتة الزين بسرعه وبدون تطبيق مواصفات . مع العلم انه ليس كل صاحب ابل صاحب نظرة ولكن هى موهبه من الله عز وجل هذا من وجة نظرى الخاصه والخطاء والصواب جائز ومشكور يا اخ عبدالله على طرح هذا الموضوع الحساس وتحياتى |
تحيه ألاخ ابراهيم الجربا حياك الله واشكر لك المشاركه في الموضوع نعم مثل ما قلت (اعتقد ان النظرة ومعرفه الزين من الامور الصعبة جدا وتحتاج الى خبرة ومشاهدة واطلاع واسع على الابل ) أخي ابراهيم فيه مرحله اذا وصل لها راعى البل بأمكانه الحكم على الناقه من نظره وحده لا تتعدى ثواني اذكر لك حادثه اني كنت مره مع أحد اهل البل المشهورين جدا ومرينا على ابل شعل وشفنا ناقه شعلا مزيونه على السكه قلتله وش رايك بالناقه كان يلتفت ويكمل سيره يمكن ثواني ناظر فيها قلتله الناقه مزيونه هز راسه ومشى أخي كذلك الموهبه من الله سبحانه كما قلت لها دور واشكرك مرة ثانيه لردك الدقيق والجزل تحياتي المزحمي |
هلا يا عبدالله (((( سوال متى تعرف انك صاحب نظر؟ )))) الناقة التي لا يختلف على زينها اثنان ليست دليل على أنك صاحب نظر ولكن من ينقز عين الإبل اللي يتوهون فيها الرجال هو صاحب النظر وبانتظار تعليقك ورأيك أخوك |
تحيه الاخ خالد السبيعي متى تعرف الرجال صاحب نظر كل اليوم يقول انه يفهم وصاحب نظر في الابل حتى اني سمعت من واحد من الشباب يقول ان الشياب لايفهمون في الابل الله يسامحه والله اني زعلت من كلمته جدا قلتله اذا كان شيابنا لايفهمون اجل من اللي يفهم انت واشكالك اللي مايجون اباعرهم الا المغرب واذا صار فيه حر ولا عج جلس في بيته يناظر في الجو كان هو زين راح واذا الجو برد جدا جلس والله العظيم ان شيابنا الله يطول في عمارهم الخير البركه وهم اللي علمونا وفهمونا نعوذ بالله من الاعجاب بالراي الاخ خالد اولا انت جبت الاجابه وكذلك الاخوان ماقصرو تعرف انك صاحب نظر لا دخلت في الابل اظهرت ناقة الفردي يعني كما قلت ينقز عيونها واذا تبي تختبر شخص قله اظهري اطيب ناقه من الابل لان الاختيار بين الابل اصعب شي ويبين فيه راعي الابل زين هل يختار الناقه المزيونه بس ان سنامها متقدم ولا المزيونه اللي سيف لحيها ناقص ولا اللي وبرتها رديه ولكن مزيونه والله انه اصعب شي وكذلك كما قالو الاخوان معرفة الحوار اللي تو ولد كما ان معرفة الحيران اللي تو والده ما يعرفها الا واحد من الف واعرف شخص معرفه شخصيه من الرجال اللي يعرفون الحوار من يظهر من بطن امه وفيه ناس اهل ابل يقولون انهم مايحكمون على الحوار الا لين يكمل شهرين وكذلك معرفة سلالة الابل من حين يشوفها لان فيه بعض القبايل ساسهم معروف وكذلك معرفة البعارين المشهوره وكيف يكون انتاج البعارين من حيث المواصفات مثل بعير العزيزي وبعير هيف تمام وطرح كحيلان بعير ابن غصين عليه رحمة الله اللي اشتراه الشيخ عليان الطهيمي وصاحب النظر لابد ان يكون ذاكرته قويه يعني اذا شاف الناقه الطيبه ما ينساها ويذكرون سالفه عن احد اهل الابل المشهورين انه يسأل السوداني وين الناقه اللي شريناها من فلان الفلاني وكذلك يحكم على الابل جمله اقصد وقت المزاينات يرشح الفايز والمراكز اللي تليه وفيه اشياء كثيره ولكن لضيق الوقت نكملها لاحقا ولكم الشكر تحياتي المزحمي |
ومنكم نستفيد كل الشكر لكم |
تحيه نقا هشال كل التقدير لك ونسأل الله ان ينفعنا واياك تحياتي المزحمي |
مشكوووورين اخواني جدا جدا بس تعقيبا على كلام أخواني اللي ردوا ببعض الاجابات ترى النظره السريعه ماهيب زينه واذا رحت وجيت مره ثانيه تشوفها.. والمره الثالثه تبين وانا ماقلت في كلام الاخوان خاطئ لكن الافضل أن لاتستجل.. وصحيح انك بتشوف الناقه انها زينه ولا لابسرعه لكن اذا رحت وجيت بتلقى عيوب و((((اذا كريت النظر))) بتلقى عيوب خفيه تحياتي |
تحيه علي العتيبي لك كل الشكر التقدير المزحمي |
| الساعة الآن 47 : 09 AM بتوقيت مسقط |
Powered by vBulletin® Copyright ©2000 - 2025, Jelsoft Enterprises Ltd. Designed & TranZ By Almuhajir حماية ارشفة اشهار مؤسسة دعم فنى
جميع المشاركات المكتوبة تعبّر عن وجهة نظر كاتبها ... ولا تعبّر عن وجهة نظر إدارة المنتدى |