سؤال للمضمرين أصحاب الخبرة

السلام عليكم ورحمة الله وبركاته

يالربع عندي بكرة صغيرة عمرها 10شهور واصيل وادربها عند السودانيين وقدلها شهر وزود وفحمت بالآلي ثلاث مرات من 1200متر
التفحيم الاول جابت 2.19
التفحيم الثاني جابت 2.10
التفحيم الثالث جابت 2.19
سؤالي هل تنصحوني اواصل او اكنسل وهل المدة وعدد التفحيم كافي لمعرفة مداها وعلومها.
تنصحوني اصبر عليها ؟؟؟
والتوقيت هذا جيد والا ردي ؟؟؟

انتظر ردودكم ومشكورين

رد: سؤال للمضمرين أصحاب الخبرة

الاخ العزيز بالنسبه للتوقيت كل توقيت يختلف من دوره لاخرى

بالنسبه للتوقيت اشوفه طيب ولاتستعجل عليه

والتفاحيم الجايه يبين طيبه من رداه

ومادام القعود صغير لاتستعجل عليه لين يكبر

وفي قصه صارت قبل شهر

فيه قعدان من انتاج المضمر والمالك المعروف دلبج ب ن صالح الاعرج دربوها عياله ومضمرينه اللي عنده وكنسلوها حقايق

وردوها وقال لاتبيعونها خلوها ا يوم لقت استردها وضمرها من جديد واشرف عليها شخصيا

واحد منها كسر التيم في الشحانيه وباعه ل هجن العاصفه ب مليونين ونص

وواحد اخذ الاول في نفس اليوم ووصل قيمه طيبه ولاباعه والثالث جاب الثاني في احد الاشواط

رد: سؤال للمضمرين أصحاب الخبرة

الاخ حمد ناصر محمد
حاول تفحمها بنفسك وتاكد انها ما شربة ماء واذا اردت ان تكنسلها لاتبيعها علي السودانيين لانهم يعيبونها لك علشان يشترونها وانا اشوف البكرة صغيره حاول تفحمها من الكيلو بس والتوقيت الطيب للكيلو 1.30 يزيد شوي او ينقص وتوقيت 1200 في حدود 1.40

رد: سؤال للمضمرين أصحاب الخبرة

تيم ال 1200 : 1:55 في السباقات و:1:53

ويختلف من دوره لدوره بعض الدورات 1:58

وبعضها اقل

على حسب ارضية الدوره


واصبر يمكن اتطور في التفحيمات الجايه

والله يوفقك ويعطيك منها ان شاء الله

رد: سؤال للمضمرين أصحاب الخبرة

الاخوان حمد الغواص وفيصل المنصور ومفلح الهاجري مشكورين على الردود الكافيه والوافيه والتي شجعتني على مواصلة التدريب
والله يجزاكم خير ويوفقكم دنيا وآخره
واراؤكم تهمني كثيرا
وقد قال الشاعر
( لاتستشير الا الرجال الفهيمه ........ اللي تجاربهم حكم واستشارات )

ومفلح جزاه الله خير قرب التوقيت مني شوي
والله يكتب اللي فيه خير

رد: سؤال للمضمرين أصحاب الخبرة

مع الاخ فيصل المنصور

توقيت 1200 في حدود 1.40 دقيقة

حاول تفحمها كم تفحيمة اذا شفتها حول هذا التوقيت ولا ارتاح من تعبها