يالربع فزعتكم في الخلفة

يالربع فزعتكم في الخلفة

السلام عليكم
مساءكم الله بالخير
فزعة يالربع في الخلفة الغالية الي بدى يدق حالها وتدور الظلال وتنثر الماء وتسدح عليه.
مابي اطول عليكم
العلم شريتلي لقحة من مدة(3 أشهر), ولدة عندي ولا بها الا العافية الين قبل سبعة ايام جاها بلا ماعرفناله, الناقة قلت شهيتها للعلف بدى يدق حالها تقوم على الماء وتنثره وتسدح عليه وتدور الظلال وليا برد الجو زانت شوي قامة تاكل ولاباكلها زايد قمنا نرشها بالماء نبرد عليها. رحت للبيطري قال فيها اما هيام والا طفيليات في الدم اعطاني ابرة هيام وابرة ثانية للطفيليات(20ملم) ودوى ثاني على مرتين (50ملم كل مرة) اليوم لها ثاني يوم من اخر ابرة ولا فيه زود حال. اليوم برقت في دمنها كني تداقيته اشوي واشوف فيه تدبدب شكيت بمرض الشوكة او الجرح لكن ماذكر ان يجي من اعراضه ارتفاع حرارة الناقة.
رايكم يالربع وفزعتكم لا هنتم

الموضوع الأصلي: يالربع فزعتكم في الخلفة || الكاتب: سطام الخالدي || المصدر: منتديات مزاين

www.mzayan.com

كلمات البحث

النداوي, نداوي, شعر, شعر شعبي, شعبيات, قصائد, نبطي, نبطية, مزاين الإبل, ديوان, دواوين, شعراء, جمل, جمال, بعارين, ناقة ,مجهم, مغتر ,مجاهيم ,مغاتير, وضح, شعل, حمر, صفر, هجن, جيش ,اصايل, نوق, نياق, صحراء, البر, المقناص, القنص, ربابة, شاعرات, شعار, قصيد, القصيد, قرآن, قران, دردشة, سوالف, مدح, مديح, حماسة, حماسه, صقر, صقور, فروسية, فرسان, سلوم, عادات, قبيلة, قبائل, هيل, قهوة, قهوه, تراث, عرضة, عرضه, العرضه, العرضة, سامري, هجيني, مسحوب, نجد, نجدية, محاورة, محاوره, نقد, أدب, ادب, الأدب, موال موالات, سمر, بحور الشعر, نظم, أمثال, امثال, حكم, الأصايل, الخيل, فرس, موروث

المصدر: منتـديـات مــزايـن

---

dhgvfu t.uj;l td hgogtm

اخووي سطام هل الناقه وماتسرح مع البل وووبرتها كيفها هل هي منحته

وهل بطنها ناشف وقليلة شهيه

وهل في بطنها نفووخ

مرحبا أخوي سطام


ناقتك تصقر بما يسمى صقره وهذا يجي بعض البل بعد ما تنتج وله علاج عند البيطري عبارة عن حقن معوضه فيتامين لمدة اسابيع لكن الحل أنك إذا احتر الوقت قبل الظهر مثلاً هذه الايام الساعة 10 تدخلها في ظل وترشحها لين يبرد الوقت وراح يروح منها هالمرض مع الوقت ان شاء الله..

ناقتك مادامها تدور الظلال والبراد فالناقة معها الجرح وله علاج كوي وعند البيطري ابر التهاب الكلا

تقديري لك

الاخوان
سلطان
سالم
شجاع
الله يجزاكم خير وشاكر لكم تفاعلكم وردودكم ولا هوب مستغرب على ربع المنتدى
الاخ سالم الناقة ناشفةً شوي واكلها قليل اما وبرتها لا ماهي حاته مثل ولايفها
وإذا هو مرض الجرح وش علاجة غير الكوي وهل هو جرح المصير والا جرح الكلى وإذا مافيه الا الكوي وين الكوي على الناقة فيه

الحالة صارت عندي قبل اسبوعين في خلفة كذلك

واعطيتها التالي :

ابرة هيام + خافض حرارة ( اليوم الأول )

