اللي عنده سوال عن زيان الابل ما عدا المجاهيم

تحيه

الاخ محمد العطوي

صورة القعود غير واضحه

لذلك ما اقدر اعطيك رايي

حاول ترسل صوره واضحه

وابشر بكل خير

اخوك
عبدالله بن مطلق المزحمي

الاخ عبدالله

هذى صورة ثانيه للقعود

تحيه

الاخ محمد

القعود فيه عذارييب

ماله خشمن طافح واذنه رديه
وله عيز واظن ان جرمه ادون شوي
ولو انك ماصورته زين

القعود عادي مافيه شي يجذب

واذا انت متأكد من ساسه وتعرف ابوه وامه وشايف خواته
ضرب فيه ناقتين ولا ثلاث وشف برقه

هذا رايي فان اصبت من الله واذا اخطئت فمن نفسي والشيطان

اخوك
عبدالله بن مطلق المزحمي

السلام عليكم ورحمة الله وبركاته
استاذي الفاضل عبد الله المزحمي لو تكرمت الله لايهينك اذا عندك اى معلوم عن ابل الامير / فهد عبدالله ال سعود قائد البحرية طبعا ســــــــــــــــــؤالي عن الوضح ولو تفيدنا اذا يوجد عندك صور لها
اخوي عبدالله امتلك من ابل الامير قعود

وجزاك الله عنا خير الجزاء ووفقك لما يحب ويرضي

تحيه

الاخ سعود

اما بالنسبه لابل الامير فهد بن عبدالله

ما شفتها ولكن الامراء ما يقنون الا الطيب

اما بالنسبه للقعود اللي عندك لو انك قبل لا تشتريه

قلت لراعيه ابغى اشوف ابوه وامه واخواته

لانك شاري قعود تبغى تفحله

اما المشتري من ناس يقولون هذا ساسه من كذا
ماهوب صحيح

ويعلم الله انا كنا ننصح الناس انهم لا يشرون قعدان ما يعرفون ساسها


واسمحلي على عدم افادتك

اخوك المزحمي

الاخ الفاضل ابومطلق
اولا : شكرا على تجاوبك
ثانيا : ابشرك ولله الحمد لدي فحل طيب وقعود طيب علي احد زمول ابن فنيسان
ولكن حبيت استزيد من الابل الطيبه ومن باب التنويع بين معامق الفحول المعروفة
و لا اخفيك اني شفت مجله عرضت فيها ابل الامير قبل ثلاث سنوات ورايت الفحل وعليه ملاحظات كثيره من قصر الرقبه وبعير اسطل ولكن المساله معمق والقعود اللي عندي متاكد من اصله وشكلة قريب من ابوة وسؤال لك يا بومطلق توقعت معرفتك بابل الامير ولتوضحلي اكثر من صورة مجلة

ولك جزيل الشكر

تحيه

الاخ سعود البدراني

نسأل الله ان يوفقنا واياك لما يحبه ويرضاه

اما بالنسبه لشكل بعير ما عليك منه ,واهل النظر

والامراء والتجار عندهم وكلاء اهل صنف

ولا يفحلون بعير الا شايفين انتاجه .

تأكد من ساس القعود ومن امه وتوكل على الله سبحانه

وحياك الله في كل حزه

اخوك
المزحمي

الســــــــــــــــــــــــلام عليكم ورحمة الله وبركاته

كيف الحال يابو مطلق
هذي صورة بعير الامير فهد قائد البحريه ابو القعود اللي ذكرتلك اتمنى يابو مطلق ابداء مرئياتك حول البعير ولك جزيل الشكر

اخوك سعود

تحيه

وعليكم السلام ورحمة الله وبركاته

الاخ سعود البدراني

عذارييب البعير كثيره

لو ان راس البعير ماهو بواضح

ولكن سيف لحيه قصير وتصاغر راسه

ورقبته رديه وقصيره ومطلعها ردي

جرم البعير ادون اللون شقح والبعير جنبه قصير وغاربه كذلك

ولافيه سنده وذيله طويل وعرقوبه اركز


وهذا بالنسبه لشكل البعير اما مايحكم البعير في سنه هذا انتاجه

والامراء مثل ماقلتلك مايهدون بعير الا عارفين ساسه وشافين انتاجه

وانت ارسل صورة القعود واذا امكن صورة امه وابشر بكل خير

اخوك

المزحمي

الســـــلام عليكم ورحمة الله وبركاته

اخوي ابو مطلق هذي صور القعود وعمرة لقي

ولك الود والاحترام

تحيه

الاخ سعود البدراني

نسال الله ان يبارك لنا ولكم ويرزقنا الاخلاص في الاقوال والافعال

وانا ابغا اعطيك رايي وبعيد عن المجامله لانه من استشارك دخل في ذمتك

الاخ سعود القعود مبروك وعذارييبه مثل عذارييب ابوه

ورايي انك ما تفحله وتشوف لك قعود غيره

اخوك

المزحمي

ابو مطلق القعود ماني ناوي افحلة انشاء الله

ولكن وش رايك بهالهرش علما بان انتاجه من جميع الوان المغاتير

تحيه

الاخ سعود

البعير عذارييبه كثيره

الراس تصاغره وتركيبته ماهيب التركيبه المطلوبه

والبعير جرمه ادون

واللون اشقح

والذيل طويل

ولكن البعير في هذا السن مايبغاله رايي

يحكمه انتاجه اذا كان انتاجه طيب هذا المطلوب



اخوك
المزحمي

بيض الله وجه الجميع

تحيه

الاخ صالح البلوي

ووجهك ابيض

اخوك
عبدالله المزحمي