شاان حال الخلفة
 

انا عندي خلفة شان حالها وظعفت وماعاد تاكل من بعد ماكانت سمينة وأكولة مدري وش جاها حتى حركتها ماعادت مثل الاول تتحرك
وهو ماهو بودها وكانت لا حلبتها يظهر دم فاخر الحلب ودهنتها بزيت زيتون ووقف الدم يومين وذلحين قام يجي مرات ماهوب دوم والدم يكون في اخر الحلب
افزعوولي يالربع

هذا الصيف والحليب يسوي كذا حاول انك ما تترك حوارها تحتها على طول في الصيف فكه عليها من فترة الى فترة وشملها ودائما الخلفة تضعف مع الحليب

اعطها حبوب دود مركزه
والطريقة أنك تعطيها 2 حبتين مركزه بعد طحنها ووضعها في لقمه
وبعد سبعة أيام أعطها طال عمرك 1 حبه واحدة وبعد بسبعة أيام أعطها 2 حبتين
وتكرر عليها الكورس بعد ما تتركها تريح 7 سبعة أيام وتعيد عليها نفس الطريقة
وخلال فترة الراحة أعطها أبرة جرب (ديكتوماكس) البرازيلية 15 سم وبعدها بـ 14 يوم أعطها جرعة ثانية 15 سم
بالنسبة للحبوب يجب إعطاء الناقة على جوع من خلال اللقوم
وبالنسبة لإبرة الجرب يفضل إعطائها قبل مغيب الشمس وخصوصاً في هذه الأيام

بالإضافة إلى اعطائها إبرة هيام علما بأنه لا يوجد أي تعارض بين حبوب الدود وإبرة الجرب وإبرة اليهام
وعليك بالفرنسيه .. مفعلوها جداً طيب واسمها .. (سيميلرسان)

وأكرهما بالبرسيم وبإذن الله راح تشوف التغيير في غضون شهر إلى شهر ونصف

بالتوفيق يا غالي

بيض الله وجيهكم يالربع ماقصرتوا

حيالله ولد العم الاخ فهد ماقصر الوصفه اللي وصفها مجربه وطمنى على الخلفه بعد العلاج لاهنت