يا لجنة التحكيم

يا لجنة من كل شكل وقبيله *** الله يوفقكم طريق الرشادي
---------------------------

عندي اسئله موجهه الى لجنة التحكيم المجاهيم والمغاتير وكل من عنده خبره

=============

1- وش الفرق بين السماري والرسغ والخف

2-وش الفرق بين الفقار والعيز والورك

3-وش الفرق بين العضد والكتف والذراع والمنكب

4-وين حدود الظهر وهل هو يشمل الغارب

5-ابي شرح تفصيلي لزين العرقوب لاني اسمعهم يقولون اركز-اهزع-جليل -رهيف

6-وش معنى الازوح؟ وهل يمكن يكون البعير افجح وازوح؟

7-هل ممكن يكون البعير ليس افجح وفي نفس الوقت يكون شخر البعير طيب ؟

8- وش الفرق بين المعذر والعفس والمصنه والصنقر والعلباء ( ارجو شرح الزين )

9- وش الفرق بين العرنون والغضروف والخشم والاطيمس ؟

10-هل تختلف الثفنه عن الفخذ ؟

=========

ارجو الشرح ولو بالصور لاني احب اتعلم والعلم من الخبره مثلكم ليس عيبا

والله بصراحه ودي أعرف عز الله جبت اللي بخاطري ياليت لو احد يبين لنا بالصور اذا أمكن ؟؟؟؟

شاكر لك يابن لاحم

لعل في هذا الرابط اجابة لبعض اسئلتك


http://www.mzayan.com/vb/showthread.php?t=3516

الى الان ما لقيت الجواب الكافي

ارجو التعاون والافاده

http://www.mzayan.com/vb/search.php

هنا اكتب اي شي تبي وتلقاه ان شاءالله

هلا يا سالم

بعطيك الجواب حسب عرفي وكلن له رايه

===

هذي صورة مفصلة يمكن اكثر الاجوبه عليها




1- وش الفرق بين السماري والرسغ والخف

السماري هي اسفل الخف وهي ماطى المطيه والخف فوقها وموضحه بالصورة وهي لاربع المطيه واما الرسغ فهو المفصل بين الخف ومحل القياد

2-وش الفرق بين الفقار والعيز والورك

الفقار هو الورك واما العيز فيوجد فقط اذا تقدم السنام فيقال للبعير عيز او حقو او مركابه ولاهوب دايم للمطية عيز والعيز يعتبر من عذاريب الزين

3-وش الفرق بين العضد والكتف والذراع والمنكب

الكتف هو المنكب والذراع موضوح بالصورة اما العضد فهو بين الذراع والكتف

4-وين حدود الظهر وهل هو يشمل الغارب

الظهر من النسنوس الى الفقار

5-ابي شرح تفصيلي لزين العرقوب لاني اسمعهم يقولون اركز-اهزع-جليل -رهيف


من رأيي ان العرقوب الرهيف الاهزع هو الزين

6-وش معنى الازوح؟ وهل يمكن يكون البعير افجح وازوح؟

الازوح اللي الى من مشى وتقفيته شفت عراقبيه تحاك ولابعد شفت بعير افجح وازوح ولكن يمكن يجي البعير افجح وازوح

7-هل ممكن يكون البعير ليس افجح وفي نفس الوقت يكون شخر البعير طيب ؟

شخر البعير يقصد به المسافة بين فخوذه وكل ما تباعدت كان شخر البعير اطيب والى جاء مع وسع الشخر فجحه فاطيب واطيب

8- وش الفرق بين المعذر والعفس والمصنه والصنقر والعلباء ( ارجو شرح الزين )

هذي مسميات تختلف بين العرب والزين هو المعذر اللي كانه معذر فرس وعريض مهوب سيور الرقبة بينه ولا له صنقر


9- وش الفرق بين العرنون والغضروف والخشم والاطيمس ؟

الغضروف هو الخشم هو الاطيمس ولهجات تختلف واما العرنون فيختلف وموضح في الصورة

10-هل تختلف الثفنه عن الفخذ ؟

نعم الفخذ تشمل الثفنة ويمتد الفخذ الى فوق العرقوب والثفنة حتى البركه

وتشوفهم في حلب النحوس يربطون حبل ويكون على الثفنة

=========

وهاذا اللي عندي وعفاك

اخوكم && عرار ابن ظافر الدوسري &&

اخي سالم السلام عليكم ورحمة الله وبركاته
اولا : الله لايهينك على طرح الموضوع والأسئلة الهادفه لتعم الفائدة
ثانبا : نأسف على تأخر الرد وذلك لكثرة المشاغل
ثالثا : الرسم المشروح أجاب على الكثير من الأسئلة

