الوسم ورايكم فيه

السلام عليكم
في الحقيقة ودي استشيركم بالوسم اللي على الوجه
كلنا يعرف ان الوسم اللي على الوجه حرام او مكروه

لاكن المشكله ان الواحد لازم يحط وسم ربعه واهله
وش رايكم الواحد يغير محل الوسم يعني مثل ينزله على الرقبه
والا يحط وسم جديد يخترعله وسم .

والله يعطيكم العافيه

شف وانا أخوك يا صالح

مراقبة الله وأجتناب نواهيه من أولويات المسلم في هذه الدنيا

أنا وسم القبيلة وشاهد خامسنا كلها على الخد من يسار ..

وهذا حرام ..

فلذا رجعت الوسم والشاهد في أول الرقبة من جهة الرأس

متحاشياً وجه المطيه ..

زعل من زعل ورضي من رضي ..

فلذا نصيحتي لك أن تفعل ما فعلته أنا

تجنب الوجه وضع وسمك في أول الرقبة من جهة رأس المطيه

بيض الله وجهك يا طلال , نعم الفعل ونعم المشورة

عليكم السلام ورحمه الله وبركاته

تجنب الوسم اللي في الوجه افضل خاصه اللي يدي الي تشويه الوجه كالمطارق الكبيره على الخد او الخشم

طلال بيض الله وجهك وشورك وفعلك كله خير , الله يبارك لك في عيالك و مالك وحلالك .

الاخ صالح جدي رحمه الله اول من غير وسمه من جماعتنا بعد سماعه الاحاديث اللتي تتعلق بالوسم على الوجه في اذاعه نور على الدرب

وغيره من الخد الى الفخذ وصدقني استفدنا من تغيير الوسم وكان هذا سنه 89