|
طريقة تطبيع الفحل السلام عليكم يالربع انا عندي قعود وناوي افحله انشاءالله لاكن المشكله ان القعود صاير مثل الصيده مايخلي احد يقرب منه ولا بغيت تحاول فيه يهبد ويرمح وكل شي يسويه وانا ودي اطبعه على القيد والرباط وسنه حق بيدخل لقي وسلامتكم |
حاول بالتقرب الى قعودك الين يخادر اول شي عطه خبز بالمعلف كم مرة حبات بسيطة كرر هذه المحاولة اذا جيت يم البل عدة مرات في العصرية عطه صوت وناده باسمه اللي تبي تسميه فيه مع اعطائه خبز وتمر بهذه الطريقة سوف يتعرف اليك ويأكل من يدك وبعده حاول ان تلامسه وتلاطفه بدون اي حركات عجلة او منفرة بعد ذلك سيخادر مع حك المناطق المحببة له وهي النحر والرقبة وجنبات الذيل بعد فترة ارفع يد القعود بيدك بدون عنف او قوة بالهداوة وبعد فترة حاول عقله وبعدفتره ابدأبالقيد ........... الطرق العنيفة والطرح سريعة لكن لا انصحك بها |
اول شي اطرحه وقيده ثم اتركع لين يعرف القيد ويتعود عليه مع اعطاءه الخبز والتقرب منه لين يقارد وبعدين اربطه والله يمنحك منه |
السلام عليكم اولا : مع احترامي لرأي الاخوان فإن إعطاء القعود خبز لا يصلح ابدا والسبب لأن القعود سوف يجسر عليك يعني ( مايخاف منك ) واذا صار فحل بعد فترة سوف يكون اكول !!!!! يعني قروط وما يخاف من احد ويصير مشكلة مالها حل ابدا !!!!!! ثانيا : انت لاتستعجل لان القعود صغير والحل حطه في شبك صغير وعلفه وحاول انك تحك نحره بيدك او اتركه لين يصير جذع او ثني ويثقل راسه وبعدها مافيه اي مشكله وسلامتك |
السلام عليكم اطرح القعود وقيده وسوله خيه واربطة وخلة مربوط شهر وبيطيح كل شي في راسة بعد شهر فك الرباط ودرجة بالقيد وخل القيد قصير لا تطول القيد ثم ينكسر القعود وخل العامل يدرجة بقيده كل فتره ثم رده لرباطة اذا تبي تفحلة الخبز والمقارده للبكار فقط والقعدان مالها الا الرباط والقيد من سن حق واحيانا بعض المفاريد توذي البكار ولاتخليها تبرك وتمرح تلعب عليها وتقومها وتقوم معها البل ويمكن تسري واهل البل يربطون المفرود شهر تأديب ثم يفكونه ولاعاد يقرب البكار والقعدان احذر تعلمها المقارده لانه اذا تفحل وكبر بينصاك بالمفلى ولاتدري هو يبي الحكاك او بياكلك والهياج للبعارين مثل الجنون توقع من البعير وقتها الهياج كل شي لذلك لاتعلمة الحكاك ولاتخلية يقربك |
الاخ نواف الحربي السلام عليكم الحقيقه كلامك ينقط عسل لكن في ملاحظة . وانا جربتها بنفسي وهي ربط القعود ؟؟؟؟؟؟؟؟ والجواب ربط القعود مايصلح لان القعود الحق صغير سن وإذا روعة شي او شاف شي او خاف من شي يفز وينقز وينطلق من محله وينسى نفسه انه مربوط ويشده الحبل وبعدها يطيح وتنخلع يده !!!!!!!! لذلك الشبك افضل وسلامتكم |
اتفق مع الأخوة بأن الحكاك للقعود غير طيب وكذلك البكار فعندما تلد تكون صعبة وتكون هبودة وجهة نظر للأخوة غالبا اللي يبي يفحل يختار الطبع في ابو الفحل وامه فاللي فيه طبع اكلة ممكن يكون اكلة ومن خلال تجربة ومشاهدة لم يضر الحكاك مع الجمل بل وجدت طبع حلو لكن لابد من التأديب والزجر العنف ربما يعيب القعود اما فصص او فك او كسر ما كان الرفق في شيْ الا زانه |
مايطبع القعود الا الخبز .. والله لتخليه يمشي على اللي تبيه أنت .. عطه الخبز من يدك .. أكله على وحده وحده وأدخل معه لا تخاف منه .. وحككله .. لين يوالفك .. ثم بعد مده حكلله في يدينه من فوق اليا تحت لين تجي مربط القيد .. وأكسر راسه بالخبز .. أنا أنصحك من واقع تجربه ما يطوع المطيه مثل الخبز .. وراح ترتاح بعدين .. تتقيده وتفك قيده بدون أي صعوبه .. |
الله يعطيكم العافية على الردود الوافية |
أهم شي وأول شي القيد لازم يتعلم على القيد |
| الساعة الآن 00 : 10 AM بتوقيت مسقط |
Powered by vBulletin® Copyright ©2000 - 2025, Jelsoft Enterprises Ltd. Designed & TranZ By Almuhajir حماية ارشفة اشهار مؤسسة دعم فنى
جميع المشاركات المكتوبة تعبّر عن وجهة نظر كاتبها ... ولا تعبّر عن وجهة نظر إدارة المنتدى |