منتـديـات مــزايـن - قصيده روعه جدااا

اهداء للجميع قصيده رائعه جدااا

. البرق لعيون المولع مناديب

والبيد لأقدام الخلاوي ركايب .

. وأرواحنا لهموم بقعا معازيب

ومعزب الأرواح قبر ونصايب .

. سبحان من يخفي عن العالم الغيب

وخلى الوعد مع نازع الروح غايب .

. كل(ن)يسوق الرجل ويروح ويجيب

أحد(ن) يجيب بسلم وأحد(ن) نهايب .

. أحد(ن) يجيب الفود والعز والطيب

وأحد(ن) يذله كل ماكان جايب .

. ومن لاستر وجهه عن الذل والعيب

ماعاد يلقى لذل وجهه طبايب .

. ومن لاحمى وجهه قبل طلعة الشيب

محد(ن) يعوضه وجه لاصار شايب .

. ولاصار ذكرك فوق روس المراقيب

خلك على دربك ترى الدرب صايب .

. تصير في عيون النشاما كما الذيب

وفي عيون عدوانك عطيب الضرايب .

. موت الفتى بالمرهفات المحاديب

أخير من حي(ن) مع الناس خايب .

. موت(ن) تباكى له عيون الأجانيب

ولاعيشة(ن) تدعي عليها القرايب .

. وإللي نفوسه ماتروم المواجيب

وإللي يدينه ماتسد النوايب .

. عذر الردي ماكل من يجهد مصيب

عود الحماطه كاسرته الهبايب .

. مايخلف الهقوة طوال الأشانيب

صحيح من قال المراجل وهايب .

. يربى على الشاهوق عكف المخاليب

والا الوطى يرباه بوم الخرايب .

. من راقب العالم يشوف التعاجيب

ومن طاول الدنيا يشوف الغرايب .

. غير النبي محد(ن) بليا عذاريب

وكل(ن) على الثاني سيوله جذايب .

. ماكامل إلا وجه جزل التواهيب

ولا رابح إلا إللي من الذنب تايب .

. كل(ن) ذنوبه تغرق الكم والجيب

وكل(ن) عليه من الليالي مصايب .

. ليه الحسد والغل والشك والريب

وليه القطيعه وإندلاع الحرايب .

. يولد الأحقاد شذب العراقيب

والحقد سم(ن) في المعاليق ذايب .

. شرارة(ن) من ملحقين المشاهيب

من ناشته خلت ضلوعه حطايب .

. يومون بالأمواس مثل القصاصيب

ذنب(ن) يوقف منه قطر السحايب .

. لعل من يفرح بشيل المشاعيبب

ويصير في فرقا الرفاقه سبايب .

. تقطع عراويه من الرزق والصيب

ويموت ماتنظر عيونه حبايب .

. وتصفى النفوس ويركدن المشاريب

لابه ذنب عقرب ولابه نشايب .

. هذا بعض ماعلمتنا التجاريب

إللي من الأيام جتني جلايب .

. لاكامل إلا وجه من يعلم الغيب

ولارابح إلا إللي عن الذنب تايب .