جعل السحاب اللي مزونه مراديم = جعله من القبله يخيل عشيه
ينشى على أنحاء المملكة دون تقسيم = وبله كبار ومزنته عقربيه
أربع وجاب وعقبها ما طره ديم = أسبوع كامل والرعد له وحيه
ومن عقبها تسمع لطيره ترانيم = ويلقابه العساس شبعة مطيه
ما ازين يابو فواز سوق المجاهيم = في خايع ما جاه راع الرعيه
ترعي قفر ما جاه نجود ونعيم = والخير ياسر والا جازه مديه
وخوة نشامى في اللوازم شغاميم = وطاسة حليب ودله شاذليه
والكبش يسلخ والسماء كلها غيم = والنار تشعم والسوالف طريه
هذي طراة العمر تبعد عن الضيم = يازينها يا اهل العقول الذكيه
نتبع هواها والليالي مقاسيم = والعبد يمشي تحت حكمه وليه
ماني بحاجرها ورى الحبس والسيم = مادام راسي يابن غالب عليه
جاك الكلام وعطني الرد يفهيم = وجهة نظرك وعجل الرد ليه
تمت وصلّوا عد ما ينطق الميم = على محمد بالصلاة الزكيه

الموضوع الأصلي: ( جعل السحاب اللي مزونه مراديم ) || الكاتب: نايف التميمي || المصدر: منتديات مزاين

المصدر: منتـديـات مــزايـن