النواجم الداخليه
 

يالربع انا عندي ناقتين فيها نواجم تورم وماتنفقع واعتقد انها انفقعت داخل الجسم الناقه الاولى ماتت والثانيه مازالت وعطيناها بنسلين ومرهم حول النفاخ وخفت ومازالت تضلع من نحرها لان الورام في النحر اللي عنده معلومات تنفع لايبخل علينا خصوصا ان الناقه غاليه جدا ومسيومه بمليون في الصفري اللي فات.

ولكم جزيل الشكر.

مرحبا ياعلي ,


الناجمه اذا انفقعت داخل فان الناقه تموت على طول , اما اذا انفقعت برى فالناقه انشاء الله سالمه ,

بالنسبه للعلاج , اضافةً للبنسلين والمرهم , الثوم حطه لها باللقوم , الطريقه مجربه من اكثر من شخص , ونفعت ولله الحمد ,


وتفداك اللي ماتت , وانشاء الله ان الثانيه ماعليها شر ,

مرحبا
ما ادري عندي هالحالة ولا أعلم هل هذا موسم لها ؟

النواجم مشكلة ويبدو لي انها من زيادة البروتينات في الجسم

بسبب زيادة الاعلاف المركزة وخاصة الشعير والمكعبات

وهذي وجهة نظر شخصية وليست طبية

فداكم ياعلي اللي ماتت

وانا عندي تجربة موفقة مع النواجم وصفها لي عيد المنصوري

وجربتها في بكرة باعها راعيها بسبب النواجم وشفيت باذن الله وهي :

1-حاول انك تفتح الناجمة باستخدام مشرط جراحي او حتى موس حلاقة فتحة صغيرة بطول 2 سم تقريباً

2-اعصر الناجمة حتى يخرج كل مابها

3-اغسل الجرح من الداخل بماء اوكسجين مخلوط بمادة اليود حتى يخرج دم

4-احش الجرح من الداخل بشاش طبي منقوع في نفس المادة

5- كرر العملية لمة 3 ايام

السلام عليكم ورحمة الله وبركاته

انا اوافق اخوي مبارك في الطريقة اللي ذكرها وهي بإذن الله نافعة ومجدية مع مراعاة تعقيم الأداة المستخدمة والمكان المراد علاجة قبل فتح الجرح .

بالتوفيق

لاهنت يانايف والثوم انا معك ولكن مانفع مع الناقه اللي ماتت لاني استخدمته فوق الشهر ةولافاد.

حياك الله ولاهنت على المرور.

صدقت يابومحمد والمكعب له دور كبير.

يفداك من شناك بس المشكله اذا صارت الناجمه مالها راس علشان تفتحها تلقى النحر ينتفخ كله ومافيه طريق للمشرط.

لاهنت ياعبدالعزيز على النصيحه.

علي

علمنا عن الناقة اربه زال الخطر عنها

الله يخلف اللي ماتت بابرك منها ويشفي الثانيه
بالنسبه للنواجم كانت عندي العام في البل واجد وعجزت فيها وكنت اطعم بالمكعب
وقطعته وحولت على الشعير وفارقتها النواجم لكن طاحت في الدمن وانتو بكرامه
وعقب رديتها للمكعب واشوفها عودت عليها وشكلي باكبه واعطيها شوار وقت
فناقتك اول شي اقطع عليها المكعب واذا انت حول الحسا مر على الدكتور اشرف يعطيك لها ابر توقف افراز هذي الماده من الجسم وترا الناقه بتستدق عقبها لكن بتنشف من الخراج
وجعلها ما تشوف شر ولا حلال المسلمين

يامرحبا يامبارك ولاهنت على الاهتمام والناقه والله لاسلمت ولكنها انشاءالله ماعليها خطر تشرب اللبن شروب زين ورعيها زين وضربناها بابره oxycomplex وحنا وياها تحت الله.

حياك الله ياحمد والناقه لها ثلاث شهور ماذاقت العلف.