أحكام غير شرعيه في ركاب غير ممنوعه

لاهنت يابوعلي اجابه شافيه ووافيه وارجو ان تكون الصوره واضحه للاخ ذياب والزملاء الاعضاء والقراء..

والله يا ذياب اللي يمنعون واجد في ذا الزمان
ولكن أساليب المنع تعددت وأنا أخوك

واللي بقوله سود الله وجه كل رجال يمنع من بعيرة

بعض الرجاجيل يمنع حسد والعياذ بالله ويبخل على نفسه بقولة فلان والنعم في الدنيا
ويبخل على نفس من أجر الآخرة

والله يارجل يمنع من بول بعير أعزكم الله إنه مافيه خير
وأعرف ناس بالإسم ولا ودي أذكرهم في مجالس الرجاجيل
وبترفع عن ذكرهم

واللي بنقوله بيض الله وجيه الرجاجيل اللي إذا جيتهم أذبحوا لك وكرموك
وبعضهم إنه يجيب البعير ويدخله في أبلك
والبعض إذا جا يشد شدد أبلك معه
وبعضهم يهتم في عزبتك ويمر على عمالك في غيابك وينشد إن كانهم محتاجين حاجه ولا غرض
وبعضهم والله إنه يعلف على أبلك إذا جيت تضرب عند

مثل هالمطاليق بنذكرهم بندعي لهم في كل صلاة إن الله يوفقهم وأن الله يرزقهم من واسع فضله
وسلامتكم

هذا الكلام اللي زبدته فيه ..

بيض الله وجهك

محمد المنصوري / شكرا على المرور يابو منصور

محمد علي الهدفه / مشكور يالغالي على المرور

حمد الغواص / مانختلف معاك يالغالي لكن محور كلامي على عنـوان الموضوع { أحكام غير شرعية في ركاب غير ممنوعه }، مشكور على المرور

فهد الاحمد ابو فيصل / ما اختلف معك يالغالي ومحور كلامي على عنوان الموضوع اما من ناحية كلامك اللي باللون الاخضر انا معاك فيما تقول .. أحذف الطيب خلفك وتلقاه امامك ، مشكور على المرور

بدر العازمي / كلام واقع ومشكور ع المرور

طارق حمود الجهني / الحمد لله نظام الـ A B S شغال والاحزمه مربوطه ونرجوا منك مشاركة اكثر في الموضوع وابداء الراي مشكور يالغالي على المرور

حمد الغواص / وهذا مربط الفرس وموضع الاشكال ومحور حديثنا ، مشكور على المرور وتكرار العبور

مبارك راشد / يامرحبا يابو راشد ، اسأل الله اللي دلك يدل غيـرك

مبارك الرمالي / اللبس بعيد ان شاء الله والموضوع واضح من عنوانه ، ونرجوا المشاركه وإبداء الرأي حتى يستفيد الجميع

حمد اليامي / الله يعطينا وياك كل خير ، والمسلمين مشكور ع المرور

مشعل العتيبي / رأيك طيّب وسديد ونصائحك مقبوله ، أما البكره فهي ضربتها مثل .. في سياق موضوعي
وان شاء الله بتشوفها في موضوع مستقل عن قريب ولا استغني عن رايك ومشكور ع المرور

حاتم العماري / العنوه مطلوبه في هذه الامور ، ومرضي الناس كايد لك حق وعليك حقــوق أشكرك ع المرور

حمد محمد المري / عزيز وغالي والهدف أكبر من كذا والمقصد توسيع ثقافة من يجهل هذه الامور ، ومشكور ع المرور

علي آل مرعي / مرحبا بك الصورة واضحه جداً جداً ولا نستغني عن رأيك والمشاركة في هذا الموضوع ، مشكور ع المرور

بدر الذيابي / مرحبا بك ولا زال الموضوع غير واضح عندك وارجو عدم الخروج عن إطار عنوان الموضوع ، مشكور ع المرور

