السلام عليكم
اسمحو لي برأي وباختصار:
أولاً.الزين زين وفارض نفسه وراعي النظر مايقدر يحجبه إن بغا,وقيمته فيه.
أما الاختيار بين الزين وبعضه وتمحيصه فهو بلاشك يحتاج لخبره قويه لتقدم مطيه عن اختها في المركز في المزاينات,وهنا راعي النظر الخبير المشهود له مهم,ولايمكن أن لايخطيء أحد أو أن تتفق الأنظار.
وبالنسبه لماهو خارج المسابقات((المزاينات)) من تقييم فتتداخل فيه أمور كثيره اولها العرض والطلب والرغبه,ومن مايتداخل أيضا الاصل(المعمق)وخلافه حتى سمعة صاحب المطيه لها دور.
أما بتقييم المطيه من ناحية السعر واعتمادها على نظرة من يقال صاحب نظر فليس البائع أو المالك ملزوم به,وكذلك السلعه المطلوبه
والمرغوبه لها سعرها,المهم على صاحب الحلال معرفة كيفية التعامل مع حلاله سواء عرض أو طلب.
وإن توقفت المسأله في كلمه من صاحب نظر أو دعاية راعي نظر محدد فليستعد راعي الحلال لكثر الغثا.
والآن الشكل والزين والمواصفات تقريبا معروفه للجميع خصوصا أهلها والمهتمين حتى الدقيق منه ولم يعد يخفى الا القليل جدا من مميزات تفرق.
وبالنسبة للموضوع اخوي عبدالرحمن أقول يالحبيب لاتسود الموضوع لنعرف جميعا أن الإبل بفضل الله ونعمته وصلت لأقيام عاليه جداً والإشاعات كثيره جدا والتهويل كثير وكذلك الملاك كثروا..ولابد أن تكثر مع كل ذلك سيئات سواء ممن يسمون أهل نظر او خلافه وهذه سنة الحياة كفانا الله وإياك شر من به شر وجميع المسلمين.
اخوي وإخواني وأكيد مثلكم مثلي سمع عن أصحاب حلال يدفعون المال ليمدح حلالهم والله اعلم واستغفره سبحانه ولكنه أمر معروف يعني مسموع ويتداوله الكثيرين.
فالماده يالاجواد مغريه والشيطان اعاذنا الله منه ومن شر انفسنا الماده كبرت وكثرت والإغرائات والدعايات والاشاعات أكثر من بعضها.
المهم ياراعي الحلال اسأل الله أن يبارك لك في حلالك واهتم فيه وفي عماقه والزين كما بدأت يفرض نفسه والخير يغلب الشر دائما.
وكل مجال فيه شر وفيه خير وأهل النظر واجد ولاهم واحد.
وكلن وذمته والله عليم بما تخفي الصدور.
آسف على الاطاله وفقكم الله جميعا |