منتـديـات مــزايـن - ياجماعه البعير جته حاله نفسيه وين اهل الخبره

صفحة 1 من 2

عرض 40 مشاركات من هذا الموضوع لكل صفحة

منتـديـات مــزايـن (http://www.mzayan.com/vb/index.php)

- الأسئلة والإستشارات (http://www.mzayan.com/vb/forumdisplay.php?f=91)

- - ياجماعه البعير جته حاله نفسيه وين اهل الخبره (http://www.mzayan.com/vb/showthread.php?t=32553)

ثلاب الحسيني

30 / 12 / 2010 34 : 01 AM

ياجماعه البعير جته حاله نفسيه وين اهل الخبره

عندي بعير هالسنه سديس وكان مافيه احلى منه

جاه بلا مايضرب النياق اللي من برا البل وانا ابتلشت لابركناها له نهشها وقومها وطردها عن البل واذا شافها وحنا سايقينه على ناقه نبيه يضرب ارثع فينا وارثع بنفسه مايبي شوفهن والمشكله ماهي بوحده ولا ثنتين ولا ثلاث ولا اربع والبعير هايج وضرابه طيب ماعرفتله ربطته 10 ايام ولافاد نفس الشي قلت يمكن يضرب ولا فاد

صراحه حيرني واحرجني اللي عنده حل يااخوان لايبخل علينا

عبدالمحسن المقاطي

30 / 12 / 2010 09 : 02 AM

رد: ياجماعه البعير جته حاله نفسيه وين اهل الخبره

شبك الضراب قريب ولا بعيد عن امهاته

ثلاب الحسيني

30 / 12 / 2010 39 : 02 AM

رد: ياجماعه البعير جته حاله نفسيه وين اهل الخبره

مرحبا ياعبد المحسن لا والله قريب عند امهاته

عبدالمحسن المقاطي

30 / 12 / 2010 58 : 02 AM

رد: ياجماعه البعير جته حاله نفسيه وين اهل الخبره

لاتبرك شي للبعير الي يبيها بيبركها بنفسه

وحاول انك تبعد شبك الضراب عن امهاته و البل الي تنساق عليه لاتخليها تدخل وسط امهاته

وإن شاء الله انه بيزين خاطره

ثلاب الحسيني

30 / 12 / 2010 10 : 03 AM

رد: ياجماعه البعير جته حاله نفسيه وين اهل الخبره

بالنسبه لتبريك النياق غصب ابركهن له لانه يطردهن وينهشهن ويبعدهن عن امهاته وانا ابيه يضرب مالي الا كذا

اما بالنسبه لشبك الضراب اني ابعده ومادخل على امهاته فهذي ولله فكره طيبه وماطرت علي وبارك الله فيك ياعبد المحسن

بكره بجرب لعل وعسى والله لايهينك

تركي بن عبدالعزيز

30 / 12 / 2010 23 : 09 PM

رد: ياجماعه البعير جته حاله نفسيه وين اهل الخبره

حياك الله انا اللي صار مع بعيري عكس بعيرك يضرب اللي برا وامهاته مايبيها تبرك له الناقه يمشي ويخليها

خالد الفالح

30 / 12 / 2010 45 : 09 PM

رد: ياجماعه البعير جته حاله نفسيه وين اهل الخبره

بعض البعارين مغيره
لكن ادخل اللي تبيها اتضرب مع ابلك
وادخل البعير مع الابل يمسي معها واطلقه يبرك اللي يبي وبيضربها ان شاء الله

ثلاب الحسيني

31 / 12 / 2010 45 : 01 AM

رد: ياجماعه البعير جته حاله نفسيه وين اهل الخبره

اخوي تركي وخالد بارك الله في مروركم ومشكور ياخالد على المعلومه بس فيه مشكله ان البعير طلق مع البل بيضرب القايا وهن صغار وهذي مشكله مع اني ماعمري هديته مع البل طلق ابد ولا اقدر احكم

ومره ثانيه مشكورين يااخوان

فلاح الرشيدي

02 / 01 / 2011 34 : 05 AM

رد: ياجماعه البعير جته حاله نفسيه وين اهل الخبره

اللي سمعته ان البعير مايضرب قدام بعير اخر

اخاف انه عندك قعود قريب منك

سعد عبدالله ال عبدالرحمن

02 / 01 / 2011 53 : 01 PM

رد: ياجماعه البعير جته حاله نفسيه وين اهل الخبره

البعير أو أي (بهيمة) على ماتعود عليه ..
رأيي في الموضوع أنك تسوق البعير للنياق وماتسوق النياق للبعير .. لأن البعير والله أعلم تعود أن أمهاته تنساق عنده
هذه الطريقة تشين طبع البعير ..
يعني حط الضرايب في شبك ثم أدخل البعير عليهم .. إذا هوهايج وشم يسرة .. بتشوف مايسرك .. هذه الطريقة مجربة ومعروفة .