وبما ان الموضوع يهم اصحاب التنواق انا عندي اضافه بعد اذنك

وهي ان لا يذكر الا صاحب الفحل المنتج اللي ما يمنعه ولا يذكر في هذا الموضوع بعير مهما كان انتاجه فاخر وراعيه يمنعه لكي لا نضعه ونضع انفسنا في حرج

السلام عليكم ورحمة الله وبركاته
الاخ العزيز راشد العرق الله يبارك في اايامك وايام المسلمين جمعاً ، على العز والطاعه
اما بخصوص موضوعك فـ انا فاهمه وعارف انك ماتبي تذكرر في المنتدى إلا البعير المنتج اللي مايمنعه راعيه وأيضاً اللي بالخط الاحمر
منعاً للأحراج مفهوم جداً وهي راحة الناس من العنوه لكن العناء في الركاب دايم يكون راحه خصوص لا صارت بتفتح لها حسابات بعدين في البنوك
وايضاً ماطلعنا بجديد في هذا الموضوع ولا زالت الشواهد مفقوده .
أنا اقول : مافيه بعير ممنوع في الجزيرة للعمـوم .. منتج أو غير منتج .
وأنت تقول : فيه .. نبي الاثبات والدليـل
انا اقول الناس : هي اللي تمنع انفسها في هذه الامور
وانت تقول : فيه ركاب ممنوعه ولكن لعدم الإحراج مع اهلها مانبي نذكر أسامي ..
وانا اقول : إذا مثلاً وافقناك في الرأي الإحراج راح يحصل بطريق غير مُباشر .. لان الركاب المنتجه معدوده على رؤوس الأصابع
فـ إذا عديت بعضها وتركت الباقي ، سوف تتضح حتى لو ماذكرتها.
وهذا شيء مايرضي الله ورسوله .. صلى الله عليه وسلم
أرجو منك ومن جميع الاعضاء . قراءة عنوان الموضوع ومحاولة فهمه جيداً ومن ثم قراءة النقاط والبحث فيها وبالمناسبه اثارتي لهذا الموضوع
كانت من شان كلمة " ممنوع " لان هذه الكلمه تحمل في طياتها الكثير والكثير من اللبس وعدم الفهم لدى كثير من الناس .
وهي كلمة صعبه إلى حد النهايه ولا يستطيع اي عاقل اطلاقها بتاتاً إلا بعد التحقق والتريّث في هذا الموضوع
ومسألة ان بعير فلان من الناس ممنوع يجب ان يتم توضيحها للناس عامة ولـ أعضاء هذا المنتدى خاصة ...
في اعتقادي وتفكيري ان البعير اللي يضرب عليه شخص او شخصين فقط عند راعية هذا غير ممنوع ويمكن تقول اني انسان غير عادل
في هذه الميزان ولكن هي الحقيقه بذاتها مادام البعير يضرب له ناقة واحده غير امهاتها ، فهذا غير ممنوع
اعطيك مثال على ماسبق ذكره : -
رحت اتنوّق مع قريب لي عند راع بعير عليه سرا بشكل يومي وعطانا وعـد بعد ثلاث اسابيع رضيت انا ولكن قريبي بدأت عليه علامات
عدم الرضاء .. ودخل في نقاش حاد مع راعي البعير بسبب ان ناقته ميسّر ويبي يضربها حالاً . تدخلت وختمت الموضوع فلما خرجنا جاني من بكره
في مجلس عام وقال : راعي البعير الفلاني مانعه فتصديت له و وقفته عند حده ولا اعلم لهذا المنع اي مبرر
فتصوّر سهولة خروج هذه الكلمه عند الناس في شيء لم يتم منعه .. فما بالك عن اشياء كثيره على ألسنة الناس
والحقيقه صدق الشاعر في قصيدته اللتي قالها ، وكل حرف منها يسوا قصيده
ودنا بالطيب بس الدهر جحاد طيب .. / .. كل ماتصدق مع الناس كنك تغشها
يدك وان مدت وفاء لا تحرا وش تجيب .. / .. كان عادت سالمة حب يدك وخشها
..
أبيات لـ أبن جدلان عبر فيها عن شعوره تجاه الناس وحاجاتها في هذه الحياه وهي تكون البلسم الشافي لكل ذي عقل وحكمه

