قلبي مع نيله تشقوى بمسراح = متشقوي مع كل ملحى زهوقي
كن صوت نيله بيضة محها طاح = تلعب بها نود الهبايب طروقي
يازينها لاجات من عقب طياح= قد هي أدغلف ذا وذا بالنشوقي
كن ديدها من بين الاثفان مصباح = وحليبها احلى مايدب الحلوقي
والأذنين شرف من على القحز طفاح = ومهادلها كنها حذايا الطروقي
لها على الفرغ المصالي تمياح = ينثر عليها من وسيع الشدوقي
يامن بها الجذاب من صوب مياح = بقوايم فوق الربايع وثوقي
وجنوبها من كادر الجم طفاح = شرابه ماهي بغما ندوقي
يازينها تبرا لدواه مصلاح = الى أفرقت بين الشعب والفروقي
تبرا لها مبرية الساق شلواح = قبا قحوص للطرايد لحوقي
لاشيف شوف من ورى الجو منزاح = لاهي على حبل السبيلي نتوقي
كن طمرها لا طنب النشر بصياح = طمر الوعل في صفح صفيا صلوقي
وكن نبثها سبع تنوى بمرواح = قد هو على حد الرعايا يتوقي
ابرها ماني عليها بشحاح = والدر مشنوط لها بالعلوقي
ابغي الى من جا نهار التصياح = وتشابروا في جو جردا ملوقي
اردها عزر على روس الأرماح = بمسلهب من ناحلات العروقي
فاليى أنزعج منه أحمر الدم فياح = من حربة كنها لسان السلوقي
معاد هي عقب التويجاه بصحاح = متقابلات كن جهمها حروقي
الى أجتمع سر وبر وصلاح = وحظ من الله يوم جات الفوقي
عينت فعل الرجل يكفيك لمداح = يمضي الى ضاعت وساع الحلوقي
والمرجله ماهي تغلق بمفتاح = والنذل ماله في المراجل حقوقي