|
شكوى معي حق ا لا؟ السلام عليكم ورحمة الله وبركاته عساكم بخيــــــــر دووووم ودي استشيركم ودلوني على الراي الصح!!!!!!!... انا شريت ناقه من رجال عن طريق الفديوا قبل شهر ونص وقالي ان الناقه ملاقي ويوم جتني الناقه لينها ريضه ما حولها ولالاد وكلمته وقلت له قال اصبر الناقه توها نازله من الدنه اصبر كم يوم صبرت كم يوم نفس وضعها حتى ديسها مانزل كلمته قال اصبر الى عقب عيد ضحيه ان ماولدت او لاقت ردها صبرت لين عقب العيد كلمته قال مانيب مرجعها هاللحين انا بنشدكم هل لي حق اردها او لا علماً ان معي شهود شافوها اول ماجت وعندي رسايل فالجوال تثبت اني مرسله بكل شئ !!!... افيدوني المخطي انا والا هو؟ ولا افدتوني علمتكم وش بيصير اتمنى سرعة تجاوبكم |
رد: شكوى معي حق ا لا؟ مساك الله بالخير يامحمد ان كان الناقه باقي عليها من شهر الى ثلاث شهور اصبر عسى في الامر خيره وان كان الناقه باقي عليها واجد وانت شارط على الرجال وعندك شهود الامر راجعلك والنصيحه طببها السوق وان جابت القيمه اللي تقنعك بعها والله يعطيك على قد نيتك |
رد: شكوى معي حق ا لا؟ اذا كان مثل ما تقول. ففي الحالة هذي يجوز لك ردها. والبيع غرر. حكمي على الصورة التي ذكرتها وليست على الشخص لأنه يجب السماع من الطرفين. لكن يمكن ان الرجال صادق لان بعض البل تزيد عن وقتها. وانصحك تشوف خبير يتأكد من وضعها. والله لا يخسرك ولا يخسر مسلم. وبعض الناس مايتقي الله في البيع. وناس ودك تشتري قربه مو سلعته بس. |
رد: شكوى معي حق ا لا؟ مرحبا يابو عمير اهم شئ انها لقحه وانت صاحب الشان قال الله تعالى في كتابه الكريم بسم الله الرحمن الرحيم (وعسى أن تكرهوا شيئا وهو خير لكم وعسى أن تحبوا شيئا وهو شر لكم ، والله يعلم وأنتم لا تعلمون ) اركان عقد البيع:- 1- العاقدان :وهما البائع والمشتري 2- المعقود عليه : وهو الثمن والمثمن 3- صيغة العقد : وينعقد البيع بكل قول او فعل يدل على إرادة البيع والشراء وللبيع صيغتان أ- الصيغه القولية وتسمى الايجاب والقبول ب- الصيغه الفعلية : وتسمى المعاطاه شروط البيع:- لايكون البيع صحيحاً حتى تتوفر فيه سبعة شروط متى فقد شرط منها صارالبيع باطلا : 1- التراضي بين المتبايعين . 2- أن يكون العاقد جائز التصرف . 3- أن تكون العين مباحة النفع من غير حاجة . 4- أن يكون البيع من مالك أو من يقوم مقامه . 5- أن يكون المبيع مقدوراً على تسليمه . 6- أن يكون المبيع معلوماً برؤية أو وصف منضبط . 7- أن يكون الثمن معلوماً . |
رد: شكوى معي حق ا لا؟ أرحب يا أبوعميررر ،، الرأي وانا أخوك البيع والمشترى بشروط وأنت شارط أن يكون ولادهاا قريب وأنت تقول أنه أتضح أن ولادهاا ريض ،، في هذا الامر يمكن يكون الرجال الي باعك ماعنده معرفة قوية في قرب ولا بعد الولاد ،، وطبعاً هذا ليس من ذنبك وأسئل الله أن يجعل الي باعك الناقة رجال طيب وعنده خلق في التعامل وماهذي إلآ سلعة دنيا وربي يرزقه ببيعه أطيب من الي باعك فيها يا أبوعمير ،، والناقة أشوف أنهاا ترجع لراعيها الأول وأنت يرجع لك مبلغ الناقة وكان الله غفور رحيماً ،، وأتمنى من أخواني الي في المنتدى أن يحرصوا بمثل هذه النقطه وهي تحديد موعد ولاد الناقة ،، وبني آدم ماهو معصوم من الخطاء يا أبوعمير وإن شاء الله بتنحل المشكــلة ،، |
رد: شكوى معي حق ا لا؟ محمد وانا اخوك الفوت بينكم مهوب واجد والموضوع بسيط انت تقول شريتها قبل شهر ونص وراعيها يقول ملاقي يمكن انك شاريها على اول اللقئ والناقه تلاقي قبل ولادها تقريبا 40 يوم ثم تلد وبعض الابل تجر شهر يعني الى الان الرجال ماكذب وعلم الولاده عند الله يعني مااحد يقدر يحدد لك وقت معين لكن الناقه مخورم الان ولا ؟؟ |
