|
طلب شرح اسرار تجارة الابل السلام عليكم ورحمة الله وبركاته لايخفى على الجميع ان لكل تجارة اسرار وهذا المنتدى من اشهر المنتديات المعروفة المهتمه في الابل وشؤنها وحقيقة انا وغير من الشباب وده يدخل في تجارة الابل لاكن الي تلقاه خايف مثلي او ماعنده خبره في البيع والشراء واسرار هذه التجارة طلبي من الاخوان اصحاب الخبرة وفظلا وليس امرا شرح اهم نقاط هذه التجارة . شباب البلد اولى من غيرهم في خيرات هذا البلد المبارك ملاحظه بسيطه ومعينه انشاء الله على سعة الرزق والبركة في الحلال والمال والصحة الصدقة ولو بشي يسير من الربح الاستغفار والاكثار منه صلة الرحم قيام الليل والصدق في البيع والشراء والنية الطيبة |
والنية الطيبة |
لازم تكون هاوي ونصيحه لاتدخل في الابل الا متعلم عشان لاتنغش مجالست ملاك الابل او حتى بالموقع هنا فيها اسفاده والذهاب للسوق بشكل دوري يعني كل شهر مره عشان للبل مواسم واعرف الناقه مو بس شكل هناك طبع في ابل ولف وفي قشره وفي منيحه وفي ماتحلب وتبرك تعلم نصيحتي جميع جوانب الابل لان الخلفه المنيحه ب15 الف وعسيره محد يبيها ولازم تحدد مراح الابل و وسيلة سقايتها والراعي و و بالعربي سو دراسة جدول |
انا ضد التجارة فى الابل الابل هوايه وعشق واذا شريتها بقصد التجارة فقط فتراك بتتعب وخصوصا اذا كنت عديم الخبرة انا والله لا ابحث عن التجارة فى الابل وهاذا راى شخصى لى انا فقط :: انا احب الابل واموت فيها واعشقها ولذلك تشوفنى مناقز وراها فى هالبران يوم اقعد فى المدينه يومين والله ان خاطرى يظيز وافقدها اذا كان لك خاطر فى حب الابل توكل على الله والله يعينك على الجهد والتعب ( وانا مع راى اخوى فلاح الرشيدى وبقوة ) |
تحيه وعليكم السلام ورحمة الله وبركاته الاخ صالح الحربي اسمع طال عمرك كل مجال تدخل فيه وانت غشيم تحمل اللي يجيك ماهو مجال الابل فقط يفترض اذا بغيت تدخل في مجال تجارة الابل لابد انك تدور لك رجال راعي نظر وراعي سوق وراعي ذمه وتعلم منه واحضر معه الاسواق ورح معه كل مكان هاذي احسن طريقه في نظري |
اقتباس:
وسلامتك |
يا رزاق ارزقني هناك سر في البيع والشراء لايدركه الا من جربه الدعاء التوكل على الله وتعلق قلبك بالله وترك الحسد وبذل الأسباب المهة اللبيع والشراء تخصص في شيء معين ثم انطلق للي بعده وراقب العرض والطلب توضيح بسيط بيع اللحم بالممارسة مع الزمن من يوم تشوف الحاشي تقدر وزنه ... الخلفة في اول الوقت أفضل لقلتها الناقة الهدية وبها حليب افضل من غيرها وهكذا أما المقاني والزين تعرف على مواصفات الزين فالبل ثم تعرف على مستوى السوق اللي عندك والزباين واحضر في الحراج والمزادات والعملية تراكمية وممارسة وتوفيق من الله ولا تنسى الاستخارة وموفق |
موضوع مهم ... بانتظار بقية الاراء وياليت تثبتون الموضوع لاهميته |
ما خبرنا وراها تجاره على طول السنين اللي هي معي الا كان المزاين منها وذا صعب نواله وعني انا ما اسميها الا الفقر المرغوب |
