بسم الله الرحمن الرحيم
اخواني الافاضل اسمحو لي ادلي بدلوي معكم ونتناقش في الموضوع بشكل ادق ونبحثه من عدة جوانبا اهمها الجانب الاقتصادي والجانب الصحي
وقبل بعلق بعد اذنك ياصاحب الموضوع على اخواني الي سبقوني بالردود
اولا المقارنة من حيث عدد الابل دون ذكر لونها غير صحيحه من وجهة نظري الخاصة
الابل اكلها مهوب سوى اطبعا اشرهن المجاهيم دون منازع اذا مادخلنا الباكستانيات في المقارنة
الي يمشي مع الشعلا والوضحاء مايناسب المجهم
علف سلطان الدلبحي اكيد للمغاتير وانا اشوفه مناسب واكيد تبي تشيل شحم لكن لو هي مجاهيم اعتقد قليل جدا عليها الكيسين
يعني لاعبرة بالعدد دون ذكر النوع وطبيعة الارض
والي ابله مشبوكة او في ديرة وخمة ولا ارضه جرداء مابها شي لايقارنها بالابل في الحمض والديرة الريم
مثل راعي ابو جلال عساها السيل تركي الحويقل
تركي في طراف وادي الرشاء في نجد في ارض من خيرة المراتع في الجزيرة
واربعه اكياس في ديرة تركي واجد لانها تجد الرمث وجثيا وشوك بختصار مهوب في حاجة الحشايش ابدا (( الا في هالايام يمكن الرمث صار خضر ))
ارجع لك اخوي محمد لاناقشك في صلب الموضوع
اولا ماشاء الله عليك مصلاح جدا في ابلك الله يبارك لك فيها
ومبالغ جدا في علفك
لكن المسئله وانا اخوك والله نفسية فقط انت ترى انك احسنت التصرف وان الابل زادت بعد تغير علف لكن انت غلطان وابي افصل معك الموضوع
تدري انت وش سويت بختصار بدلت 150 كيلو من المكعب ((4 ذرة 4 تبن ولبنة برسيم ))
ولا فيه مقارنة بين العلفين ابد ابد ابد
تخيل سين من الناس يعلف ابله 3 مكعب وغالبا بتكون حول 30
ولا يعطيها معه شي اخر ثم غيره ل4 ذرة 4 تبن 1 برسيم
تبي تشوف الابل تنزل الليل والنهار ثم تبي تموت هزل بعد شهر
لكن لان ابلك طيبة ومصلحها من اول الزمان ماشفت الفرق بعد قطعت المكعب واصلا علفك الاول طيب جدا واكثر من اللازم وعلفك الان ممتاز واكثر من طيب
وانا اجزم ان ابلك مشبوكة او ارضكم مافيها شي واكيد مجاهيم (( وانا والله مدري وش ابلك ))
لكن بعطيك علف افضل من علفك وبنص التكلفه
4 شعير + ثلاثه برسيم فقط = 160 + 57= 217 * 30 = 6510 وينها عند 1101 ؟
وانا اشوف انه اخير للابل غير انه بيوفر عليك واجد
تجربتي ان الرودس المفروض يغير اسمه لخسارة
سي جدا على شعرة المطية يشهب بالحلال
سئ جدا في العشار من خلال تجربتي الخاصة
مطيته ياسرع ماتنزل وشحم مافيه بس ربخه بطن على الفاضي تقول لقحة (( الا الناقه الشاحم من قبل تمسك شحمها))
وانا اكرهه زود بسبب اسلاكه مشاكلها واجد دايم تكسر الحلال (( هذا سبب لدعم الحجة وابي اعيفكم فيه
))
لي شهرين اتجنب الكلام في هالموضوع لكن صدقوني لا عوض في الشعير رضينا ام ابينا
خصوصا لذوي الدخل المحدود والبدو الي في الصحاري لانه مايعلفون غير الشعير فقط ولا يعترفون بالحشايش
اسف اخواني على الاطاله