رد: شكوى معي حق ا لا؟ في رايي ان كان الرجال مضرب الناقه وعارف وقت اضرابها والصوره ما ذكرت فترجع الناقه عليه والله لا يجيب اخلاف والامر هين والخساره على المعلف اما ان كانه قايلك انه شاري من اول فعلمها عند من ضربها وفي رايي انك تصبر وبيعوضك الله بصبرك خير فيمكن من شراها منه عطاه معلومه خطا او اخطاء في الحساب او ما يحسب اصلا ولاّ ما يسجّل وقت الضراب |
رد: شكوى معي حق ا لا؟ [SIZE=5][COLOR=darkred]انا شريت ناقه من رجال عن طريق الفديوا قبل شهر ونص وقالي ان الناقه ملاقي يابو عمير انت تقول انك شايفها عن طريق الفديو والناقه الملاقي تبين في المقطع ار جو انك تصور الناقه من وراء وتعرضها على احد الاخوان لكي تتأكد والتمس لا خوك المسلم العذر |
رد: شكوى معي حق ا لا؟ بعد المرور بعدة تجارب انصحك وانصح الجميع انه لا يشري على فيديو الا اذا كان مستعد يتحمل العواقب .. بغيت تشري شي روح شوفه بنفسك او ارسل من يعاينه لك والشريطيه الا من رحم الله ما همه الا يجيب دراهم حتى لو كان الثمن الاخلاق والشيمه .. واحمد ربك انها لقاح ما طلعت فاضيه واصبر عليها يمكن يرزقك الله منها رزق طيب على صبرك والعوض من الله خير من العوض من عباده والله يرعاك |
رد: شكوى معي حق ا لا؟ السلام عليكم يابو عمير انا اشوف ان الناقة ترجع لكن اذا كانت الناقة تستاهل ودامها لقحة ومافيها مرض والا عذروب ثاني شهر او شهرين تأخير ماهي بضارة والنيه ..النيه... يابو عمير انا اشوف ان انشاءالله مكتوب لك هالي في بطنها ولاهوب مكتوب للي باعك الله يرزقك منها ويكتب لك الخيره |
رد: شكوى معي حق ا لا؟ مساك الله بالخير يابوعمير .. الاخوان ماقصروا وانا اتفق مع أخوي خالد الفالح . يمكن الرجال شاريها لقحه واللي شراها منه قال الناقه تلد في تاريخ كذا ومشى عليه الرجال . اما كانه متعمد والناقه مضربها هو وكاذبً عليك فاللي مثله يستاهل الجزاء .. ماهوب رد الناقه وبس . لكن يابو عمير كان الناقه لقاحها بيّن ولا لاقت اصبر والله مع الصابرين ولاتدري وين الخيره أما كان لقاحها من 6 شهور واقل لا بالله ترد على راعيهاا حتى لو انه شاريها لن الناقه بيّن وواضحه للرجال اللي يعرف . وكان الناقه ملاقي .. وتجر فاللقاء أو على وشك تلاقي .. وانت راع ابل وتعرف .. فالرجال صادق ولا كذب ... ..... أسأل الله التوفيق للجميع . |
رد: شكوى معي حق ا لا؟ من كلامك اخوي بندر ان الرجال يعرف وش معنى ملاقي بدلالة انه يقول """"ان ما ولدت او لاقت عقب العيد فردها""""" فان كان كلامه مثبوت بشهود او رسالة فالقول قولك انت ان بغيت تردها او تمسكها...وهذا يؤكد ضرورة ان الرجال ما يشتري او يبيع بكلام ماله حدود واضحه مثل ملاقي فما يضر ان الواحد يشرط بان ولادها في الشهر الفلاني تزود او تنقص اسبوع |
رد: شكوى معي حق ا لا؟ اقتباس:
رحب يبو ربيع الناقه والله اعلم ان باقي لها من شهر ونص لشهرين والرجال قايلي ملاقي وانا اخوك ليش اطببها السوق ليه ما اردها عليه |
رد: شكوى معي حق ا لا؟ اقتباس:
انا شريت على مقطع فديوا وديسها ماكان واضح مره فالفديوا ويوم جتني لينها ريضه |
رد: شكوى معي حق ا لا؟ اقتباس:
الناقه لقحه وانا ماقلت حايل ومشكور على التوضيح |
| الساعة الآن 57 : 12 AM بتوقيت مسقط |
Powered by vBulletin® Copyright ©2000 - 2025, Jelsoft Enterprises Ltd. Designed & TranZ By Almuhajir حماية ارشفة اشهار مؤسسة دعم فنى
جميع المشاركات المكتوبة تعبّر عن وجهة نظر كاتبها ... ولا تعبّر عن وجهة نظر إدارة المنتدى |