شوركم وهداية الله قبل

السلام عليكم جميعاً


مسيكم بالحير بعد جميعاً

ودي استشيركم ومن شاور ماخاب انشالله

عندي حواره شاريها عمرها 7شهور وطيبه عسى الله يبارك لنا ولكم وغاليه بعد

السؤال- اضير عليها ناقه مصغر؟
والا انقع العلف لها برسيم وشعير اعلفها لحالها

انا فكرت اضير بس شغله ويمكن تركب ويمكن ماتركب ولو ركبت بعض الابل حليبها احيان مرض!!!...

وان قلت ابنقع لها العلف اخاف تكسر وتصير هجره والا الضعف مهيب ضاعفه

وان قلت اخلي الراعي يحلب لها الصبح والمغرب الرعيان ماعليهم تكله

والله اني احترت مدري وش اسوي

ارجوا من الاخوان اصحاب الخبره اللي جربوا يفيدوني اللي ماجرب والا بس سمع الله لا يهينه لايبدي راييه

المجرب فقط

عسى الله ان ينفعني واياكم

رد: شوركم وهداية الله قبل

الأخ محمد

اولاً الله يبارك لك في الحوارة


ثانياً أنت نقع العلف برسيم وشعير حب وأحلب لها من البل وعلمها اشرب في الماعون وإذا شفت الحوارة صحتها طيبة وفي تطور أتركها على هذا الشئ وتوكل على الله

وإذا الحوارة ماتطورت وما ناكل عدل وتشوف صحتها في تنازل ضير عليها ناقة والله يوفقك


هذا رأيي..

رد: شوركم وهداية الله قبل

لا تكثر الشعير تبشم ومايحتاج اضيار

رد: شوركم وهداية الله قبل

نقع العلف عندها واحلب لها وان بغيت زياده فيه في السوق مكعب تسمين حق العجول غالي شوي حط لها منه وان شاء الله تشوف الي يسرك

رد: شوركم وهداية الله قبل

مرحبا يابو عمير والبكرة تقول غالية والحل عندك مالها الاالضير لن مهما عطيتها تنتقض بعد فطام اللبن منها .

رد: شوركم وهداية الله قبل

مرحبا بن عمير انا مثلك شريت قعود من تحت امه عمره 5 شهور وخليته تقريبا 20 يوم على البرسيم والمجروش لكن بدا ينقص ورحت السوق ولقيت هجن مصغر وسعرها مناسب وضيرت عليها وصار كل يوم بزود ابشرك

رد: شوركم وهداية الله قبل

السلام عليكم ورحمة لله وبركاته
ضير على ناقه عمر حوارها نفس عمر الاحواره هو الانسب بس انتبه خل عندك توقيت للحليب يعني شمل الناقه ولا تنسى المجروش والبرسيم
والله اعلم
وتقبل تحياتي

رد: شوركم وهداية الله قبل

العلف كافي وانا خوك البدو يغرزون عشايرهم لا جا للحيران سبع ثمان شهور

رد: شوركم وهداية الله قبل

بيض الله وجيهكم جميعاً


ومشكورين على تجاوبكم وتجربتكم اللي انشالله يستفيد منها الجميع


اكرر شكري لكم جميـــــــــــــع

وجزاكم الله خير

رد: شوركم وهداية الله قبل

شف لك ناقة عمانية " وضير عليها أبرك لك ، لان حليب العمانيات يكون قليل يسد الحوار ويغذيه سبحان الله
طبعا من واقع تجربه ، اذا البكره غاليه ، ضير عليها وأنسى تشمل خلها ليل ونهار ترضع من أمها [ الشتاء ] أما في الصيف لا حاول توقت وقت رضاعتها وتشمل بوقت الحرارهـ ، ومن ناحية العلف خل علفك طبيعي جداً لا تكثر ولا تنقص والحليب بيـآخذ مفعوله فيها وراح تسمن عليه بإذن الله ،،


تحياتي وبالتوفيـق لك ،،

رد: شوركم وهداية الله قبل

مرحبا يامحمد
واخذ نصيحة مجرررب
مهما عطيت الحواره من انواع الاعلاف فلن تسد مسد الحليب
دور لها البكر الطووويله وضيرها عليها وابشر با الخير
تقبل تحياتي

رد: شوركم وهداية الله قبل

مرحبا يامحمد

واخذ نصيحة مجرررب
مهما عطيت الحواره من انواع الاعلاف فلن تسد مسد الحليب
دور لها البكر الطووويله وضيرها عليها وابشر با الخير
تقبل تحياتي

عطاك العلم ابن صنهات وركز بقوله الطووووويله عشان الرقبه ما ترتخي للحواره
وان ما لقيت
عليك بالعلف وعطها في الماعون جليب الاباكير عندك افرد لها وحده مرتين يوميا على الاقل ولا عليها خلاف

رد: شوركم وهداية الله قبل

شف وانا اخوك


كان عندنا نفس وضعك بكره ماتت امها وهي صغيره ولا ضيرناها ولا شي

نعطيها في الصبح برضاعه والمساء رضاعه

والحمدلله زانت وتاكل ولا فيها شي


واذا كانت بكرتك غاليه ضيرها

تقبل مروري

رد: شوركم وهداية الله قبل

اشوف ان اللي عمره سبعه شهور يكفيه العلف
لكن بشرط ان ينقع عنده ثلاث (برسيم +مكعب/او شعير+ الماء البارد)
وانا افرد الحيران على سبعه في الغالب
تقبل تحياتي

رد: شوركم وهداية الله قبل

الاخ محمد

وعليكم السلام ورحمة الله وبركاته

سبع شهور مايحتاج ضيار نقع عنده العلف

وان قدرت انك تعلمه على الحليب من الطاسه ومع العلف كافي


والحوار لاجا عمره ست شهور ما عاد ان شاء الله يكسر