مضاد حيوي نوعه اموكسيل يوم ورى يوم بجرعة 30 سانتي

ومن ثاني يوم ما فيها الا العافية ولله الحمد

فأنت الان لابد تعطيها خافض حرارة ومضاد حيوي

عسى الله يشفيها

ملاحظة : هل لاحظت شيء في جلد الناقة مثل التورمات الخفيفة

السلام عليكم ورحمة الله وبركاته

اخوي مسعود الأعراض الي ذكرها سطام في ناقتة حصل معي في ناقتين وحده خلفه والثانيه معشر واستعملت الأدويه الي انت ذكرتها وابشرك اليوم مابهن الا العافيه لاكن المعشر فيخة والسؤال طال عمرك انت ومن يقرا الموضوع ماهو اسم هذا المرض (خصوصاً ان دمن الناقه اعزكم الله يكون مدبباً )وهذا الشي مايكون لافي الهيام ولافي طفيليات الدم
وانا نسيت اذكر انه بلأضافه للاعراض الي ذكر الأخ سطام حصل عندي تورم بالزور.. وآسف على الأطاله ولكن لتعم الفائدة

الاخ أبراهيم/مسعود
الله يعطيكم العافية ويجزاكم خير
لا مالاحظة فيها وريم . لكن وش عن دمنها ناشف ومثل ما قلت تداقة وكنه مدبب .وانا اعلفها برسيم ملبن يعني ماهو ربطات خضر
شاكـــــــــــر لــــــــك ومقدر

ناقتك معها جرح الكلى وعلاجة عند البيطري ابرة التهاب الكلى
والكوي ترقمها بثلاث رقم ذربة على كل كلوة من خلف آخر ضلع في خو الشاكلة ووضع الرقم مثل الاثاثي

وماتشوف شر

اخوي شجاع
جعل ما يجيك الشر ولا من تحب
الاخوه جميع الله يجزاكم خير
وما قصرتوا بيض الله وجيهكم
وابي الربع يشوفون الردود
الناقة ضاربها اربع ابر ليا هالحين ولا ودي ازود عليها
وش الراي هل اعطيها ابرة هيام وامكسيل وخافض حرارة والا اعطيها ابرة جرح الكلى

الشوكه شوكتين شوكه في الكلا وهي الي تكوا وشوكه في المعده وهاذي تعالج بل ادويه فقط


والعلاج البييطري لـ الشوكه اسمه (بالنسبة للإبرة اسمها توروميسين)

المشاركة الأصلية كتبت بواسطة سلطان الدلبحي

الشوكه شوكتين شوكه في الكلا وهي الي تكوا وشوكه في المعده وهاذي تعالج بل ادويه فقط

والعلاج البييطري لـ الشوكه اسمه (بالنسبة للإبرة اسمها توروميسين)

للتوضيح

الجرح صحيح جرحين : جرح الكلوة وجرح المقدم
جرح الكلوة هو شوكة الكرش ( المعده )

ولكن سميت الكلوة لانها تكوى على مخفق الكلوى ومكانه مشط يسار على مخفق الكلوة

وذلك لان كرش المطية يسار

وبالنسبة للي ذكرت أخوي سلطان ابرة توروميسين هذي مضاد حيوي

وبالنسبة لناقتك يا سطام انصحك تسأل بيطري او تعطيها الخافض والمضاد اللي ذكرت لك

واذا ما نفع عطها حبوب الدود واذا شفت الناقة تبرك على جهة ( مايلة ) فهذا جرح وعطها ابرة الجرح

هذا مالدي وعسى الله يشفي ناقتك

هذا ما لدي و

السلام عليكم
شاكر كل من مر وقراء وشارك
وماقصرتو يالربع ولا هي غريبة على اعضاء هالمنتدى الرائع
اعطيتها مضاد يقول البيطري ان فيه مركب الامكسيل وقال ينفع لالتهلبات الكلية(35سم مرتين اليوم وبعد بكرة) واعطيتها خافض حرارة(20سم يقول 3 ايام)
وفي رجاء الشافي المعافي
وراح اخبركم بالنتائج كي تتم الفائدة للجميع

المشاركة الأصلية كتبت بواسطة سطام الخالدي

السلام عليكم

شاكر كل من مر وقراء وشارك
وماقصرتو يالربع ولا هي غريبة على اعضاء هالمنتدى الرائع
اعطيتها مضاد يقول البيطري ان فيه مركب الامكسيل وقال ينفع لالتهلبات الكلية(35سم مرتين اليوم وبعد بكرة) واعطيتها خافض حرارة(20سم يقول 3 ايام)
وفي رجاء الشافي المعافي

وراح اخبركم بالنتائج كي تتم الفائدة للجميع

نعم هذا الدواء المطلوب لكن جرعة 35 ما ادري عنها وترجع حسب التركيز

اما الخافظ فهذه الجرعة المطلوبة
ولكن لو تكرمت تعطينا النتائج

وعسى الله يشفيها شفاء لا يغادر سقماً

يعطيكم العافية

يرجاء تزويدنا عن مرض الجرح واعراضه وعلاجه

مشكورين