أبتدي قبل القصيده باسم رب العباد=وأطلبه وقت التهجد وهجعات الرقود

وأطلبه عفوه نهار الملاقى والجهاد=وأطلبه من خيرالأعمال ماكان محمود

وأطلبه غيث يعم الصحاري والبلاد =تالي العقرب ومقدم مطر سعد السعود

وأطلبه خزيرة الشيخ لاركب الشداد=ذود تسوى من هجام العرب عشرين ذود

بس وين ألقى فحلها ليا هب البراد=شيف الوراد والام شيفت الورود

ياهل البل ياقدام البداوة والجداد=اسمعوا علم مزكيه مايبغى شهود

ابلكم برية والفحل مثل القناد=اتعبوا للهيل الأصلي وأبو شيبه وعود

من تعب للزين فاد وتنومس واستفاد=والفحول الطيبه مال لقيمتها حدود

أشهد إن بعض البعارين كفو للهداد=وأشهد انه رابح من دفع فيه النقود

الفحل من بعد ربي عليه الاعتماد =يرفع الابل مثلما يرفع البيت العمود

قبل زينه دور أصله وزود الاجتهاد=وان لقيت مكمل الوصف عنه لاتحود

أول اوصافه كتوفه من زروره بعاد=غاربه كنه قفى السيف والني معقود

افجح أيديه شول جليل من القياد=يدخل الرجال من بين زوره والعضود

من نسانيسه إلى عاتقه طلق سناد=كنه فيه هجار لاسار ولا مع سنود

خدته شبر أذانيه وقاف احداد=مايل شدقه وغظروف خشمه فيه زود

املح حرشا وبرته قريب للسواد=مع شليل البل ولا ودك يشوفه حسود

لا غدا بين الفراقين في الممشا عناد=صوب عشب يذكرونه على أطراف الحدود

زين مسراحه إلى منه فرع واستقاد=يتبعه جل المعاشير لاطال الشدود

أن قدرت شراه فلا تقول الحد زاد=وأن رفض راعيه فاشتر من انتاجه قعود

والسلام ختام والبيت ماودك يعاد=كون في مبدا القصيده يقولون محمود

المشاركة الأصلية كتبت بواسطة فيصل الدعجاني (المشاركة 308659) أن قدرت شراه فلا تقول الحد زاد وأن رفض راعيه فاشتر من انتاجه قعود الله الله صح الله لسان ابن راجس والله لايهينك على نقل القصيده

المشاركة الأصلية كتبت بواسطة فهد ال زبدان (المشاركة 309155) من تعب للزين فاد وتنومس واستفاد والفحول الطيبه مال لقيمتها حدود الله لا يهينك يامسفر على العرض المميز