 رد: مدي اربعة وعشرون ساعة تشول
السلام عليكم الربع اللي تكلموا ما قصروا لكن ودي أشارك بالموضوع باللي الله يعيننا عليه والخبرة البسيطة ومن واقع تجربة
أولا : في حالة ان تكون الناقة سبق لها ان لقحت وولدت.
ثانيا : في حالة ان تكون الناقة لم يسبق لها ان لقحت وولدت.
في الحالة الأولى كان عندي ناقة 3 سنين وهي تشول وما الله كتب اني اهتم لها الا قبل سنتين ودس عليها واحد من الربع ونظفها وعقبها ب 4 أيام ضربتها أبرة يسرة وكانوا الرعيان يسبحونها لأنه قام يطلع منها خبث عقب الأبرة ولا عاد شالت وعقب أسبوع أضربتها بالبعير ولقحت أبشرك وقد حاشيها مفرود الحين.
في الحالة الثانية طبعا أكثر الناس وأغلبهم يقول الناقة اللي ما بعد لقحت ما يدس عليها في هذي الحالة وإذا كانت الناقة تشول (وهذي عندي في 6 من الأبل ولا بعد لقحت نهائيا وتشول واذا شافها البعير ما بغاها) تضربها طال عمرك بأبرة كسر الشوال أسمها (أسترا ديول) وتراها غير متوفرة لكن فيه لها بديل وعقب ما ينكسر شوالها بحوالي أسبوعين او 10 ايام تضربها أبرة اليسرة وعقبها اعرضها على البعير والله يوفق الجميع.
ونرجو السموحة على الأطالة |