نفاخ الكرش
 

السلام عليكم

ياخواني انا عندي بكرة جذعة كرشها ينتفخ فترة ثم يرجع طبيعي ويرجع ينتفح وعلى هالحال ودايمن تزوع اذا بذلت جهد يعني مثلن اذا درهمت او اذا انحاشت من الفحل تزوع وهي ظعيفة مررة واكلها طبيعي لكن عيت تسمن واظربها الفحل عدة مرات وعيت تلقح .... وش شوركم فيها الله يجزاكم خير؟؟ وهل تنصحون اني اوسمها عن النفاخ؟؟

أرحب يا بن العم

إن شاء الله ما عليها شر

أعطها طال عمرك
أبرة جرب 15 مل في اللحم .. وكرر الأبرة عليها بعد مرور 12 إلى 14 يوم
أنصح بإستخدام (( الدكتوماكس الزرقاء )) فهي جداً ممتازة


بعد ما تعطيها الجرعة الأولى من الجرب بيومين
ابدأ معها بكورس آخر على أن تكمل أبرة الجرب في وقتها
أعطها طال عمرك حبتين دود (( المركز )) بعد يومين من أعطائها أبرة الجرب
بعد مرور 7 أيام أعطها حبة دود واحدة
وبعد مرور 7 ايام أخرى أعطها حبتين دود

أتركها لمدة أسبوع أو عشرة ايام
وكرر عليها كورس حبوب الدود المركزة وبنفس الطريقة اللي شرحتها لك

وخلال شهر بإذن الله ستشاهد فرق كبير في الناقة

بالنسبة لزوعة الناقة من البعير هي خوف لا أكثر ولا أقل.
أما أنها ما عشرت فهذا يعود إلى أنك أضربتها وهي ما هيب ميسر

احتمال يكون فيه جسم غريب في الكرش مثل اكياس البلاستيك او انك تعطيها برسيم ناشف فهذا ايضا قد يسبب النفاخ

الله يشفيه و يبارك لك فيها

ياخوي ... جرب الثوم
استعمل التمر المطحون ..وحط داخله ثوم ... فص او فصين في اليوم ... والافضل انك تعزل الناقة من الليل عن الاكل وتعطيها التمر مع الثوم الصبح والبطن فاضي ... وتتركها فترة بدون اكل-ساعة او ساعتين - وبعدها علفها ،وعلى هالطريقة لمدة اسبوع او اسبوعين ... وبينفعها باذن الله تعالى.
وان كان في الناقة سدد في بطنها ... فعلاجها الاكيد إنك تفقّر الناقة وتحفر اللي تحت يديها بحيث انها تميل على قدام ، وتحط " لي" بمقدار بسيط في مخرج الدمن وتصب فيه مقدار لتر زيت الزيتون، وبعدها تسكر المدمن برجلك على الذيل لمدة 5 دقايق ...وبعدها فك الناقة وراقب وش يطلع منها.
الله يبارك لك في ابلك

بيض الله وجيهكم يااخواني عالمروور والنصيحه وانشالله ابشركم بللي يصير

الله يجزاك خير , وتبشرنا بخير أن شاء الله

أسأل الله إنه يشفيها ويبارك لك في ابلك يابن آخي