فقدان الشهية و الإسهال وقلة الحليب في الخلفة
 

السلام عليكم
عندي ناقه لها يومين فاقدة شهيتها للأكل و قمت و عطيتها ثوم في خبزة و بعدها بيوم زان اكلها و زاد حليبها لكن ما طولت بعد بيومين ردت أنعدمت الشهية و قل حليبها لكنها جابت كوم بعر على بعضه لين وبعدها جابت أسهال حاولت اعطيها تمر وخبز ما إكلته

إلي عنده علاج يعلمناه جزاه الله خير


و السلام

وعليكم السلام ورحمة الله وبركاته

عطها دود وكرره بعد اسبوع

وعطها ايضا بعد الاسبوع ابرة هيام

وان شاء الله تشوف الفرق

تسلم على المعلومات هذه يا مسعود

وجزاك الله خير.

جرب وصفه مسعود العماري واذا ماتحسنت بالحيل جرب معها طريقه الثوم المغلي وهي كالاتي خذلك خيشه ثوم ام 7 ريال ودقها ثم حطها في قدر وكب عليها ماء وخلها تاخذلها كم فوحه على النار ثم خلها لين تبرد ثم لقم الناقه من حتات الثوم وشربها من الماء الباقي في القدر وانشاء الله تسلم وينظف مافي بطنها الطريقه هذي تستخدم ثلاث ايام وحبذا لو يكون وقت استخدامها في الصباااااااح

مشكور يا العبدلي و جزاك الله خير

عجين وثووم مجرربه انا

جزاك الله خير يا يوسف

السلام عليكم ورحمة الله وبركاته

حبوب دود الخضر نقها في بطل ماء لتر ونص المغرب وعطها الفجر سقو وحاول تمسك السان ناقه علشان ماء مايخل في الرئه والله أعلم .

الناقة معها دود وأنا أخوك

أعطها محلول للدود بإذن الله وحده بوحده
المحلول غرشته بيضا غير شفافه وعليها لزقه زرقا ومكتوب عليها على ما أعتقد بالأخضر
ولون المحلول مثل لون الطحينية

وإن عطيتها مثل ما قال أخوي أبو محمد ثلاث حبات دود المركزة فكافيتها بحول الله وقوته
وكرره بعد أسبوع حبتين وبعده بسبوع حبتين بعد
وإن شاء الله ما عليها إلا العافية


وسلامتك

الناقه تسدح واجد ودمنها (وانتم بكرامه ) تقول دقيق وبينه مثل الكيس
اذا كان كذا تراها الشوكه الها كويه على كلوتها علامة اكس

الله يعوضنا بغيرها
ولا اعتقد انه دود لأن الناقه سمين و حالتها زينه لكن جاها المرض هذا و قطع حليبها و شهيتها للأكل
و بالنسبه للبعر ماهو بعر الشويكة
و اعتقد إنها ماكله شيْ ما أعرفه

و الحمدلله على كل حال