الى خبراء المزاين .......؟

تحيه للجميع وبعد
سوالي لكم عندي ناقه (خيار) شريها وهي لقحه ما أدري عنها على أي بعير طبحتلها بقعود عمره الآن 5 شهور القعود كفو عدا أن رقبته عنجا وقصيره ..
السؤال : هل أحكم على الحوار الآن أم أنتظر عليه

السلام عليكم ورحمة الله وبركاته


الاخ خالد انكان احوالك الماديه متصلحه لاتفحل لنك ماتعرف ابوه وساسه

ويمكن ساسه يكون ادون عن المستوى المطلوب

وذا احوالك الماديه ماتسمحلك تشتري فحل طيب اصبر عليه يمكن الله يرزقك منه ويكون ساسه طيب

ونصيحه لاتفحل على الشكل فحل اللي ساسه طيب من امه وابوه

والجنادريه مليانه من الفحول اللي اشكالها طيبه وانتاجها قصاب والسبب ان ساسها ادون

يا خالد كلام الاخ عناد سليم 100%


شف عندك حل انك تسئل اللي شريت الناق منه وتحاول تجيب العلوم

ان ما قدرت بعه

حراااااااام تصبر خمس سنوات على شئ ما تدري وش اصله

عسى الله يكتب لنا ولك الخيره

ماقصرو الاخوان عطوك العلم

أنا أقصد العنجه اللي في رقبته
هل أحكم عليه من الآن أنه عنج أم لا

وشكرا عى مروركم

السلام عليكم ورحمة الله وبركاته
العنجه ترى ما هيب عذروب فادح والعنجه اهون من القصره يعني المطيه العنجاء اهون ومقبوله اكثر من اللي لها قصره يعني رقبتها طايحه في الارض وانا بودي انك تصور الحوار صوره لا تزينه ولا تشينه صوره تحاول تجيب شكله العادي ثم تعرضه لان غالبا الحوار الطيب ما يجيبه الا بعير منتج ومسألة الانتاج بعدين في البعير هذه مساله يطول شرحها وياما بعارين مكفوفه كف من ناحية الام ومن ناحية الاب وجاء حشوها ردي ويوجد بعارين اعتمادهم الاصلي على ابوه وساس ابوه والا امه رديه وساسها ردي وانتجت هذه الفحول اللي امها رديه وساسها ردي وهذا امر محير صراااحه لكن لله حكمه في ذلك وحكمة الله غالبه .
ولكن هل تتعدل العنجه التي في الحوار هذه مساله لا احد يقدر يفتيك فيها سوى اسرار الحاشي واخوانه من البعير هل اذا كبروا تعدلت عنجنهم او تحسنت قليلا او تبقى كما هي والله اعلم
ويبقى شي مهم يا اخي صور الحوار وحاول تعرف ابوه وهات الصوره ولعلي اقدر افيدك قدر الامكان واذا تبي تتصل علي هذا رقمي 0541946661 والله الموفق

حسب خبرتي البسيطه
بعض الحيران تتغير بشكل غريب في كثير من الصفات والعنج ممكن يتعدل
ولكن القصر في الرقبه ما اعتقد ان رقبته بتصير طويله اذا كبر
مادام انك مقتنع بباقي تهايا القعود فاصبر عليه لين سهيل/ السنه الجايه يعني بعد سنه وشهرين من الان وقرر بنفسك

الله يجزاكم كل خير على كل المعلومات التي تقدمونها .. وشكرا لكل من تجاوبي معي في سوالي

أنا اقول ياخالد لاتستعجل على الحوار إن كان راسه زين فاصبر عليه ترى الحوار يتمغط ويتوسع ويجي عليه أكثر من شكل ولا يثبت إلا من ثني وورا

راااااااااااااااااااااااااح