حياك الله يبن غانم مجددا ونا مدري وشتدور حوله لكن بذكر قصه حصلت لشايب في السابق يقول جيت لي بعير طيب وراعيه مهو بعنده وحديت عليه ناقه واضربها وطمعت ويوم انه فاق حديت الثانيه واضربها وهو يجي صاحب البعير زعلان ويبي يحول البعير غصب يقول وقمت عليه ومسكته غصب الين حول البعير ولقحت الثنتين وجابت بكرتين ماضموها البدو.
سؤال: هل تعتقد ان هالشايب بيقول الله يبارك له في بعيره والله يرحم والديه وللا بيقول خذت الحفنه من يد العفنه ؟
فيه اهل فحول يهينون صاحب المطيه قبل السماح والطيب مايستوي مع الردى لانه حتى لو فتح حسابات كما ذكرت والله رزقه ببكره طيبه ماراح يمدح لانه عارف ان صاحب البعير ماهو على مستوى المدح والشاعر ابن حمده يقول:

تلقا العد جما ريهجان ولو ماسال *** وللا الرس مايسقيك لو سالت رموسه

ولك خالص تحياتي.

الاخ علي المرعي

مرحبا بك أنت وسوالفك كلها ، على الرغم انها خارج إطار الموضوع ، ولكن ياحبني لسوالف الأولين من غير قصور في التالين
والعبره لمن أعتبره ..
وش رأيك من يكون المخطي في المقام الأول أو بالأحرى من هو المعتدي ومن يكون المعتدى عليه لو حصل لا سمح الله اشكال اكبر من كذا
ولكني أعيد وأكبر واقول : للظروف احكامها يمكن يكون البعير " محمي " والا فيه عوق يعـوقه .. والا .. والا ..
رغم إني استنكر رفض راعي البعير وعدم السماح لهذا الرجل ، عموماً أدخلوا البيوت من أبوابها
ودائماً الدخول مع الباب افضل من النافذه .. حسب معرفتي في ذلك .
مفهوم الناس عموم ان البعير ملك للناس جميع وهو بالفعل .. ولكن يجب المراعاه وعدم التعدي سواء بالحيله أو الخدعه
أنا عاذر راعي البعير في حالة واحده فقط ، وهي إذا كان البعير فيه شيء لاسمح الله وفي نفس الوقت ألوم راعي الناقه
على عدم الاستئذان والتعدي على حلال الغير بدون رخصه
الامثال تأتي بالامثال وتقرب المفهوم للعمـــوم ..
أعرف واحد - عنده ركاب في مراحه ، شي مربوط وشي ساره مع امهاته . صدفه جاء واحد يبي يضرب على بعير كان مربوط
ولا وجد راعي الإبل وكلم الراعي في ذلك وقال الراعي : أصبر حتى يجي راعي الشأن .. ولكنه لم ينتظر هد واحد من الركاب
على ابله في طرف العزبه وعند ذلك عصى البعير عليه يبغي البعير اللي في امهاته وحصلت بعد ذلك معركه هم وياه
واعانهم الله وردوه بعد ضربه ولا حصل ضراب لهم واستخاروا بعد ذلك فما بالك لو استطاع البعير للوصول للبعير اللي في الابل
وحصل مايحصل بين الركاب
هل نقول : خطأ غير مقصود والمعذره لان الخطأ ماهو من راعي البعير ؟ وكأني بصاحب البعير يتمثل بالبيت الجاهلي ويقول :
ألا لا يجهلنّ أحد علينا .. / .. فـ نجهلُ فوق جهل الجاهلينا
أسعدني مرورك الكريم يابو مرعي ، ولازلت ارغب بمشاركات عديده من اخواني في المنتدى لمصلحة الجميع

.. دمت بود

حي الله جميع الاخوان من غير عدد بالنسبه للي يمنع عن بعيره او يرد عنه هذي مي من شيم الرجال ..........

