اللي عنده سوال عن زيان الابل ما عدا المجاهيم

تحيه

الاخ ثامر

و وجهك ونسأل الله ان يوفقنا واياك

تحيه

الاخ عادل

وعليكم السلام ورحمة الله وبركاته

نسأل الله ان يبارك لنا ولكم

بالنسبه للقعود

فيه خمسة عذارييب اللون الرقبه والجرم والراس عادي والقعود ماهوب سخيف

لونه ماهوب الوضاح المطلوب وكذلك جرمه صغير ورقبته قصيره ولحمه واجد

اما ظهره متنكس وكذلك عرقوبه طيب

ورايي اذا ابلك طيبه وتبغى انتاج طيب شف لك قعود غيره

المزحمي

تحيه

الاخ مبارك

وعليك السلام ورحمة الله وبركاته

ونسأل الله ان يوفقنا واياك وجميع المسلمين

ويتقبل من صاحبك الدعاء

لو صاحبك مصور القعود وهو معترض افضل حتى يبين القعود زين

والواضح من القعود ان سنامه متقدم وراسه عليه ملاحظات كثيره

منها صغر الراس واذنه واقفه وخده ماهوب عريض
وكذلك اللون اشقح وجرمه صغير

ولاهو بواضح عرقوبه واظن عرقوبه اركز

القعود بوجه عام اقل من الوسط

اخوك
المزحمي

الاخ عبدالله المزحمي وش رايك بالبعير من ناحية الانتاج وليس المزاين

السلام عليكم أخوي عبدالله بغيت رأيك بالناقة
وتقبل تحياتي

مجهود تشكر عليه يابو مطلق ومن قرابة الخمس سنوات لم تبخل على من استشارك الله لايضيع لك تعب ويوفقك .

تحيه

الاخ بندر

صورة البعير ماهيب واضحه

لان طال عمرك اذا صورت البعير وهو معطيك جنبه وماهوب ملتفت تقدر تحكم عليه زين
تشوف رقبته وجنبه وظهره وكل حاجه

اما في صورتك ذي والواضح منها البعير فيه ملاحظات ثلاث

البعير ماهوب نظير
البعير متساوي وماهوب متسند
وعرقوبه اركز
و خذها عندك قاعده كل بعير متساوي يجي عرقوبه اركز

اما رقبته غيرواضحه

وراسه اللي مبين منه انه ماهوب شين .واذنه طيبه وراسه مايقاله صغير

لونه طيب

واعتقد طال عمرك والعلم عند الله انك اذا هديته في ابل بداوه يبا ينتج

الله يعطيك العافيه أخوي عبدالله ونشكرك على جهودك العظيمة
وحبيت أذا ماكون ثقلت عليك ماذا تقصد بأن البعير يكون متسند
وشكرا لك

أفا.............! أخوي عبدالله عسى ماشر ما ترد عسى الداعي خير !

تحيه

الاخ ناصر

وعليكم السلام ورحمة الله وبركاته

اسمحلي على التأخير بسب كثر المشاغل

تصويرك ماهو واضح .اذا بغيت تصور الناقه صورها وهي معطيتك جنبها

الناقه طال عمرك مبروكه فيها جرمها ادون شوي وكل مافيها صغير
اذنها واقفه

الناقه متسنده وظهرها زين


ونسأل الله اخ ناصر ان يبارك لنا ولك ولجميع المسلمين

تحيه

الاخ حسين

السلام عليكم ورحمة الله وبركاته

نسأل الله ان يتقبل منك الدعاء

والحمد لله سبحانه اولا واخيرا لانه وحده صاحب الفضل والمنه

وبالنسبه لهذا الموضوع ابشرك اني استقبل كثير من الرسايل والاتصالات
على الجوال من اخوان لنا في الموقع ومن خارج الموقع يثنون على الموضوع
ويسألون عن ابل لهم ويطلبون الراي في ابل معروضه للبيع

واذا وثقوا الناس في كلامك وفي معرفتك في حاجه واعطيتهم الكلام الواضح بدون
مجامله وحذرتهم من غش بعض الناس اللي ما تخاف الله .تلقا الناس تدعي لك
ان الله يوفقك ويبارك لك فهاذي تسوى شي كثير

المزحمي

تحيه

الاخ بندر

حياك الله ومرحبا بك في كل ساعه

اسأل طال عمرك ولا يصير في خاطرك شي وانا حاضر بكل حاجه

بالنسبه لمعنى متسند

اذا البعير عطاك جنبه :يكون غاربه ارفع من وركه

المزحمي

أخوي عبدالله لا هنت يا طيب والله يوفقك ويعينك على أشغالك .

السلام عليكم ومساك الله بالخير يأخي عبدالله
ودي أعرف رأيك بالناقة وبكرتها
تقبل تحياتي

الله يعطيك العافية أخوي عبدالله ومشكور على معلوماتك القيمة