قالوا علام اللون جاء فيه تغيير=وجاء فيه من وسم البداوة علامات
مالك ومال اللي يبون المخاسير=ضيّعت مالك بين روحة وجيات
خلك مع الأسهم وصندوق توفير=والبل تغيّرها بشيك وبطاقات
خفّف مصاريفك على أقل تسعير=وإحسب مصاريف الشهر بالنهايات
قلت البداوة وسمها عز .. تقدير=هي كارنا واشموخنا والشعارات
فيها دروس الصبر والطيب والخير=وفيها دروس المرجلة والكرامات
بدوٍ خلقنا الله وفينا صعاطير=نرقى المعالي نحتمي عزة الذات
نكرم سبال الضيف حشمه وتقدير=وخوينا والجار يلقى المسرات
بدوٍ نخيل المزن في صبح وعصير=وهاذي لك الله وحدها رفع هامات
والبل خلقها الله بحكمة وتصوير=ولها معزة من عصور البدايات
فيها انتخا عنتر وابو زيد والزير=ومن شانها قامت معارك وغارات
واليوم ما نسمع نصايحك يا مشير=وعلمك ما والله هز ليه قرارات
هاذي نياقي دقها والمعاشير=ولي فاطرٍ تسوى كنوز وعمارات
ينساح بالي ما يجي فيه تعكير=لاجيت قدم الذود أغني بشيلات
ولي لابةٍ بالطيب فوق المعايير=سبيع الكرم والجود أهل المروات
ولي شايبٍ قد قيل ريف الخطاطير=الصيت يبقى كان راعيه قد مات
وأنا شريت الطيب خوّة مناعير=أتبع خطاوي شايبي والوصيات
ولاني بمن يلهث لجمع الدنانير=اللي عن الواجب يجي فيه صدات
اللي يحوص إن شاف خطو المسايير=وإن جاء يسوق المال جاء فيه رعدات
عذر البخيل النهي عن كل تبذير=يحرص على السنة في ذالعلم بالذات
ورزقي على اللي يرزق الذر والطير=الرزق بيدينه ولا فيه شكات

المشاركة الأصلية كتبت بواسطة مشعل اليامي صح لساااااااااااانك يا خالد السبيعي والله قصيدة زينه بالحيل تقبل تحياتي اخوك مشعل اليامي

المشاركة الأصلية كتبت بواسطة مسعود العماري صح لسانك خالد السبيعي على القصيدة الرائعة وفي انتظار المزيد من الجديد