السلام عليكم
مسى الخير لجميع الاعضاء والزوار

عرضي لكم //

ثلاث نياق عشاير ناقتين عفر وناقه شقحاء
اضرب البعير الشقحاء وعفرا وعشرت ولله الحمد اما الناقه الثالثه فعضها البعير على عرقوبها وعافته
وحالياً الناقة ميسر ولكن البعير فادر فهي ضريبه طيبه ،،

النياق مقاني طيبه ومنتجه وبنت احدى النياق عليها 15 الف بمراحها وعينك دليلك

السن// ناقة ام ثالث متاكد منها والثنتين عن الشكه والذمه بقول ام رابع احتياطاً،،
الطبع // طبعها كااايف لو تمزع ديسها بالموس ما احتركت،،
الصحه والعذاريب // النياق سليمه شرط شرط وذمه ماعدا الشقحاء كان بها حضاه خفيفه لا تكاد تذكر وعالجتها منذ فتره طويله جداً وبرت منها ولله الحمد،،
البعير // النياق معاشير على بعير هويدي بن شويه (( ابل معروفه وغنية عن التعريف ))
ملاحظات // & البيع للنياق فقط من دون نماها .
& بعد الامطار والسيول والخير يالله لك الحمد والشكر ،، البل تمرغت بالطين داخل المزرعه ومغير حالها ووبرتها ولا غسلناها الى الان.

السوم // سيمت باسوام متعدده ومعاريض ومتفرقة وبعضها سيم اسوام عاليه وطيبه
ولكن راح اذكر السوم الحاضر وعليها جمله امس العصر بمراحها من شايفها وحايفها
من عين 7000 للناقة ،، والسوم الحاضر نقلد عليه ونقول زاد الله من زاد ،،

للعلم // البيع باذن الله سمح واقول ربي ارزقني وارزق مني
لكن /////// ارجوكم رجاء خاص انه مايسوم ولا يتصل الا الصامل
واللي بشترط الشوف اتمنى ما يحط سومته الا بعد الشوف عشان مايرفع السلعه على الاخوان الصاملين..
واللي بيشرفنا بالزيارة وتشريف المحل فعين فراش وعين لحاف ،،
وعسى الله يكتب لنا وللجميع اللي فيه الخير والبركة
الموقع // بالمزرعه غرب الرياض قبل المزاحمية..

بالنسبة للصور ومقاطع الفديو راح الحقها بالموضوع بكرة باذن الله كانا من الحيين
ابو عبدالعزيز
0542222507

اتوقع اني سردت جميع التفاصيل المطلوبه



*

الموضوع الأصلي: تفضلوا على عرضنا للعشاير المغاتير ،، وابشروا بالسموحه || الكاتب: خالد بن عبدالعزيز || المصدر: منتديات مزاين

المصدر: منتـديـات مــزايـن