في كلّ وادي لادعى الدّاعي اهيم=واجيب جزل القول والفعل برهان
مانيب مثل مرهم القاف ترهيم=لجل المصالح كل يومٍ له لسان
اسوق قافي للرّجال الشغاميم=اللّي لهم في قمّة المجد عنوان
مثل الكريم امقدم الطيب تقديم=جزل العطا راع الوفا عمر خشنان
اللي محلّه مدهلٍ للمحاشيم=روس الرجال اتجيه وفعوله سمان
تعيش يا قرمٍ قنيت المجاهيم=غواليٍ نفخر بها بكل ميدان
بمنقيتك تفخر جميع المخاريم=سود البكار اللي لها عندنا شان
بالزّين ياهل الزّين جينا مقاديم=جينا بسودٍ زينها يشوق الاعيان
جرد الرّقاب المكرمات المراديم=كبار الجروم جرومها وصف ضلعان
سند الغوارب ضافيات الخراطيم=عراض الخدود نحورها وسع بيبان
كنْها تعاين في السما لا مشت غيم=رثم الخشوم وكنّا رماح الاذان
ولا شفتها في خايعٍ علّه الديم=روضٍ خضر نبته خزاما ومكنان
كنها بيوتن رزّت بروضة خريم=واللي بناها طيبٍ بالكرم بان
امكرّمه مع كاسب الطيب تكريم=من شانها يخسر ولاهو بخسران
ايحبها وفي شفها يشدّ ويقيم=ويتبع هواها مع طويلين الايمان
مع لابةٍ قصيرهم مابعد ضيم=تاريخهم يشهد على طول الازمان
دواسرٍ عند الملاقا لواحيم=يردون حوض الموت لا ثار دخان
البل لها في قلوبنا زود تعظيم=وحنا هل الابل يوم زوغات الاذهان
حاميناها فوق المهار المقاحيم=من دونها نروي شبا كل شامان
واليوم في ظل الحرار الصواريم=حكامنا اللي حكمهم امن وامان
قادة بلاد اتحكّم الشرع تحكيم=الين صرنا وسطها اخوان واعوان

حان القصيد وزان بدع الطواريق=فاللّي رقى بالمجد في كل عالي
هذاك ابن خشنان منصى المطاليق=راع المجاهيم الزيّان الغوالي
منقيّةٍ لا شفتها تبعد الضيق=سودٍ عليها يتعبون الرجالي
الرّب فيها طبّق الزّين تطبيق=مازيّنت بالخيط والا الجلالي
في زينها تحتار روس المخاليق=كبار الجروم اللي سوات الجبالي
طوال الرقاب وجرد ماهيب تحليق=واللي يماريها من العقل خالي
جمهورها لاشافها قام تصفيق=يبرا لها لو كان ماله حلالي
يالجنة التحكيم جتكم طواريق=لاول لها من دون شك وجدالي
واللي قناها طوّق الطيب تطويق=شيخٍ لفعل الطيب والجود نالي
مواقفه تعرف ولاهيب تلفيق=فخر الدواسر من قديمٍ وتالي
ابو فهد منصىَ ليا نشّف الرّيق=هو ذخرنا لاصك جالٍ بجالي
عزٍ الرفيق وينفق المال تنفيق=يفدونه اللي يكنزون الريالي
من لابةٍ منزالها ف.الشّواهيق=اهل البكار محوّلات السبالي
تفرح بنا و نضد عنها اللّواحيق=ومن دونها نرخص لها كل غالي
دواسرٍ يزهى بها المدح ويليق=اهل المكارم ملحقين التوالي
والله يعز الحكم باهل المواثيق=ال السعود اللي رقوا بالمعالي
في ظلّهم عشنا ولا فيه تفريق=والصف واحد والتفرّق ظلالي