وعليكم السلام ورحمة الله
حياك الله أيها الزائر الكريم
ويسعدني أن أحاول الإجابة على أسئلتك بقدر استطاعتي ويمكن للأخوة الاضافة وتزويدك بما لديهم
1 - كيف تعرف الناقة الزينة(مواصفاتها المطلوبة)؟
مواصفات الزين في الناقة كثيرة ويمكن لك من خلال متابعة هذا الموقع وما يعرض فيه أن تتوصل لمواصفات الزين في الإبل
من ناحية الوجه والرأس والغارب والرقبة والذيل والطول والعرقوب والوبرة والآذان وغيرها من مواصفات الزين
مع الأخذ بعين الاعتبار أن مواصفات المجهم تختلف عن مواصفات المغتر
2 - *الي يبي يبدل انتاج ابله من مجاهيم لمغاتير ويضربها من فحل اوضح الانتاج يجي اوضح والا فيه من الاشعل ؟
هذا في علم الغيب ولكن هناك فحول تقلب اللون وتوحده لون واحد ولكن لابد وأن يأتي بملاوين ولو قليلة
وقد يغلب عليها لون الصفر والشقح
3 - *لو ان الناقه عادية والفحل طيب تتوقعون يجي انتاجها طيب؟
وهل صاحب الفحل الطيب يرضى اني اضرب ناقتي منه ان كانت عادية والا لازم من المزاين؟
الفحل الطيب يجيب انتاج طيب من الناقة الردية والطيبة إلا أن هناك بعض الإبل تعيي على عيالها
وراعي الفحل الطيب حسب أخلاقه والناس أجناس وليس لجمال الناقة دور في القبول والرفض
4 - لو بغيت افحل قعود وش المواصفات المطلوبة به؟
القعود اللي تبي تفحله يجب أن يحمل مواصفات الفحل من ناحية الزين والأصل وطيب أبوه وأمه
5 - لو فيه قعود او بكره زينة بس مجهوله (مايعرف امها وابوها)هل هذا ينقص من سعرها؟
أو يجعلها ماهي زينة بنظر اهل الابل؟
القعود المجهول الأب غير مرغوب فيه كفحل أما البكرة فجمالها يكفيها
6 - *الي يبي يفحل قعود كم سنه يبدا يضرب؟ والبكرة كم سنة وتلقح؟
القعود عندما يبدأ بالضراب ويلقح عندما يكون عمره أربع سنوات
والبكرة يمكن أن تلقح من ثلاث سنوات وفي بعض الحالات سنتين ولكن الأصح أربع سنوات كي لا يغضرها اللقاح
7 - فحول الوضح مثل المجاهيم بنجد(من حيث كثرتها .لان هواي الوضح وقليل اسمع عن فحول وضح .دايم اسمع فحول مجاهيم.
لكن فيه فحلين وضح بشعار المنتدى فوق يمين ردن لي الامل ماشاء الله عليهن )؟
اللي تشوفهم في الصورة من الفحول الوضحان أحدهما الفحل الشهير (تمام) ملك هيف بن عبود القحطاني
والآخر الفحل الشهير (شرهان) ملك فهيد بن فنيسان السبيعي والله يبارك لأهلها فيها ويستر عليها
8 - *الناقة اذا عوشرت من الفحل عقب سنه تلد .هل ممكن ان تضرب بنفس الموسم؟
أو ننتظر لين يرضعها حوارها سنه وبالسنه الثانيه نضربها؟
الناقة يقال لها ( عشرّت ) في بداية اللقاح ويمكن أن تضرب في نفس السنة وتسمى في هذه الحالة ( كساب )
9 - *الضراب من الفحول الطيبة بفلوس والا ناموس؟
الضراب بالناموس أما الضارب بالفلوس فهي عيب في قاموس البدو
وشكرا
وناسف للاطالة
والله لا يهينكم
العفو وحياك الله وحاضرين لكل استفسار __________________
العمر رحله والليالي ركايب=خطواتنا قدام لا يمكن تعود
نأخذ من الدنيا دروس وتجارب=والله يجمّلنا مع كل مردود
خالد بن عبدالله السبيعي |