اتمنا من جميع من يملك ركاب طيبه ان يفتح المجال لجميع من اراد الضراب لكي يدعا له بالبركه ويزيد في حلاله

الي يرفض الضراب على بعيره لا يذكر اسمه ولا وين موقعه لاكي ما يتعنا الرجال على الفاضي مع انهم قله ان شاء الله

والله الموفق لما فيه خير

وانت تقول : فيه ركاب ممنوعه ولكن لعدم الإحراج مع اهلها مانبي نذكر أسامي ..
وانا اقول : إذا مثلاً وافقناك في الرأي الإحراج راح يحصل بطريق غير مُباشر .. لان الركاب المنتجه معدوده على رؤوس الأصابع
فـ إذا عديت بعضها وتركت الباقي ، سوف تتضح حتى لو ماذكرتها.
وهذا شيء مايرضي الله ورسوله .. صلى الله عليه وسلم


مرحبا ياذياب

اذا عدينا الركاب اللي ماتمنع فانها تستاهل واهلها يستاهلون واقل مانسويه لهم مدحهم وذكر علمهم الطيب

وراعي البعير اللي انتاجه له فقط او للي عنده وراهم مصلحه او لهم عليه معروف سابق واللي غيرهم ما يسمح لهم هذا ما حن بذاكرينه انا واللي يوافقني الراي
اما إذا عديت بعضها وتركت الباقي ، سوف تتضح حتى لو ماذكرتها.
وهذا شيء مايرضي الله ورسوله .. صلى الله عليه وسلم

اعتقد ان اللي ما يرضي الله ولا رسوله هو العمل بما ورد فيه نهي ونحن لم نعمل بما نهينا عنه بالعكس اجتنبنا ذلك

واما الرجال اللي مثل ما ذكرت في سالفتك انت وابن عمك فابن عمك مله حق عليه وهذا مسوي سرا لبعيره ولا لاحد عليه كلام ويصبر المتنوق صبر الرجال اللي قدامه واللي ماهو براضي الركاب واجد يدور له بعير غيره ولاهو بمكلوف بالبعير ذا بالذات والناس اللي يضيعون واجد

وبالنسبه للعنوان مع احترامي لكاتبه في غير محله حسب مافهمت من كتابتك
وانت تقول انك فاهم كلامي

والسبب اني انا وغيري من الاخوان لم نحكم على اي بعير انه ممنوع ولم نذكر اسم احد او نرمز لاحد بعينه فما ادري ما مناسبه عنوان الموضوع
ولا ادري هل ترغب ان نذكر اسماء ناس ونشهر بهم لانهم مانعين ركابهم او ماتقصد بالادله والاثبات

هدفي منع ذكر الناس بما يكرهون وعدم توهيق اعضاء المنتدى بذكر بعير راعيه مايجمل ولا يقدر لان الكثير من الاعضاء يثق في المنتدى وفي الاعضاء وما يكتبون ويروح على ذكرهم لقناعته وثقته فيهم

وسلامتك

السلام عليكم ورحمة الله وبركاته

اشكرك على الكلام الطيب هذا وان دل يدل على طيب اصلك وبخصوص الموضوع لا يجوز شرعا المنع الا اذا كانت في
اسباب مثل فتور او مرض اما اذا كان من من يقولون ابي هالانتاج لي فانا اشوف انها من الانانيه ولاهي من اخلاقنا
وتقبلو تحياتي وجزاك الله خير