1- وش الفرق بين السماري والرسغ والخف
الإجابة على الصورة

2-وش الفرق بين الفقار والعيز والورك
الفقار : هو يأتي من ماقف السنام من الخلف إلى عكرة الذنب
والجميع يقول هو اللذي يأتي بين الوروك

العيز : ويتحكم به السنام ويقع بين مشارف الورك والسنام وهو من الفقار
الورك : وهو العظم اللذي يصل الرجلين با الفقار

3-وش الفرق بين العضد والكتف والذراع والمنكب
الأجابه على الصوره

4-وين حدود الظهر وهل هو يشمل الغارب
الظهر يشمل الغارب والسنام والفقار ، والمعروف السنام والفقار

5-ابي شرح تفصيلي لزين العرقوب لاني اسمعهم يقولون اركز-اهزع-جليل -رهيف
العرقوب الأهزع افضل شيء ويكون جليل وبارز

6-وش معنى الازوح؟ وهل يمكن يكون البعير افجح وازوح؟
هو اللذي في ارجله انحراف إلى الخارج ، ولا تجتمع الفجحه مع الزوحه

7-هل ممكن يكون البعير ليس افجح وفي نفس الوقت يكون شخر البعير طيب ؟
نعم

8- وش الفرق بين المعذر والعفس والمصنه والصنقر والعلباء ( ارجو شرح الزين )
كل المسميات متشابه ما عدا الصنقر وهو قلة المطيه وإذا تردى المعذر برزت عظمة
الصنقر من الخلف
وكل ما طفح اللحي زان المعذر

9- وش الفرق بين العرنون والغضروف والخشم والاطيمس ؟
الخشم اسم شامل والباقي مشروح في الصوره

10-هل تختلف الثفنه عن الفخذ ؟
الثفنه تأتي في المفصل اللذي بين الفخذ والساق وهي موضحه في الصوره

[motr]ونستشهد بهذه الأبيات من قصيدة للشاعر شلعان الدوسري رحمه الله[/motr]

[poem=font=",6,darkred,normal,normal" bkcolor="transparent" bkimage="" border="none,4," type=0 line=0 align=center use=ex num="0,black""]
مجاهيم جاذبها الفحل والوجيـه زيـان = وســاعٍ مرافقـهـا طــوالٍ خطاويـهـا
جليلات عظم الساق مرفوعـة الحجـان = طـوال الـرقـاب مشرهـفـات أذانيـهـا
عراض الخدود اللي تماري بها البـدوان = كبـار الفقـار موسعـة صـدر راعيـهـا
مجاهيـم رمليـات لخشومهـا نيشـان = ترافـض بـلا دمـهـا حــدادٍ نواصيـهـا
هوى القلب خطوى نايفة والضلوع متان = تجـي بالحـلا والزيـن وتـرد بـه فيهـا
كبيرة مزر الورك فجحا مـن السيقـان = تخنـطـل قوايمـهـا كـبـارٍ مواطـيـهـا
تمايـح بذبـلٍ مثـل دراهـة الـقـران = نهـار الـطـرب هــذا لـهـذا يوديـهـا
لهـا غـاربٍ متقـدمٍ شامـخٍ ملـيـان = يدافـر حبـاك العـيـز والعـيـز حاليـهـا
وساع منادغها مـن الـزور للكعيـان = بهـا كـل شـيٍ زيـن والملـح غاشيـهـا
طموحٍ تحذف أشناقهـا واسعـة بيعـان = فـروعٍ فتـون البـيـد عـسـمٍ أياديـهـا
ولا رايعت كن المعنـق علـى رمـان = تعوجـه مـن العاتـق خـفـوقٍ لواحيـهـا
سنودٍ من الغارب فسيحة من الذرعـان = عسـى ربنـا مـن شـر خلقـه ينجيـهـا[/poem]

الاخ : عرار بن ظافر

الاخ: ابو مبارك

يعطيكم العافية على الشرح الوافي المدعم بالصور

وعلى حسن تجاوبكم مع استفسارات الاخوة الاعضاء

وتقبلوا فائق الود والاحترام

الاخ : سالم لاهنت على الطرح الهادف

ولا هانو الاخوان عرار وغانم على الشرح المدعم بالصور

بيض الله وجيهكم على التفاعل

واخص بالذكر

عرار ابن ظافر الدوسري

وغانم مبارك ال عمار

ولاهي غريبه عليكم يا عيال زايد العلوم الطيبة

وحقيقة انكم شرحتوا شرحن وافي بالصور ولا عاد عليه تعدي

رد: يا لجنة التحكيم

موضوع وافي من وافين

ومفيد ويعتبر مرجع لمبتدئين

والله يعطيكم العافية