ان كانك تبي تعرف أسرار تجارة البل لازم تكون & مستمع & جيد تعرف اللي يدخلونه المدرسه ويكسب معرفه بدون شهاده خلك زيه وهاذي تحصلها 90/100 في اسواق البل في اي ديره قريبه منك حيث تجد حديثهم منحصر على البل فقط اللي جاتهم في السوق ويذكرون الطيب والردي والعذاريب اللي شافوها .. بعد حضورك للمجالس بتعرف أهل الذمه والنيه الطيبه لازمهم واستفد منهم وان كان من ربعك وكبار السن فيكون أفضل ولا تستعجل في الشراء نهائيآ طول بالك لو تآخذ لك سنه في الاسواق والمزاينات تروح وتجي بدون ماتشري حتى يكون عندك عرف ممتاز ومن يوم تشوف 100 ناقه تعرف ناقتك اللي تصلح لك منها وتعرف قيمتها شراء وبيع في نفس الوقت واذا حصلت اسوام قبلك أنت بنفسك تعرف السوم هاذا صحيح وحول المعقول ومناسب لك ولا حاصل في الدعوى تطفيف وتطبيل .... وهاذي بعضها قلبك دليلك فيها .... أحسن من أنك تجازف بالشراء وأنت ماعندك نظر ولا خبره ثم يبنشرون هل السوق بتوايرك اللي قدام ثم تلحقها اللي ورى :confused: وبعد ذلك تكره شي اسمه تجارة البل وتكون خسارتك مايرقعها مرقع ولا أخفيك ماكل بيضا شحمه بعد الربح بتصادف بعض الايام خساره ماتوقعتها ولاحسبت حسابها تآخذ منك التحويشه اللي أنت حوشتها على قولة المصاريه :eek: والأخوان اللي يقولون لازم يكون عندك هوايه الهوايه مالها علاقه في موضوعك ولاهوب لازم انك تحبها هاذي تنطبق على اللي يقني البل ويخسر عليها أكثر مما تعطيه وياكثرهم .. وأخيرآ الله يرزقك وجميع المسلمين الرزق الحلال |
مرحبا يا صالح الاخوان ما قصرو اهم شي و نصيحتي لك لا تحسد غيرك من الربح وراك ولا تتمسك في البيع و خل كلمة نصيبك على لسانك دائما ... و بعد كذا شف لك رجال راعي سوق و بيع و شرا لانه هو اللي يفيدك اكثر من بعد الله وتوفيقه ... راعي السوق يعرف يقيم النياق من النظره لها و بعد كذا يفتش على الناقه من ذيبه و قلب عصب و بديه و و و و و يعني خلك مركز معه في التفتيش اهم شي .. و شوف كيف يفتش و خل كل سوالفك عن العذاريب في البدايه حتى تعرفها و تتقنها ... وبعد كذا ادخل في البيع و الشرا بس على الخفيف من امهات 5 الى 10 حتى تتصرف من عندك بسرعه ولا تنشب بحلقك كثير و تطور تدريجي و مع الزمن بتصير تاجر ممتاز ... وخلك من الهوايه اهم شي طلب الرزق و السعي في العمل الصالح ... وربي يكتب لك التوفيق |
ان كنت صاحب نظر وتعرف سعر الناقه وهي بالشبك يحرجون عليها ............ ادخل بالنسبه لحالة البل عند الشراء ....... لا تشتري الا بشرط السلم والصحاح .. لان اعتى التجار يطوفهم اشياء لان بعض البيعات تكون والحراج شغال ........ والشرط يحميك ولا اترك |
انا مؤيد قوي لخواني / فلاح الرشيدي ... و ... / محمد بن صنهات |
رد: طلب شرح اسرار تجارة الابل بانتظار بقية الردود من اهل الخبرة |
رد: طلب شرح اسرار تجارة الابل انا اشوف الاخوان كفو ووفو وما قصروا .. الله يوفق الجميع .. |
| الساعة الآن 27 : 08 AM بتوقيت مسقط |
Powered by vBulletin® Copyright ©2000 - 2025, Jelsoft Enterprises Ltd. Designed & TranZ By Almuhajir حماية ارشفة اشهار مؤسسة دعم فنى
جميع المشاركات المكتوبة تعبّر عن وجهة نظر كاتبها ... ولا تعبّر عن وجهة نظر إدارة المنتدى |