صباح الخير للجميع اذا تكرمتو استفسار يالربع

اخواني الاعزاء
عندي نياق اباكير اول مره ولادتهن لاجيت احلبهن بركن ولانفع فيهن لا عقال ولا ربط وتعبت منهن
من عنده خبره يشرحلي الطريقه الافضل الله يجزاه خير فالعقال يبركن وفي ربط الارجل يبركن وبدون ربط يبركن
الحل الله يجزاكم خير يالربع ولا استغني من مساعدتكم يالنشاما ولكم الشكر

وعليكم السلام ورحمه الله وبركاته

بالنسبه للابكار غالباً يجي طبعها كذا

يبيلك تطبعها بالخبز و تحككلها

ولا تضربها ولا تجفلها لين تتاكد انها صعبت بعدين ابدا بحوي الناقه مع فخوذها واحلب لازم تنضف الناقه بعد ما تشرب حوارتها منها

عشان ماتضر الحوار

واذا صعبه اعقلها وخل الحبل فيها على طول

فيه ناس يرسلون الناقه يحط الرسن كنها رحول ويربطها بعمود اذا جاء يحلبها بعض البل تقعد فتره وتطبع وبعضها اذا بدايتها غلط تستمر


بس وانا اخوك احذر من بروك الناقه واذا بركت على طول اضربها عشان تقوم لا تصير بروك وتتعود على انها تبرك

واتمنى لك التوفيق

حط لك ماصوره واربط حبل شرط في حلق الناقه وقصر فيه وخل عندك سكين ومسح على الناقه واحلب واذا بركت خلها لين يخنقها الحبل وينقطع منها النفس وتذرق الله يعزك لا يلين قلبك خلها لي شفتها خلاص بتموت قص الحبل بالسكين .طريقه قاسيه شوي لكن هي مره وحده وصدقني ما راح تبرك نهائيا بس تحط الحبل في رقبتها لين تتعود على الحليب.

السلام عليكم ورحمة الله وبركاته جيب درام و خله تحتها وخيزاران لما بركت اضربها ضرب قوي (يوجع) على شان تحرم تبرك وقيد خلفي

قيدها من رجولها
وإذا جيت تحلب حط تحتها درام صبغ (( معدن ))
وخلها بالقيد لين تطيع
والبكر غالباً تأخذ لها أسبوع إلى عشرة ايام

بيض الله وجهكم وكثر الله خيركم على الشرح الواضح
ولاهنتو على ردودكم يالربع

اخوي عبد الله الاخوان ماقصرو وكل ارائهم طيبة
بس ابعلمك بطرقتي انا وبكرن كانت عندي دبلت كبدي ودبلت كبدها
مالقيت اخير من انك تطول بالك عليها وتكون بارد معها واحلبها بدون حبل بس لازم تسطي عليها واذا شفتها بتبرك اتركها وعلى هالحال اسبوع عشرة ايام وتركد هي تبرك خوف مهوب نحاسة وكل شي الا ضربها يجننها ويروعها

كفوو وفو الاخوان وفيه تجربة ناجحة حط ابو عقيدة على شكل كورة واذا جات تبي تبرك حطه تحت زورها واذا قامت اسحبه وتقبل المرور يا عزيزي ,,,

الاخوان كفو ووفو
وانا بعلمك بطريقة وهي
الاباكير اللي عندك كتفها من اثفانها برباط ووثق رباطها بحيث انها لابغت تبرك يرغمها الرباط على عدم البروك والى تحايلت عليك وانسدحت فــــــــحل رباطها وثورها مرة ثانية ووثق رباطها وخل معك عصا وخل واحد عند راسها يلقمها خبز
وبالطريقة هذي اسويها مع اباكيري وماياتي عليها شهر الا تقلطني وترحب بي
وللعلم ان البل ماهيب سوا وكل له طريقته

السلام عليكم
ماقصرو الاخوان
لكن فيك من يمسك العلم يولد ابتعد عن العقال هو الي يخلي الناقه تبرك اذا مو متعوده عليه
ومن واقع تجربه 100 % على اباكير عندي يبركن اذا جيت ابحلبهن والحل طال عمرك
جيبلك مربوعه خشب طولها متر ولف عليها سيم شايك واربط بطرف المربوعه حبل والياجيت اتحلب الناقه حط المربوعه من تحت زور الناقه واحذف الحبل على غارب الناقه واربطه بالطرف الخر من المربوعه بحيث اتعلق المربوعه على غارب الناقه واتكون المربوعه تحت الزو ر واحلب الناقه واذا جت تبي تبرك يبغزها السيم الشايك وبتقوم على طول 3 مرات وباذن الله ماعاد تبرك مجربه 100 % وبعدين البكر لاتربطها ولاتعقلها وتراهن يصيرن هديات