في السوق كفو .. وفي عزبتك قصب !!!

جزاكم الله خير جميعا ..

الصراحه ان الموضوع لا يخلوا من بعض الخطط التسويقيه حسب كلام حد الشريطيه يقول نرفع الشبك ونحط النياق اللي نبي نبيعها مع نياق اقل منها بواجد

وتظهر القصيره طويله والعاديه زينه ..

وهذا اللي يحصل معي تماما .. والشي الثاني اللي يشوش على المشتري هو شكل البل في الظهر مع شدة الحر يختلف عن شكلها العصر او الصباح لأن الحر يطلق وجييها ويزينها

بالنسبه للبيعه الاخيره فانا شريت ثلاث نياق ووحده طلع فيها عيب ورجعتها .. ورحت اليوم متعمد للشبك ابي اشوف كيف شكلها .. واشوى اني مسكت عمري بغيت اقول لهم رجعوها وخذوا مكسب من طيبها بين اللي معها

السالفه شي مثل الخداع البصري . وبالنسبه لي فمن اليوم ورايح ما اشري ناقه الا بعد ما اطلعها لوحدها برى الشبك واملى عيني منها

والله يرزقنا ويااكم ويبارك لنا ولكم

المسألة الله العالم مسألة نفسية
وهي تحصل معي كثير في البل وفي السيارات
عندما تملكها تقل في عينك
والمثل الحجازي يقول " مزمار الحي ما يطرب "
وفي النهاية مبروك البل الله يعطيك خيرها

ٰ

عادي جدا يابو محمد
شريت لي خمس نياق علشان وحده ويوم جت المراح كلهن بعتهن الا هي ............ لانها عله وكاني كنت مسحوور (وقد يكون) ولا راحت الا بعد وقت وكان يوم عيد
---------------
المهم عندي ملاحظات ممكن تساعد
1- لا تشري الناقه من اول نظره ... كرر النظر في اوقات مختلفه
2- لا تشري لين تبعد الناقه عن اللي معها وتسوقها
3- لا تشري الا مشروطه
4- كل ناقه في السوق اجعل الاصل في وضعها الشك
تقبل تحياتي

نفس ما قالوا الاخوان .. والله الحمد والمنه .. مبتدي من فتره قصيره ..بس كان الوالد الله يطول بعمره ينصحني .. نفس ما قالوا الاخوان فوق .. بس بعفويه جدا كنت اصور الناقه .. لو اعجبتني .... وكل شويه اطلع صورتها من التلفون واشوفها .. واتم كل شويه اشبع بعيني منها كثر واكثر .. لين اشوف عمري هل ليه خاطر فيها ولا لا ..

كثير من الابل ياللي عجبتني بعد فتره تطيب عيني منها .. واشوفها حقيقه ما تسوى .. وخصوصا من اعرضها على اخواني .. يقولون ليه عيوب يمكن انا ما كنت منتبه لها كوني انجذبت لها بشكل كبير .. واعجبتني .. واحيانا اخذ لي ثلاث ايام او اكثر افكر هل هيه تستاهل ولا لا ..


والحمد لله .. كل الابل ياللي اخذتها منقايه والمدح فيها والله الحمد والمنه

تبون الصدق : هالموقف بيتكرر وبيحصل مهما بلغنا من حسن النظر والمعرفه والتحرز
لكن مالنا الا نتبع ملاحظات حاتم العماري الله يجزاه خير ونستخير ونستعد للمقالب الجايه

كلام ممدوح صحيح و انا ما اتركد فاشرا الا اذا كنت مفلس و انا اشوف الجناى دايم عجل