اذكرو تجاربكم مع الوافي ارسكو

السلام عليكم ورحمة الله وبركاته

مرحبا بالجميع كل بأسمه ...

أنا علفت وافي أكثر من سنة وما شفت منه إلا كل خير لا خراج ولا مشاكل ولا غيره بالعكس البل كانت شبعانه وراكدة وعليها أي خلاف .. لكن عندي مشكلة أن البل إذا ولدت غالباً تموت حيرانها ونصحني رجال بتغيير علف البل من وافي لأنه حسب كلامه وتوقعه أنه حار على معدة البل . وبالفعل غيرت علف البل وصرت أطعم مهروس من أكثر من سنة ونصف أو أكثر ولكن بالعكس طلعت الخواريج اللي ما كنت أشوفها مع علف وافي والبل ما تشبع وصرت مجبور أعلف حشايش مع الشعير ومع وافي ما كنت أعطي البرسيم إلا للخلفات فقط . وبالنسبة لموت الحيران لم يتغير شيء من المشكلة بمعنى أن علف وافق بريء من المشكلة براءة الذيب من دم يوسف عليه السلام .

لكن مشكلته أنه ينقطع بعض الأحيان وتتوهق معه .. هذا بإختصار تجربتي مع علف وافي وأنا عني شخصياً أيده وبقوة .

ولكم تقديري .. أبوعبدالرحمن

انحش عن الوافي قصدي الهافي ويرزقك الله

كنت اعلف به قبل سنتين تقريباااا

وابشررك معاد اتعامل معه

عليك بالشعير عطايا الله

..

الوافي كان سابقاً ممتاز لاني اطعمته ثلاث سنوات

ولكن من يوم جتنا هالدعايات وهم منتكسين

الحين ماينفع بررررررررررررررررريال انحش عنه
السنوات التاليه ماينفعك افتك منه

انا اعلاف ابلي لي ما يقارب سنتين

وانا اعلف الوافي وانا اعاكس كلام الاخوان

والله ما شفت منه الحمدلله الخواريج ولا موت الحيران

تسلمون على تجاوبكم وهاذ القصد من طرح الموضوع لتعم الفايده بمشاركت الجميع

بالنسبه لراعي المغاتير ( الوظح)

عز الله ماينفع جربته قبل سنه من قبل يغلا الشعير واستمريت تقريباً مايقارب 6 شهور او اكثر

الابل سمان وحالها طيب بس وبرتها دمار ( تقول شعرت نعيميه)

وغير كذا مراحها ماتطبه الا متلطم ولا ودك تقارد للناقه من الريح

وبالنسبه للخراج الحمدالله ماشفت ولا ناقه جاها

وغير كذا الوافي يختلف عن الشعير لو جاه مطر او رطوبه يخرب يتعفن ويصير سام

لانه مركب

اما الشعير مايجيه شئ مغير ينبت فالكيس ولا سنبل احصده

وهم يقولون مايجي الا بعد ماتقطعه وانا ماشفت شئ

وبطونها كنها لقحات

اما الشعير للسنام سيده

وقعطته ورجعت للشعير

والله من اسبوعين اختلفت 180 درجه لونها يسر وريح عبسها زين كنه عطر شانيل( قويه صح)

الزبده ان الوافي مهوب شين مره بس الشعير افضل

والشعير فيه عيب اكل الدمن تكرمون

بس له حل شبعها شعير صدقني ماتاكل الدمن والدمن اتوقع انه عاده فالناقه اذا تعودت عليه ماتخليه

بس انصحك علف شعير وحط معه تبن واخلطه ببرسيم

والله ان تحمد ربك على حال ابلك والبرسيم بدى يرخص


اتمنى اكون افدتك وافدت الاخوان


ان اصبت فمن الله اون اخطئت فمن نفسي

الوافي يا الوافي من علف بك قال يا كافي
والله اعلف بالتبن ( تكرمون ) ولا اعلف بالوافي لمن عرفت عنه انه يحطون فيه عظام من ارجل ورؤؤس وجلود الحيوانات وخاصة الدجاج بعد طحنها وإلي اعلمني بذلك مهندس بالزراعة في الكشف المخبري قلته ليش قال عشان الاملاح وبعض المركبات تكون طبيعية ،،،،،، بعدين ما يصلح لتخزين تأثر عليه عوامل المناخ وخاصة الحرارة غير الامراض وخاصة الخراريج والله ما كنا نعرفها في البل الا يوم جانا وافي ،،،،،، في دعايتهم له قالوا كنز الا خسارة ومن فود ،،،،،،،، يعني ذا الشركات تبغونها تعطي شيء يفيد لا والله الا تبغاك تكب من ذا الدراهم مرة في علفهم الي مصنعينه ومرة في فم شركات البيطرة في العلاجات التي تشتريها لحلالك من سبب الامراض الت احدثتها هذه الاعلاف المصنعة لأن كل من هذه الشركات ( شركات الاعلاف المصنعة ،،،، شركات البيطرة ) كل وحدة تشيل الثانية والخاسر بينهم هو راعي الحلال ،،،،، قاطعوه خلوه يخيس والله لو تواصلون عليه لسوف يتم منع لزراعة الاعلاف ( الحشائش ) ويمنع استيراد الشعير لأنه في الاونة الاخيرة نرى تركيز وزارة الزراعة على الاعلاف المركبة المصنعة بحجة المحافظة على المخزون المائي ومن ثم يقولون اهل الحلال ما يردون الا هذا العلف المركب المصنع ،،،، اتركوه

والله يااخواني علف وافي علف فاشل مايجي منه خير ابد لني كنت اعلف به والحمدلله صارت البل افضل بعد ماقطعته

وانصحكم تعلفون (مكاعب المعجل او مهروس المعجل ) لني اعلفبه وحصلت فرق عن جميع الاعلاف

المشاركة الأصلية كتبت بواسطة فهد الأحمد

الوافي " سلال خافي "

عز الله انه سلال للحلال

ابشر بالشحم وغيره وكل الله

ويجيب الخراريج