أيها الأخوة أعضاء وزوّار منتديات مزاين
قرأت هنا كذا موضوع كلها ثناء على عليّان الطهيمي وما يفعله من طيب وخير مع من يجيه من جميع القبايل وسمعت بأم رقيبة كلمة ونعم و كفو كل ماجا مجاله في مجلس علماً أنني لا أعرفه ولم ألتقي به أبداً
وراعي الطيب والفعل الغانم يستاهل المدح والثناء وتخليد الذكر الطيّب له وبما أنني رجل شاعر وأطرب للعلم الغانم وهله والشاعر اذا سمع او رأى مايحرك هاجسه ترجم ذالك فإنني أهدي هذه القصيدة للرجل الذي يستاهلها دافعها عشقي للطيب ومن يفعله .. وأطلب ممن يعرفه ويجي مجلسه أن يوصلها له مشكوراً لأنني قد لا ألتقيه

يالله ياخالق من الطينة نفوس=يامكوّن بحرفين خلقه وكونه
الطيب وهبة بين مرئي ومحسوس=وهبتك يالخلاّق مايصنعونه
علم الحيا مع مذهب الذود وعسوس=والكفو ذكره بالملا يشهرونه
الطيب بشت ٍ للمطاليق ملبوس=ويحرم على الرديان مايلبسونه
ملبوس من همّه مع الناس ناموس=قرم ٍ على العليا تناظر عيونه
بشت الظفر والطيب قدّه ومقيوس=يستاهله من بالوفا ينعتونه
شرواك ياعليّان ياباري القوس=في حضرتك رمّايته يتركونه
لاعدوا خيار المطاليق والروس=هذا الطهيمي قبلهم يذكرونه
شيخ ٍ بفعله يعطي العالم دروس=شي ٍ يشوفونه وشي يسمعونه
للطيب عد وللدياجير فانوس=نجم ٍ لسرّاي الدجا يقتدونه
سعد الرفيق وسعد من جاه محسوس=وأمن الذي طلاّبته يطردونه
لا دق في بعض المواقيف ناقوس=وتلافتوا من لأمرهم ينحرونه
وقامت تصافق راحة خموس بخموس=والنوم جافا عيونهم مايبونه
قالوا لها من يحكم الشور ويدوس=غير الطهيمي في الملا لا تجونه
ياقف لها لو كلبو العالم جلوس=ويزحم بجنب ٍ ماتراخت متونه
ويضحك وجيه ٍ قبل ميقافه عبوس=ومن بعد فعله همهم يفقدونه
الطيب في قلبه من الله مغروس=وورث ٍ لجدّه والمجاني يصونه
في مجلسه للنار حاضي وقابوس=للعود الأزرق والكرم يشعمونه
وقنّاي وضح ٍ مالها وصف وجنوس=تشدا قنوف ٍ بيض بردا مزونه
لا سايفت طاروقها كنه طعوس=طعوس عرق ٍ يقهر اللي يجونه
عرق ٍ يخلّي سايق الجيب وجموس=يرجع منه مافكروا يطلعونه
وإن ناحرت كنها الحكاكيم في عروس=هيبة وزين وشانهم يرفعونه
طوال اللواحي عرضها شبر بالقوس=ونعافها فتر الذي يشبرونه
مشنقات ٍ تحتها سبالها كبوس=تكسي مهادلها وفيها ليونه
ورقابها جرد ٍ زمت صف نسنوس=عراض ٍ فقايرها وسنداً متونه
ذود ٍ خيار ومابه الشين مدسوس=تعجز هوامير النظر يجمعونه
ترعى جديد الروض ماهوب مدروس=ترعى جديدة قبل مايرتعونه
ماهوب مرعي قبل ذوده ومديوس=يحرم على الشوّان مايوصلونه
إن كان فهل الطيب ريّس ومريوس=هذا الطهيمي قايد ٍ يتبعونه
له لابة ٍ في المرجلة كلهم روس=عز الصديق وخصمهم يكعمونه
حرب الدول في حدّهم شبّه الموس=وفي كل ريع ٍ ضدهم يفحمونه
بوقت المواجه حرب نيبان وضروس=ورجالهم في العسر تندا صحونه
قلته طرب فيمن خذا كل ناموس=شيخ ٍ على العليا تناظر عيونه
مالي هدف عنده ولا لفعله آقوس=غير أخبروا عليّان ياللي تجونه
من أكلب اللي للوفا رمز وحبوس=سعد الصديق وذاك يلقى المهونة

الموضوع الأصلي: الطهيمي ياللي تجونه || الكاتب: شجاع عمر الأكلبي || المصدر: منتديات مزاين

المصدر: منتـديـات مــزايـن