رضى بن طارف الشمري - البـل هلـه راحـو ووقتـه تغيّـر
 

هذه القصيدة للشاعر رضى بن طارف الشمري وفيها يصف حال الابل وحال البدو حاليا وسابقاً[poet font="Simplified Arabic,4,darkred,bold,normal" bkcolor="transparent" bkimage="" border="none,4,gray" type=0 line=200% align=center use=ex length=0 char="" num="0,black" filter=""]
قال الذي فـي دفتـر الجيـل ذكّـر=جنّـك بنـات الفكـر يا قلـب ناجـه
مـن فايـلٍ مهـي تقاليـد وصـور=من كهرب العسرات صيغة الحاجـه
ولا هيضـن حـب الغناديـر يعمـر=عنهن خلوج القلب هـوّن اخلاجـه
أسباب ما حرك علي هاجـسٍ ضـر=أثّر على جسمي بـه الـروح لاجـه
شفنـا بهالدنيـا غيـارات وعْبَـر=سفن الصحاري نزل الوقـت تاجـه
تلـوج بشبـوك المهونـه وتقهـر=وتزعج حنين والطنى فـي حجاجـه
وبعيونهـا لعيـون مـولاه تنـظـر=وتطلب من الرب الكريـم انفراجـه
وليا بغت دربٍ عـن الـدرب تقهـر=تلوج وسط الشبـك مثـل الدجاجـه
ومن الطنا عبـرات صـدره تكسّـر=هـذا سبايـب علتـه وانحـراجـه
تبكي على وقتٍ مضالـه مـع البـر=ترعى ويرعونه اسبـاع الزراجـه
بدوٍ علـى قفـر المراعـي تغـاور=ما جيبله مـن كـل صنـفٍ خواجـه
واليـوم كـلٍ مـن حلالـه تخسّـر=لو يجلبـه محـدٍ يجيـه الحراجـه
يا حيف ياعز العـرب زينـة الـدر=متروكةٍ لـو كـان تركـه سماجـه
من عقب ما نرعـاه بالبـرد والحـر=وكـلٍ يسـوي للرحـول الحداجـه
اليوم بعض النـاس عنهـا توخّـر=مدري ردى ولاّ صحيـح احتجاجـه
البـل هلـه راحـو ووقتـه تغيّـر=اللّي هفى واللي طبـع فيـه ساجـه
وياما غـزو يمّـه ابقـوم تجاكـر=يوم الزمان اللّي يخيـف ارتجاجـه
فوق الركاب اللّي له القـاع تهجـر=يتـلٍ عجيـدٍ ديـرة القـوم باجـه
وعقب المسير اللّي به الهجن تفتـر=الخيل حَفيَـت والمساميـر ساجـه
خذو صقـور القـوم جدامهـم فـر=شافوا هل البل يوم وصلـو مداجـه
جابو خبـر طرشـه عزيـبٍ تذيّـر=الخيـل دونـه بالمناعيـر راجــه
وقال العقيـد بلابتـه يـوم عمّـر=غيرو على البل والسعـد بالمواجـه
تواجهوا عنـده علـى قـرّحٍ غـر=مثل الجمال اللّي علـى اول اهياجـه
وردن وقفـن بالمناعيـر صــدّر=وغدالهـم عنـد التوالـي لجـاجـه
وكلٍ على حـوض المنايـا تحضّـر=اسباعٍ تسن اضروسها يوم صاجـه
ونـار الحرايـق ولعوهـا وصبّـر=واللّي دنـى يومـه منايـاه راجـه
وصار الفخر لهل الفخر ساعة الشر=وبنت الردي محدٍ يجيـه الزواجـه
ياتي ولدهـا تبـع ولوماكـره حـر=ماينطـح الشـدات عقـل وزجاجـه
وذكرٍ ذكرته يافتـى الجـود يخبـر=والما قـراح وبيـن مـن هماجـه
واليوم شفنا قاصـر البـوع يزمـر=اللّي من اول يعطـي النـاس باجـه
من فضـل حكـام الجزيـره تحـرر=ويجاكـر العالـم ابـوارد كـراجـه
وان قلتله وشلـون كيفـك ليا مـر؟=يقولـك كيفـي تغـيّـر مـزاجـه
ويطـول شرحـه لوتطرقـت لنمـر=محصي ثمر تاريـخ طـي وخفاجـه
مير يالله من اول يبعث القاع من غر=بـرق ويشـوف امخيّلـه بلتعاجـه
بامر الولـي ينشـد ومزنـه تزبّـر=ويسقي ديارٍ تشتكي مـن عجاجـه
حتى خشاش القـاع فيهـا تدهـور=ارضٍ مريضه والمطـر هواعلاجـه
عمارهـن اول بمـزونـه تـزبّـر=يملى الفياض وما ضمى منه باجـه
وعسى الحيا بديار الاجـواد يكثـر=وجميع روضٍ يمتلـي مـن نتاجـه
وديارنـا مـن خيـر ربـي تعطّـر=ويزهـي نواويـر البخـت ليفاجـه
ونرتـاح والشطـة احبالـه تبـتّـر=ويطيب كيف البدوعقـب انزعاجـه
وتمـت بذكـر الالـه العبـد يذكـر=فرد صمـد مالـه شريـكٍ بحاجـه
سامع دبيب النمـل بالليـل الاسمـر=ربٍ نولـع سرجنـا مـن سراجـه
وختم الكـلام ازكـى صـلاةٍ تكـرر=على شفيع الخلـق يـوم المواجـه
[/poet]

