اقتباس:
| المشاركة الأصلية كتبت بواسطة محمد العبدالرحمن السلام عليكم ورحمة الله وبركاته
ياللحوات الغانمه من سمع بالبل المشريه بـخمسة ملايين وزود, ذود بما حمل يشريه اخوه من"السودان"الشقيق.
الله يرزقهم ويزيدهم من فضله وشلا حسد ولا عنصريه لكن العلم كايد.
ليتنا نستفيد ونشوف كيف اخواننا جو واشتغلو بجد في سوق الابل وسيطرو على غالب أمورها وبعضنا للأسف عاطل عن العمل والحاجه تباريه,والحلال والشغل قدامه والفرص واجد لكن مامن شغل.
نعم اخواننا المسلمين لهم حق وهذي ارزاق من المولى ولكن ايضا شبابنا اغلبهم بعيد عن الكفاح والشغل الجاد هدانا الله جميع.
فرص لاحت في الابل واستفاد منها من اشتغل بجد.
شوفو من مسيطر على سوق الابل,وكل شوي مشكله,وتفتيش وشرطه الى آخره من مشاكل متخلفين يعملون بالسوق أو غير نظاميين.
وبعضهم على كفالة سعودي والسعودي هو اللي ياخذ الشهري من عامله المكفول.
ماسمعتو عن ضبط 30مليون كاش في سوق الابل قبل شهور عند عماله غير نظاميه؟!
انتبهو كيف عملو وتعاونو وباجتهاد وجديه.
الشغل الجاد العمل بكفاح استغلال الفرص بما يرضي الله اساس ومن جد وجد.
من عمال ومتخلفين وسواقين دينات ورعيان لعبو بالملايين ويستاهلونها, وبعضنا ينتف جمع البكره والقعود ويالله يصرف عليهن.
مهي عنصريه او حسد حاشا لله بل وزياده يفرح لهم ويغبطون كل من يشتغل بالنور ونظامي وبما يرضي الله سوداني كان او سعودي او غيرهم.
سبحان موزع الارزاق.
سبحانه اللي أمر عباده بالعمل.
والله شي يغبن الغيور اذا شاف ابن اخيه يدور الارخص طعام لإبله والا ماعنده شي ومن جا لديرته يعمل بألف شهري صار راعي ملايين.ويستاهلها من كافح نظاميا وفي النور والله يوفقه لأكثر.
التنظيم النظام ضبط الأمور من قبل جهه مختصه في سوق الابل.
والعمل الجاد من قبل شبابنا
نتيجته سمننا في دقيقنا
والله يرزقنا ويرزق منا
ولا فرق بيني وبينك ياشقيقي السوداني الا التقوى انت ولد تسع وانا ولدها
والحمدلله على نعمة الاسلام
واللهم لا حسد الله يرزق الجميع
سبحانك اللهم وبحمدك اشهد ان لا اله الا انت استغفرك واتوب اليك |
وعليكم السلام ورحمة الله وبركاته
هلا بك يامحمد
والله يبارك لهم بها
وشبابنا جايتهم الشيخة
الواحد مايبي حي الله شغله
إذا ماهي وظيفة كايفة أو مايبي
انا فكرت أشري نياق و..و..و..(طبعًا
ماهو الحين ، إذا توظفت بإذن الله)وسمعت
ردود خلق الله الي ماتسر ، واحد يقول الناس يتقدمون
وانت ترجع ، وواحد يقول الناقة ماتجيب حق علفها (لإنه
حسبها أن الناقة كل سنة تجيب قعود والقعود يبي له سنة أو
سنتين وتبيعه قصاب ، أما الغنم فحسبته لها غير)،سولفت لهم عن
المزاين والنياق الزينة و..و..و،قالوا الناقة الزينة غالية ، وإذا بغيت تضربها
بفحل طيب مايلحقك السرى (من العجايب الي سمعتها واحد يقول لي أن فلان"صاحب
فحل معروف ومنتج"مايخلي فحله يضرب الناقة الا بـ100.000ريال(مائة الف ريال)ههههههه)
لذلك ماعاد قمت أسولف لهم عن هالشيء ، لإنها أقل من مستواهم
، وكثير الي يقولون أن
النياق سعرها يبي يطيح ، وأنا أقول مافيه مشاكل ، ان كانك حبيت النياق لذاتهن ماهو لسعرهن
ماضرك ان طاح السوق والا أرتفع
الله لا يهينك على كل حال ، وشكرًا