من تزاين بعيره قال عندي فحل = مادرى إن الفحل كايد وصعب المنال
مايجيبه سوى شيك(ن) أرقامه دبل = عقب توفيق من بامره يسير الخيال
أو ملق(ن) بذوده عند ماله شكــــــل = ماحسب للخساره والتعب والحيال
وين باغي الفحل يسمع وصوفه عدل = وصامل العلم يكفي من هروج ن طوال
لايدور مع البدوان غيره بـــــــــــدل = ولا يخلي لراعي العذل منه مجال
إن نطحته عماره وإن دبرته جبـــــل = ولاعترض لك سفينه والمواطي ثقال
أفجح(ن) كن في ماطى رجيله خلــــل = وأشول(ن) لامشى خفه يهبد الرمال
وفي رقبته وصوف(ن) من جريد النخل = واللحي سيف شيخ ن في نهار القتال
والخشم يوم قنف وانتزح مانـــــــــزل = كن لطيمس ورا جلدة لطيمس خلال
والأذاني رماح(ن) لو كساها غـــــزل = حااقرتها النخاعه والاذاني طوال
وله شدوق(ن) وساع(ن) ماتضم الاكـــل = تجهده لقمته باسباب كبر السبال
لا لتفت كن فسباله وشدقه ثقــــــل = ورسمة الخشم تو العين مثل الهلال
وإن مشى قلت وعر الارض لوهي سهل = ينتهض مقدمه ويزيد شكله جمال
والسنام أقعس(ن) فيه استدارة هلـــــل = وغارب(ن) ماتشوفه في كثيرالحلال
ولونه أسود غرابي مثل لون الكحــــــل = ما تغيـــر و لو ما لــبسوه الجلال
وامه اللي مع البدوان مضرب مثــــــل = فاطر(ن) لاستذارت جا العوارف هبال
تدمع العين لا من جات فالمحتفـــــــــل = ثم غشاهــــــا زبدها فتنة واحتفال
كن في شدقها واستغفر الله شلــــــل = جـل من هو ذكرها قبل ذكر الجبـــــال
كنها المملكه والبل تحتها فلــــــــــل = وفرقـــها كنه فرق الخمس جنب الريال
وله خوات(ن) رديتها تعز الجمــــــل = وطيبتـــــــها غلاهـــــا مايقدر بمال
لعترضها العجل يركد ولو هو عجــــل = لكتست بالقلايد هي وبيض الحبـــــال
كان هذا بعيرك فانت شغلك عــــــدل = لاتلقي جنوب ولاتلقي شمــــال
وكان ماهو بهو واضنه المحتمــــــل = فاطلب الله من فضله على كل حال

الموضوع الأصلي: وصف (فحل المجاهيم) للعضو طالب بن راشد المري || الكاتب: خالد الحجي || المصدر: منتديات مزاين

المصدر: منتـديـات مــزايـن