بدوٍ على قفـر المراعـي تغـاورما جيبله من كل صنـفٍ خواجـه
واليوم كـلٍ مـن حلالـه تخسّـرلو يجلبـه محـدٍ يجيـه الحراجـه
يا حيف ياعز العـرب زينـة الـدرمتروكةٍ لو كـان تركـه سماجـه
من عقب ما نرعاه بالبـرد والحـروكلٍ يسـوي للرحـول الحداجـه




اررررحب يابوعبدالله


حيه وحي ماجابه


صح الله لسان القايل


وتسلم يد الناقل




وعزالله انه ماكذب قايلها تغير وقت البداوه ..




لاهنت طال عمرك


اخوك .., فهد

والبقا يا ابن صلبوخ

شيء طبيعي كل حلٍ يستحي من حله

ولكن لله الحمد البداوة اليوم أسهل بكثير مما كانت عليه

في أوقات أسلافنا عليهم رحمة الله

لاهنت على حضورك الكريم طال عمرك

ولك خالص التحايا

أخوك

الاخ خالد السبيعي
لاهنت على الاختيار
قصيده رائعه
للشاعر رضا طارف الشمري
والحمد لله على الحضاره فحياة البداوه صعبه وقاسيه
للجميع تحياتي

الاخ محمد آل ضريره

صدقت طال عمرك على الطاعة

شكرا لحضورك الكريم

ولك خالص التحايا

أخوك

صح لسانك ياخالد


وماتجيب الا سمين


والشبك في وقتنا هذا الحريص واللي يحب

ابلة يحفظها في الشبك من شر السيارات

(القريبة من الخطوط)

الاخ هلال الشيباني

صدقت طال عمرك

ولكن لمذا لا يبتعد عن الطرق والسيارات

ارض الله واسعة

شكرا لحضورك الكريم

ولك خالص التحايا

أخوك

المشكلة اكثر منطقة او اوسع منطقة تقريبا شمال المملكة

وباقي المناطق ان ماردك شبوك الاراضي المملوكة (في الخلاء)؟؟؟؟


او المزارع اللي بعضهم يدخل الابل او الغنم في الحوش

في غياب صاحب الحلال وضعف الراعي او الا مبالاة ويجيب البلدية وابدا الحراج

والدوامات والمصالح العامة تحكم الناس في اوقاتها

والابل ان نوت الدرب 80ك

وانت اهل العارفين

ايضا صدقت يا هلال

فالمزارع وشبوك المحميات الخاصة والغير مرخصة

أكلت اليابس والاخضر

تحياااااااااتي لك

مشكووور اخوي على الافادة

مشاركه رائعه من استاذ رائع

وصح لسان الشاعر

تحياتي

تلـوج بشبـوك المهونـه وتقهـرoooوتزعج حنين والطنى فـي حجاجـه

وبعيونهـا لعيـون مـولاه تنظـرoooوتطلب من الرب الكريـم انفراجـه

ابو عبالله الله لايهينك على النقل الرايع لقصيده تحكي حال

البداوه في وقتنا الحالي فصح الله السان شاعرها رضى بن طارف الشمري

تحياتي ,,

يا هلا وكل الغلا يا زاهر

كل الشكر لمرورك يا غالي

ودمت بود

أخوك

يا هلا وكل الغلا يا جاسم

كل الشكر لمرورك يا غالي

ودمت بود

أخوك

ومشكوووووووور يابو عبدالله

على القصيده الطيبه

وصح لسان الشاعر رضى الشمري

مغليك

مشعل اليامي