عندك غرفة سحب او سبق ان فصلت او اشتريت تفضل بالمشورة والاستشارة ؟؟؟!!

السلام عليكم كلن باسمه
وأصبح وأمسي عليكم بالخير
أيها الأصحاب والإخوان والأحباب في هذا المنتدى الطيب



وبودي ان نستفيد من ملاحظات الإخوان الذين سبق وان اشتروا او فصلوا غرف السحب الخاصة للاهل الابل في البر


ولو واحد عزيز عليك وطلب منك ان تخطط له في تفصيل غرفة سحب ؟؟!!

ما هو الأشياء التي بودك يكون فيها والأشياء التي لا يكون فيها

طبعا الطول تقريبا 15 متر
يكون فيها مجلس + مطبخ + غرفة نوم

هل تكون فيها دورة مياه او لا
هل تكون فيها فتحات جانبية في المجلس او لا
هل تكون فيها نوافذ كبيره او صغيره
هل تكون على كفرات كبيره او صغيره .
هل يكون العرض كبير اولا
هل يكون مكيف سبلت او جداري
هل يكون المطبخ جانبي او في الوسط
هل يكون فوق الغرفه دكه اولا
هل يكون فيها دكه سحب جانبيه او لا
هل يكون الديكور الداخلي قماش او خشب
هل يكون مجلس ومطبخ فقط



هذا مخطط تقريبي يا ليت تعدل عليه حسب رغبتك إذا أمكن



لا نستغني عن آرائكم ومقترحاتكم وتوجيهاتكم وانتقاداتكم

حتى تعم الفائدة ويستفيد الكل

وأنا كلي أمل أن الكثييييير إن شاء الله راح يستفيد في المستقبل
وان شاء الله سوف تتوحد الأفكار وتتطور من أحسن إلى أحسن



جعل الله ذلك في موازين حسناتكم

وأجزل الله لكم الأجر والمثوبة

رد: عندك غرفة سحب او سبق ان فصلت او اشتريت تفضل بالمشورة والاستشارة ؟؟؟!!

حياك الله ياعبدالعزيز

والله ماهنا خبرة واجد في الغرف لكن فصلت لي كم غرفه وكل شوي يبان لي ملاحظات

وماحنا بذاخرينها عليك انت وشرواك

اول مابه وانا اخوك الشاصي الطولي خله 45 سم .ولايصير موصل اكثر من وصله على شكل >> وان بغيت تدبل عليه تراه ازين .. والعرضيات خلها تيوبين وبينهم جسر وتيبوبين وبينهم جسر وعلى هالحال ( الجسر اللي يسمونه u )

والمطبخ خله في اخر الغرفه يعني مجلس مدخل مقلط مطبخ والمطبخ له بابين خارجي وداخلي على المقلط والمجلس باب على المدخل والمقلط بابين على المطبخ وعلى المدخل ...ومغسلة في المدخل
ومن خلف المدخل مروش بابه على المقلط

الجدران الداخليه خشب ولا قماش ماهنا فرق الا في الفلوس الخشب ازود تكلفه

ارضية من تحت لفوق مبزر خشب عازل خشب

والجدران لازم عازل
المجلس لايقل عن 7متر والمطبخ لايقل عن 3 متر طول طبعا والمقلط خله ومدخل 2 متر والمقلط 3 متر ان بغيت تزود متر درج للسطح 16 متر

ونصيحه اخو انحش عن الدكه اللي تحت الغرفه والله ماغير تثقلها على غير سنع

المكيفات خلها سبلت المجلس اثنين والمقلط واحد وميكفات المجلس لاتخليها مقابله للبيبان


والمهم ان حصل تخليها على راس تراهااااااااااااا اطيب من السحب بواااااجد وانا اخوك دور لك راس من المواتر الرخيصه وقويه كام ثري ولا ريو ولا اللي متيسره


والدفرنس بيب كفرات دبل قدام وورى ان كانها سحب وان كانها راس

حط لها محورين ولا ثلاثه ورى ورحى المانيه

وعسى الله يبارك لنا والك ويدلنا للي فيه الصالح

رد: عندك غرفة سحب او سبق ان فصلت او اشتريت تفضل بالمشورة والاستشارة ؟؟؟!!

أخوي فهد

بيض الله وجهك

والله يحرم وجهك ووالديك عن النار وكل مسلم

جزاك الله الف خير
على المعلومات المفيده

رد: عندك غرفة سحب او سبق ان فصلت او اشتريت تفضل بالمشورة والاستشارة ؟؟؟!!

