الرجاء المساعدة من اهل الخبرة
 

اولا السلام عليكم ورحمة الله وبركاته ,,,,

مساءكم الله بالخير جميعاً ,,,

يا جماعة الخير عندي سؤال بسيط نبي نعرف عن مرض الهبوب ووش اعراضه ووش اعلاجه ؟

وايضاً مرض الهيام وش اعراضة ووش علاجة ؟

انا عندي ناقة كانت سبحان الله من اهدى نياقي وكانت حبوبه وهادية وهي خلفة فجاه صارت صعبه شوي اذا جيت امسح عليها ماتبيني امسح وذا جيت يمها تمشي ودائم اعلفها مع ولايفها عادي تاكل معهم من احسن مايكون والحين اشوفها تاكل مع النياق بس اذا وحده قامت عليها او تجي تمسح فيها تمشي مثل المفزوعه ولا ترجع تاكل مع النياق . مع انه اول عادي الي الاحض عليها الحين قل شرب الماء او تروح تبي تشرب ماء تنفزع كان شي فازعها ولا تشرب رغم ان مافيه شي خوفها الشي الثاني رغاها غريب كان فيه شي بحلقها . وصاني واحد من الجماعه اعطيها زيت سمسم وفعلا عطيتها زيت السمسم مع الماء ورحت الطبيب وقالي هذي هبووب وعطاني ابره وستخدمتها وعطيتها بعد ابرة ترسمين وشوفها تحسنت مشاءالله ورجعت مثل اول . ماادري كان التحسن من الزيت ولا من الابر

بس الحين اشوفها ماش ماهي عاجبتني تاكل مع النياق وتروح توقف مثل الي يفكر .

من رجولها امسح عليها عادي بس اذا جيت يم ارقبتها ويدينها ماتبيني امسح وترغي وتفزع

البارح ونا عندها اسمع وصوصه ببطنها وبعد حليبها قل.

بعد ذيلها ما تحركه يمين يسار احيان اشوفها تحركه يم ديسها

انا احب اقولكم الموضوع بالتفصيل

وش رايكم ابي الحل يعطيكم الله العافية

وعليكم السلام ورحمة الله وبركاته
اهل الخبرة محنا منهم
لكن الدعوة مشاركة
مرض الهبوب يفيدونك الاخوان عنه ماعندي فيه علم
الهيام اعراضه واجد منها الضمور - شحوب الوجه - عدم الشهيه وقلت الاكل - اسهال - نفوخ في المطيه -

بخصوص الجفال الي في ناقتك
غريب لايكون مضروبه من احد العمال..
رشها بعزايم وقيدها لحد ماتركد