عندي ضرايب والضراب جاي

السلام عليكم
كيفكم يارجال عساكم طييبين
عندي ضرايب ابي ابيعها ولا ابي فحول طيبه انتج عليهن

وياليت اللي عنده علوم الفحول الطيبه المنتجه اللي عند الحوات الغانمه يذكر لي اسماهم ومحلاتهم وياليت الي عنده علم منهم مايبخل علينا

وسلا متكم

مرحبا فيك بين أخوانك في منتدانا

إن شاءالله الأعضاء راح يفيدونك لكن حدد مكانك حتى يفيدونك إذا أحد حولك قريب من أهل الفحول الطيبه يدلونك

يارميزان الله يوفقك في الدنيا والآخره

عاد أنتم هل البل وهل الزين يالدواسر

وانا والله لو عندي فحل منتج مايغلا عليك

وانت ماذكرت ضرايبك وش لونها

وان شاء الله الأخوان مايقصرون معك ..

ضرايبي مغاتير وانا بالأفلاج واهل الأفلاج المغاتير عندهم ماهيب واجد اهل مجاهيم وانا ابي البعير الطيب المنتج

مرحبابك

عند ابل الشيخ محمد بن نايف بن شويه

عنده فحلين
الاول اخو تمام
ومنتج انتاج قوي

والثاني

ولد بعير ابن قريع الدوسري اللي اشتراه الامير تركي بن محمد بـ 4000000

ومنتج ايضا انتاج قوي

ومكان الابل في الصمان

بيض الله وجهك ماقصرت والأخوان ماقصرو

رميزان كم عدد الضرايب واسنانهن ؟

العدد ثمان الأسنان متفاوته عجم وثنو 4 امهات ثالث و2 ام رابع

مرحبا يارميزان لا من بغيت حياك الله وانا اخوك ارسل البل وازهلها الفحل عندي

تسلم الله لايهينك ولا يهين الأخوان الي شاركو معنا وافادونا وين محلك وياليت تعطيني وسيلة اتصال لاهنت وجزاك الله خير

رد: عندي ضرايب والضراب جاي

مرحبا يارميزان

اسف على التاخير

موقعي بالشرقيه في النعيريه