ما عندي خلفيه عنها ذاك الزود لكن من الي شفته اقترح عليك اقتراحين ان شاء الله انها تكون طيبه
1- عندك سطح الغرفه ممكن استخدامه دكه حيث انه مساحه غير مستفاد منها خصوصا في الصيف بحكم انها بتكون رفيعه وابرد وتوصل لها اناره بسيطه ودرج
2- الكهرباء لو لتستخدم الطاقه الشمسيه بالا ضافه يمكن تريحك من الازعاج في حالة عدم استخدام مكيفات واوفر لك

رد: عندك غرفة سحب او سبق ان فصلت او اشتريت تفضل بالمشورة والاستشارة ؟؟؟!!

يا شباب نرجو المشاركه ايضا بافضل الورش الي تفصل الغرف بافضل جودة وافضل مواد كلن على حسب ديرته
بالنسبه لي انا شفت تفصيل للرواد الجزيره في الصرار تفصيل اكثر من رائع لا في الشكل ولا الترتيب ولا المواد المستخدمه
والي خابر له غرف مفصله للبيع يعطينا خبر والله يجعل شيبانا وشيبانكم للجنه...

رد: عندك غرفة سحب او سبق ان فصلت او اشتريت تفضل بالمشورة والاستشارة ؟؟؟!!

ابو سالم

ربي يعطيك العافيه

مقترحات في محلها

الله يجزاك الجنة



ولا يهون الذيب

رد: عندك غرفة سحب او سبق ان فصلت او اشتريت تفضل بالمشورة والاستشارة ؟؟؟!!

موضوع طيب ورائع بروعة طرحك اخوي عبدالعزيز

فعلاً نبي مشاركه من الشباب الي عندهم كرفانات

ويعطونا السليبات و الايجابيات و ماهو افضل

لاهنت ياعبدالعزيز على هالطرح الطيب

في انتظار جديدك لاعدمناك

رد: عندك غرفة سحب او سبق ان فصلت او اشتريت تفضل بالمشورة والاستشارة ؟؟؟!!

اخوي سيف
شعور متبادله
والقلوب شواهد

ربي يحفظك ويخليك

رد: عندك غرفة سحب او سبق ان فصلت او اشتريت تفضل بالمشورة والاستشارة ؟؟؟!!

يا شباب نرجو المشاركه ايضا بافضل الورش الي تفصل الغرف بافضل جودة وافضل مواد كلن على حسب ديرته
بالنسبه لي انا شفت تفصيل للرواد الجزيره في الصرار تفصيل اكثر من رائع لا في الشكل ولا الترتيب ولا المواد المستخدمه
والي خابر له غرف مفصله للبيع يعطينا خبر والله يجعل شيبانا وشيبانكم للجنه...

طلبك موجود يابو علي مجلس و غرفة تفصيل ورشة الصرار جديدة 2010 السوم 100 الف ريال والبيع قريب
جوال راعيها ابو شبيب 0502681756 اخذ من راسة

رد: عندك غرفة سحب او سبق ان فصلت او اشتريت تفضل بالمشورة والاستشارة ؟؟؟!!

الله يعطيك العافيه اخوي على هذا الموضوع

لما له من فائده كبيره تهم الكثير في تبادل الخبرات

متابع لهذا الموضوع

رد: عندك غرفة سحب او سبق ان فصلت او اشتريت تفضل بالمشورة والاستشارة ؟؟؟!!

شكراً اخوي عبدالعزيز على فتح الموضوع الجميل بارك الله فيك
انا ارى من وجهة نظري بأن الدكة اللي تنسحب من يمين ويسار
افضل من السطح:
اولاً الاستفادة من الظل في الصباح وفي المساء وهذا بحد ذاته يكفي
ثانياُ ان لا يوجد اجهاد من الطلاوع والنزول
ثالثا نسبة الخطوره السقوط من الاعلى والله الحافظ
رابعاً المرونه وسهولة التنقل والقرب من الارض

رد: عندك غرفة سحب او سبق ان فصلت او اشتريت تفضل بالمشورة والاستشارة ؟؟؟!!

أخوي سيف المسعري

ملاحظاتك في محلها

الف شكر على مرورك الكريم

رد: عندك غرفة سحب او سبق ان فصلت او اشتريت تفضل بالمشورة والاستشارة ؟؟؟!!

موضوع رائع متابع لما يطرح فيه

رد: عندك غرفة سحب او سبق ان فصلت او اشتريت تفضل بالمشورة والاستشارة ؟؟؟!!

بيض الله وجيهكم جميعا على التفاعل

وانا متابع مثل ااخوي خالد

رد: عندك غرفة سحب او سبق ان فصلت او اشتريت تفضل بالمشورة والاستشارة ؟؟؟!!

اخوي بدر العجمي لا هنت وبيض الله وجهك...

