|
فحل لتعديل انتاج البل السلام عليكم ورحمة الله وبركاته عندي نياق شعل عادية وعندي رغبة في تعديل الانتاج ...... فهل تنصحوني بشراء فحل طيب لتغيير الانتاج وماهي مواصفات الفحل الطيب الاشعل ........ والطريقة الصحيحه لتغيير انتاج البل من عاديه الى متوسطه .... هل هي بتغيير جميع البل او الاكتفاء بشراء فحل طيب !! ولكم مني جزيل الشكر |
تحيه الاخ نواف السلام عليكم ورحمة الله وبركاته الاجابه على اسئلتك يبغا لها صفحات كثيره ولكن باختصار اولا الانتاج الطيب يبغاله (ناقه طيبه ),يعني اشتر ناقه طيبه وافضل شي اشترها بعد ماتشوف انتاجها حتي تضمن ان الناقه بطنها زين اقصد بعض الابل شكلها كايف ولكم بطنها ردي ثانيا الانتاج الطيب يبغاله بعير انتاجه طيب يعني اشتر لك بعير انتاجه زين واذا ما عندك استطاعه تشتري البعير اللي انتاجه زين ,انزل عند اهل البعاريين الطيبه واضرب عندهم واللي يبون الاجر واجد ثالثا تشتري لك قعود من اهل الفحول الطيبه مفرود ولا حق لان الفحل المنتج غالي جدا لذلك تشتري قعود طيب يكون ابوه طيب وتشوف امه وتشوف خواته رابعا حاول تشتري الدق يعني اشتر مفاريد وحقايق طيبات واصبر عليهن سنه وسنتين وتصبح اذا شاء الله راعي ابل طيبه فيه امر ودي التنبيه عليه وهو ان الناس هالايام يبغون ابل مثل ابل فنجال الشيباني او الطهيمي في يوم وليله ,مايصير لابد ان الامر يبغاله تخطيط وتعب وصبر وكذلك توفيق من الله سبحانه هذا رايي فاذا اصبت من الله سبحانه واذا اخطئت فمن نفسي والشيطان اخوك عبدالله بن مطلق المزحمي |
وعليكم السلام هلا بك يالشمري الفحول ماهي واحد والأبل ماهي وحده بعض الفحول يحسن الأنتاج 180 ْ (يعني أنتاجه من الناقة العادية زين ، مثل كساب فحل عبدالرحمن العتيبي ، وشف صوره وأنتاجه بالمنتدى)، وبعضها مايتنج زين الا من ناقة زينه وأن كان عندك قدره أشتر فحل منتج ومشهود لإنتاجه بالزين ، ومعروف ساسه وترزق الله أو أشتر مفرود طيب وأبوه منتج ومعروف ساسه وأمه بالمثل ، وأصبر عليه أو أشر لك ناقتين أو ثلاث زوينات وضربهن على فحل طيب وترجى الله بالي ببطونهن أو أشتر لك لقحات على فحل طيب من أهل أبل طيب (حتى وأن كانن فطر)وأنتظر أنتاجهن والفحل الي مشهود لأنتاجه بالزين يحسن أنتاج الأبل وكلها توفيق من الله وإذا تبي الذود الطيبة لازم تصبر أتمنى لك التوفيق |
تعليق الاخ المزحمي وافي وضافي وللنصيحه اقولك : 1) اشتر نياق وسط نياق انتاج وضربها على الفحول الطيبه اللي عند اهل البل المعروفين واهل الخير واجد وكسب واكرم النياق لي كسبتها واجمع البكار 2) اشتر حوار طيب من اصل وساس من اهل الابل المعروفين وتاكد من امه وجدته وابوه وخواته واخسر فيه 3) في خلال ست سنوات مع توفيق الله تكون جمعت ذود مزاين وليس نياق وبس وتقبلوا تحياتي |
الأخوان / عبدالله بن مطلق .....خالد المضياني...... عبدالرحمن عبدالعزيز كفيتو ووفيتو ....... وجزاكم الله كل خير علي النصائح والارشادات ..... |
| الساعة الآن 10 : 12 PM بتوقيت مسقط |
Powered by vBulletin® Copyright ©2000 - 2025, Jelsoft Enterprises Ltd. Designed & TranZ By Almuhajir حماية ارشفة اشهار مؤسسة دعم فنى
جميع المشاركات المكتوبة تعبّر عن وجهة نظر كاتبها ... ولا تعبّر عن وجهة نظر إدارة المنتدى |