البارحه حلّق بـي الهـمّ تحليـق = لين اعلن الصبح السعيد انفلاقـه
اسجّ واغفا واسرح شوّي وآفيـق = واروق لوماني بصـوب الرواقـه
وأن جيت ابكشف ماتكنّ المعاليـق = تحكمني سلـوم العـرب واللباقـه
ومن ضيقتي سقت القدم للشواهيق = في مرقبٍ مانيـب افضّـل افراقـه
ارتاح له لامن حدا خاطري ضيـق = لاصار ماعندي على الصبر طاقـه
اسيّر المعنى .. واجرّ الطواريـق = واليا عصا الطاروق اشدّد وثاقـه
واسجّ فرياض النفـل والزماليـق = واقطف من أزهار البساتين باقـه
وانقا من اصناف الذهب فالصناديق = مايبهر الشـاري ويغـري مذاقـه
جواهرٍ .. تشفق عليها العشاشيق = اللي يعَشقـون الفرايـد اعشاقـه
(الطيب كايد والمراجـل توافيـق) = يحريبها اللي يمّهـا حـثّ ساقـه
اللي يفـز اليـا لفـوه المطاليـق = وشوف الرجال الطيّبيـن اشتياقـه
درب المراجل عسر وينشّف الريق = على الرديّ اللي علومـه ادقاقـه
اللي ليا طال المدا قال / ما اطيـق = قلّـه / متبـرك للثقيـلات ناقـه
ياقلّ صدقان الرخا حـزّة الضيـق = فالماقف اللي به تبيـن الصداقـه
فيه الحرار الشقر تصبح غرانيـق = ويبيّـن الهـافـي رداه ونفـاقـه
وياقف لها اللي يحتمون المواثيـق = اهـل الحميّـا والوفـا والعراقـه
الله خلق .. والله فرق فالمخاليـق = وبين الردى والطيب مابه علاقـه
ابديت ماكنّيـت وسـط المعاليـق = واخفيت ماتملـي علـيّ الرفاقـه
وتبقى صناديق الضماير مغاليـق = ماتكشف اسدود الرجـال الحماقـه

المشاركة الأصلية كتبت بواسطة هاجد بن صنيدح السبيعي (المشاركة 175490) صح لسان راكان ولاهنت

المشاركة الأصلية كتبت بواسطة نواف الرافد (المشاركة 175565) صح لسان راكان ولاهنت

المشاركة الأصلية كتبت بواسطة محمد صالح المري (المشاركة 175571) صح لسان راكان لاهنت

المشاركة الأصلية كتبت بواسطة فهد ال زبدان (المشاركة 175591) صح الله لسان الشاعر راكان على القصيده الجزله ولاهنت يابدن على الطرح

المشاركة الأصلية كتبت بواسطة صنهات الدوسري (المشاركة 175618) صح السان الشاعر ولا هنت على النقل

وياقف لها اللي يحتمون المواثيق = اهل الحميّـا والوفـا والعراقـه
الله خلق .. والله فرق فالمخاليق = وبين الردى والطيب مابه علاقه