اما من ناحية تقريري عن تفصيل سحاابه فاليكم التقرير التالي :

انا فصلت في ورشة عرض الكبره 3.70 فيها مجلس طوله 7 م ومقلط طوله 3.5 م ومطبخ طوله 2.5 م وحمام مروش بس طوله 1م يعني كلها طولها 14 م في عرض 3.70 م وقالي بعد 50 يوم يخلصها ..

اهم شي الشاصي يكون عريض يعني البيم لا يقل عن 25 سم في العرض وطبعن طوله من المصنع يجي 12 م بدون وصلات هذا الشاصي واذا تبي زود يوصللك انا وصلت مترين بس خل شكل اللحام مثل هذا الشكل افضل << وايضا ييكون الجنط 20 لا تا خذ اقل وجب لك كفرات بلون مستعمل جنط عشرين لانه مو موفرها لك بيوفر لك كفرات اي كلام الا اذا القاع الي انتو فيها ماهيب وعر خذ اي كفر .

انا خليت الدرايش خمس درايش بالمجلس وثنتين بالمقلط ووحدة بالمطبخ وفتحة مكيف بنص المجلس وفتحة مكيف بالمقلط .
طول الدريشه وعرضها بكيفك بس انا خليت عرض الدريشه الوحدة بالمجلس مترين ووطولها متر والي بالمقلط نفس المجلس والمطبخ اقل يعني عرضها متر ونص في طول تسعين .
البيبان باب المجلس منعزل لحاله من جنب الكبره ما فيه الا هو ومن داخل فيه باب بين المجلس والمقلط ,المقلط والمطبخ بابين جنب بعض من برا من الجنب الثاني للكبره ويكون درجهم واحد وفيه باب بين المقلط والمطبخ ,المطبخ فيه حوض غسيل وادراج فوق وتحت وفي طرف المطبخ باب الحمام على ااساس الي يبي يسبح وانا انصحك تسوي حمام ترويش بس بدون اي اضافات لانه يبي لها شغل كثير من ناحية التصريف .

لازم يكون سقف الكبره فيه ميلان من يمين ويسار مثل كذا ^ على اساس المطر ويكون فيه مواصير على جنب الكبره لتصريف ماء المطر.
الخزان حطه في اخر الكبره ولا تخليه فوقها فوق السقف حطه على الكبره يسوي له كرسي ويحط الخزان عليه.


خله يضبط لك بعض الاكسسورات مثل :
الشنطه الي تكون مثل الصندوق الطويل في عرض الكبرة من تحت على اساس يكون مثل المخزن,يحط لك بزابيز غسيل جنب المجلس ويوصلها بالخزان علشان يغسلون الرجال اذا عندك عشا ء ,محلين صغار لدبات الغاز,ثلاث مقابض في اعلى الكبره من يمين ومن يسار يكون واحد في اولها واحد في نصها والثالث في اخرها علشان تشدها بحبال ااذا صار فيه هواء مثل حبال الخيمه واضربها بطنب,خله يحط لك هوك من ورا للسحب ,شبوك للمكيفات تلزمها لا تطيح ,شبوك للدرايش من البزران لاحد يطيح والدرايش تكون عاكسه,

شي مهم الرحى مهم جدا جدا وافضل نوع الالماني بعده السوري والي يسوونه بعض الي يفصلون ولا ييخافون الله يحط لك صيني ويقولك انه سوري او يحط لك سوري ويقولك انه الماني وطبعا سعر الالماني من 3200 الى 3700 وسعر السوري 1500 والصيني 900 واذا تبي نصيحتي رح اشتر بنفسك من الوكلاء التريلات الي موجودين بديرتك او انشد هل التريلات يعلمونك عندنا بالشرقيه العايد والقاضي في صناعية الدمام الثانيه هم الي يبيعون وشركات كبار مستحيل تغشك اشتر من عندهم وقل للورشة الي بتفصللك الكبره الرحى علي انا وخلها ينقص سعرها من الحساب ووفررها له انت افضل ولا تعطيها اياه وتقول ركبها وخلاص قله اليوم الي تبي تركب الرحى فيه انا عندك وبجيبها لك وودها لاقرب ورشه ودقها بكوتنق صبغ مضاد للصدا واصبغها بالصبغ الي تبي وودها للي يبي يفصل لك في الوقت المناسب.


لاتحط دكه لا فوق ولا تحت تثقل ع الفاضي وماش مساحه ما تسوى عليك ,ولا تحط مشب في المجلس يلخذ مساحه وبيكتم المجلس لا شبيت واذا بغيت تنام فيها غير امنه .

هذا الي عندي وااذا تذكرت شي رجعت لكم وسامحوني على القصور......................................

ذيب بن علي ,,,,,