ام رقيبه موسم تحسين الانتاج

ربي يعطيك العافية على طرح مثل هذه المواضيع التي تستحق النقاش والاخذ والعطاء وأبداء وجهات النظر
الانتاج هو توفيق من الله عز وجل
كم من واحد ردي والردي ردي على أسمه عنده فحول طيبه ولكن الله احرمه العلم الغانم
واحرمه الانتاج
و الرجال معروفين وربي رزقهم بالانتاج الطيب
يا خوان انا اعرف واحد ضرب نياقه عند المقوعي الرشيدي وهذا الرجل اقصد المقوعي عرف عنه طيبته وكرمه ولا يرد احد لا من بيعد ولا من قريب

ورزقه الله ببكره طيبه باعها بحوالي 250000 ريال
بالمسالة هي توفيق من الله ورضا

مشكور على الموضوع

نتمنى ان تتاح الفحول لاهل الحلال الضعيف .. في ام رقيبه ...

جزاك الله خير اخوي
طال عمرك كلامك سليم و ما عليه غبار
وانا مستعد و حاظر بالي تبونه

السلام عليكم ورحمة الله وبركاته


جزاك الله خير على طرح الفكره حلوه

وبيض الله وجهك .

قريت الموضووع وبصرراحه جتني الضحكه > لان ذكرة سالفه اهي ترد على موضووعك


مره من المرات صار عندنا عشى ومن ضمن الحضوور شخص عنده بعير طيب وانتاجه مثل مايقولون ضغط عالي

وصدفة ان شخص طلب منه البعير مدة بس جم يوم واهو مراحه قريب عنده ويعرفه عدل

ولاكن رفض وخيره في بعير ثاني مخليه حق الي بيضرب للناس البعير الثااني عادي

طبعن رفض خويننا العرض لان البعير عادي جداا جدااا

ويوم ضغطو عليه بيعرووفن السب قال>> بعيري طيب ونيااقم وسط اذا انتاجه طلع عادي

الناس بيسبوون انتاج البعير

هذى الي تخلي اغلب الناس ترفض فكرة الضراب من غير ابله

الضراب توفيق من الله

وانا يامحاكيكم عندنا بعير انتاجه عندنا عادي معن ابلنا وسط

الفحل يعدل فيها حيل

شرينا بعير طيب وانتاجه مثل ماقلت عندنا عادي

وعند غيرنا فاخر معن اغلب الي ياخذوونه ابلهم والله عادي

ولاكن نبي منهم الدعااء الطيب

واتمنى ان وجهة نظري وصل بشكل جيد

مشكوورين ولاهنتو على كل حال ياوجيه الخير

واخص بالشكر الاخ مسعود العماري وانا متابع لك جيد
ياعسى عمرك وعمر الربع يطويل .

كل اناء ينضح بمافيه
ولسان الرجال مثل المغراف يخرج مافي بطنه
ودك ان ذا الكلام يصدر من راعي المزاين
بس مافي اهتمام الا بالشي الي من وراه مصالح
كلامكم كله زين وكل واحد يسير ع كيفه الدعوى ديمقراطيه

ياهلا باالاخ عبدالرحمن
الحقيقة مو ضوع جيد وهادف تشكر عليه ولكن يريد مجموعة اشخاص عزومهم قوية لتلبية الموضوع
انا اقترح المجموعة هذي تكون من اعضاء المنتدى يكتبون اعلان لكل مشارك ويوزع عليهم والطيب طيب والردي ردي لكن ولله الحمد البل من حسناتها ماتجمع الا الناس الطيبة
وبارك الله فيكم تقبلوا مروري

السلام عليكم ورحمه الله وبركاته .....الله يستر على عباده
اسمع البعض يقول غصب والبعض شهروا بالرجال والبعض يقول ........ليه ياربع الرجال اللى يسمح
تكون له مكافه من القنوات الاخباريه وهى كثر بعرض فحوله وانتاجه وتكريمه ليه لا بالطريقه وهى الايجابيه
بتجبر الاخوان اللى مايسمحون يركضون ويدورون الشهره بالطريقه اللى ذكرنا وكسبناهم وماخسرنا شى
والله يوفق الجميع .

بيض الله وجهك ...فكرة طيبه من رجال طيب...اتمنى انها تنقل لمن يهمه الامر من ملاك الفحول المنتجه والله اعلم انهم ماراح يرفضون.

عليان الطهيمي فاتح المجال في اي وقت لضراب على فحله الكنق
وانا باسمه واسم قبيلة حرب ادعو اي رجل يطلب تحسين الانتاج
يشرفنا فالمخيم ويبشر بالي يكحل العين

حياك الله يا اخوي عبدالله
عليان الطهيمي وجه رجال وسيرته العطره ماشيه قدامه

بس لا مؤخذه انت عزمت على مكان وبعير الرجال بدون ان تعرفنا من انت
فهل انت مفوض بذلك ؟
وعذرا للسؤال فنحن لا نريد ان نقع في الحرج مع الرجل ونعلم انه فاتح الضراب على بعيره قبل فتح الموضوع ولم نذكر ذلك لاننا لسنا مفوضيا بالكلام على لسانه
فهل انت مفوض او قد اوصاك بذلك؟

وتقبلوا تحياتي

فكره جيده وانا اقول ان اهل الابل الطيبه والفحول المنتجه فيهم خير ولا يقصرون ولا كن المشكله في اناس اخرين المهايطيه والوكلا الذين اغلب كلامهم لاصاحب الابل ان الفحل الطيب لايضرب لاحد لاحتكار السلاله ولا اعمم

كفيت ووفيت اخ مسعود العماري في ردك ونكتفي بردك على الموضوع

اخوكم/ فيصل الرحماني البقمي

انا اوافق اخى غانم الدوسرى الراى
((مرحبا بك ابو خالد


فكرتك طيبة وانا مؤيد لها

لكن ما تقدر تجبر الناس في حلالهم وتشاركهم فيه))

وبعدين ملاك الفحول ساهمو فى تحسين الانتاج, واهدو قعدان , ولامنع الضراب الا قله منهم.
المره الجايه بنطالب بخذ فحولهم

والله العضيم فكره طيبه والله يجاك خير


على النبه الطيبه وانا شخصين من مؤيدينك وبحراره


تقبل مروري على متصفحك العطر اخوك فهد الجبلي وتحياتي لشخصك الكريم

أخوي عبدالرحمن بعد التحية والتقدير
موضوع متميز وله أبعاده على مجتمع أهل الإبل بشكل عام لو سار حسب مارسمت له 0
وبكل تأكيد جميع ملاك الإبل الصغار (من حيث المادة والإنتاج ) يطمحون لمثل ماتقول
ولكن المشكلة من جعل من الفحل المتميز بصفاته وأصوله الجيدة ( المنتج ) حكرا على ذوده وجعل منه مثل وكالة تويوتا
خاصة به دون غيره حتى يستطيع بعد ذلك البيع من انتاجه بمبالغ طائلة متناسيا التكاتف في مجتمع أهل الإبل 0
ومبتعدا عن الوقفة مع من هم بحاجة إلى انتاج بكرة أو قعود طيب يعدل الكثير من سير حياته ناهيك عن توفر الفحول
الطيبة متى ماسمح صاحب البعير الطيب للمسلمين بمشاركته في بعيره بحد معقول يكفل الفائدة للجميع 0
وتقبل خالص تحياتي على هذا الموضوع الجيد ...