استشاره
 

سلام عليكم

اخوكم يحب البل قوه.. وبس المشكله مايمشي لي راتب عشان اعلف البل(عاطل)ودي اشتري ابل بس عندي مشاكل ان شاء الله خفيفه

1-امراض البل لو تمرض عندي بحلت مدري وش اسوي بها
2-اعمارها مادري وشي
3-سعر البل انا ابي عاديه حليب وللتونس

المهم يالربع ودي تنصحوني ولاتبخلون علي بشي وعطوني رايكم

وعليكم السلام ورحمة الله وبركاته

اخوي البل على قولة الشاعر ملفي لازم يكون راعيها قوي

لازم تكون في وظيفه او لك مدخول

يبيلها علف وعلاجات يعني يبي لها مصاريف

اما من ناحية أعمار البل هذي سهله جداً

وامراض البل بتعرفها من احد الي حولك او مع مرور الوقت

اما بالنسبه لاسعارها فعلى كلامك مراح تكون غاليه

يعني بتكون سعر الخلفات من 10 إلى 15 حسب الخلفه وحوارها وزينها وبتحصل اقل بأذن الله

واللقاح من 6 إلى 9

والعشاير والبكار بتحصل قيمتها من 4الى 6

طبعاً هذي اسعار المنايح العاديه

بس المشكله الاهم لديك المدخول علشان تصرف على البل

والله يرزقك على قد نيتك

وانتظر اخواني بيفيدونك اكثر انشالله

هلا ياعبد المحسن

تكفه تراني صامل وعلى كلامك شكلي ابهون بس ياخوك انا تكفيني ثنتين(اتونس معهن) واعتقد يبي لها علف بسيط وانا قادر عليه
بعدين ماعندي معلومات كافيه عن تربيتها وكم تاكل تقريبا في اليوم الوحده

واانا اخوك ياتركي

كل واحد له أسلوب وطريقه في تعليف ابله

في ناس ماتهمهم الفلوس

وفي ناس يحاولون يقتصدون

وانت بيكون مصروفها قليل عليك

يمكن تطلع يوميتها عليك من عشرين إلى ثلاثين

بس انتظر الاعلاف لين ينزل سعرها

وبتقدر بهاليوميه تطعم اربع او خمس من البل

وانت احسبها باليوميه وبتعرف كم يكون مصروفها

بيض الله وجهك ياعبد المحسن

ماعندي مشاكل في العلف ابد لو كان عددها قليل الخير واجد
بس اكرر لك امراضها متخوف منها بعدين تخيل لو مرضت علي الناقه وانا في قلب الصحراء ذيك الساعه وش تباني اسوي

مشاركه مكررره

مشاركه مكرررررره

ياليت المشرف يحذف المشاركات المتكرره

شوف انت لما تتابع الناقه بتعرف اذا الناقه فيها شي مريضه او شي بتعرف

وانت في البدايه شارط عليها انها سلم من كل عذروب

وحاول انك اول ماتشتري البل يكون معاك واحد خبير في البل

وحاول تستفيد منه

وودي اقولك البل مو مثل غيرها من الحيوانات

البل يبان عليها وتعرف من خاطرها اذا فيها شي

ولكن في البدايه لابد انك تحتك بأحد الاخوان يكون قريب منك يعرف في البل وانت تستفيد

يامرحبا

نسيت اقولك مافيه احد من جماعتي يقني البل وانتم فيكم الخير والبركه وماتقصرون باي شي وانت بعد ماقصرت الله يغفر لك
لنا لقا اخر :)