فهد الأحمد

02 / 01 / 2011 59 : 02 PM

رد: ياجماعه البعير جته حاله نفسيه وين اهل الخبره

اقتباس:

المشاركة الأصلية كتبت بواسطة سعد عبدالله ال عبدالرحمن (المشاركة 423160)

البعير أو أي (بهيمة) على ماتعود عليه ..

رأيي في الموضوع أنك تسوق البعير للنياق وماتسوق النياق للبعير .. لأن البعير والله أعلم تعود أن أمهاته تنساق عنده
هذه الطريقة تشين طبع البعير ..
يعني حط الضرايب في شبك ثم أدخل البعير عليهم .. إذا هوهايج وشم يسرة .. بتشوف مايسرك .. هذه الطريقة مجربة ومعروفة .

أنا أتفق مع أخوي سعد

حط الضرايب في شبك بعيد ثم أدخل البعير عليهن.

سمير بن محمد

04 / 01 / 2011 20 : 01 PM

رد: ياجماعه البعير جته حاله نفسيه وين اهل الخبره

الأخوان ماقصروا انا عندي بعير مثل طبع بعيرك اللي برا مايضربها خل البعير يسمح من امهاته وكاد ان البل فيها مياسير والتعالج في الليل وهو يشوفها خله البعير يسمح من امهاته وبيضرب البل ان شاء الله .

ثلاب الحسيني

05 / 01 / 2011 07 : 03 AM

رد: ياجماعه البعير جته حاله نفسيه وين اهل الخبره

اخوي فلاح لا والله ماجنبه بعير ثاني ومشكور على سؤالك

اخوي سعد عبد الله والله احيانا اسوق البل عليه او اكثر شي نسوقها عليه ويمكن يكون السبب انا الحين مبعد شبك الضرايب كم يوم وبجرب ومشكور على النصيحه وعلى المرور

اخوي فهد الاحمد وسمير بن محمد مشكورين على الناصيح بارك الله فيكم

محمد الراجحي

05 / 01 / 2011 21 : 04 AM

رد: ياجماعه البعير جته حاله نفسيه وين اهل الخبره

السلام عليكم ورحمة الله وبركاته

اخوي ثلاب حط البعير في شبك وخله بعيد عن امهاته ولايشوفهن لمدة اسبوع وبعدها جيبله الضرايب وحطهن في شبك جنبه وخلهم يومين على مايخذ البعير وضعه يتكرفهن وينسا امهاته وبعدها ادخله عليهن وان شاءالله بتعين خير.

ملاحظه (اذا عندك فحل ثاني وبعد ماتسوي اللي قلتلك عليه وقبل لاتدخل بعيرك على الضرايب جيب الفحل الثاني لشبوك الفحل والضرايب وعقبها خله يطرح وحده منهن ولا تخليه يستشمل وبعدها طلع الفحل من عند الضرايب وادخل ابعيرك ان شاءالله انه يبي يضرب)

واسال الله ان يوفقك ويتعدل الفحل

ثلاب الحسيني

06 / 01 / 2011 49 : 03 AM

رد: ياجماعه البعير جته حاله نفسيه وين اهل الخبره

مشكووووووور يامحمد وبارك الله فيك انا الحين مبعد شبك الضرايب عن البل وبشوف باسوق البعير عليهن بعد كم يوم ان مانفع جبته جنبهن وان شالله يزين حاله والله انه ماعمره استنكر الا هالسنه

والله لايهينك على النصيحه

الساعة الآن 05 : 11 AM بتوقيت مسقط

صفحة 1 من 2

عرض 40 مشاركات من هذا الموضوع لكل صفحة

Ads Management Version 3.0.1 by Saeed Al-Atwi

جميع المشاركات المكتوبة تعبّر عن وجهة نظر كاتبها ... ولا تعبّر عن وجهة نظر إدارة المنتدى

This Forum used Arshfny Mod by islam servant