الخلفة النحوس XXX

السلام عليكم ورحمه الله وبركاته

اسعد الله مسا الجميع بالخير


هل بالامكان تطويع الخلفة النحوس حتى يزين طبعها ؟
واذا كانت الاجابة بنعم , وش هي الطريقة ؟

رد: الخلفة النحوس XXX

هل جربت تتودد لها من قبل اخوي !!؟؟

رد: الخلفة النحوس XXX

هذا طبع كثير من البل بكر وغيرها تجدها تستخرش بعد الولاده لفترة ، لكن ترجع وتهدى بس تبغى لها شوية صبر وتطبيع ، فان كانت تبرك لا تعطيها فرصة اجلدها على شان ما تدهل وان هي ترد راسها على الحلاب فخطمها في عمود واذا هي ترمح قيد رجليها وان كانت تمشي وقت الحليب فربط في رصرص رجلها اليسرى حبل وشده في وتد اوعمود حتى يقيد حركتها ـ وضروري تحلبها اقل شي مرتين في اليوم حتى لو بالارض المهم انها تضرا على الحليب وتراها بتعاوص لها مده ولكن اسبوع حراويه بتبدأ تركد وتستهدي ، ثم قم بالتخفيف من الحبال تدريجيا ماعدا القيد ماعليه لو خليته يبطي فيها شوي خص لاهي رموح ،،،والله يبارك لك ...

رد: الخلفة النحوس XXX

تطبيعها بالخبز

والشي الثاني الابكار اول ولاده لها ديسها يعورها لي حلبتها

لاتحلبها على طول عودها شوي شوي اهم شي بالاول طبعها حككلها وفي مواضيع اكتب بالبحث وتلقى

رد: الخلفة النحوس XXX

كلام أخواني فيه الكفايـه ...

فارس وفلاح

رد: الخلفة النحوس XXX

اشكر الكل على المرور والرد وبيض الله وجيهكم

الناقه ام ثالث ... مهب رموح لكنها ترد رجلها وحطيت فرجليها قياد
وترد راسها وبحط فيها اليوم خطام ان شاء الله
وما ودي اعودها على الخبز ومعاد تحللب الا بتلقيم


لكن الحمدلله انها لا تبرك ولا تمشي


الف شكر لكل من شارك

رد: الخلفة النحوس XXX

السلام عليكم

الناقه النحوس اوالجهل اللي ماتعرف الحلب لابد لها من الاتي

1 اذا عطفت على حوارها تربط بحبل من فوق اثفانها

2 يكون الحلاب جري بحيث لاتلاحظ عليها الناقه الخوف منها

3 يملكها بقوه لانها اذا رات منه الضعف مره لاتقف المره الاخرى

4 يزين حلبه للخلف بحيث لايؤلمها

5 لايترك الناقه حتى تكونفي حالة سكون تام لكي تعتاد على ذلك

6الاستمرار على هذا الحال مده لاتقل عن اسبوعين

رد: الخلفة النحوس XXX

http://www.mzayan.com/vb/showthread.php?t=6535

وهذا الموضوع

رد: الخلفة النحوس XXX

لا ياخوي بارك فيك الخبز يطبع البكر وتصير تحلبها وأنت تكتنف الطاسة يعني تحلبها برجل وتحلب ديوسها كلها وبدون لقام

أنا مجربة والطريقة ذي خذيتها من شايبي جعل عمره وأعمار شيبانكم تطول بعافية

والشي الآخر اللي أبيك تعرفه إن النحايس نوعين نوع مرتاعة ونوع صلفة إلى كانت حبيبتك صلفة إعمل لها خطام وقياد وإلا صارت مرتاعة القياد يكفيها

أتمنى إني أفدتك ياخوي والكل يكبر ربه

رد: الخلفة النحوس XXX

الف شكر اخوي فلاح عزالله ما قصرت وبيض الله وجهك

لك جزيل الشكر اخوي عالي ونصيحتك ع العين والراس